مہمند ایجنسی : سیکیورٹی فورسز اور دہشت گردوں کے درمیان مہمند ایجنسی میں ہونے والی جھڑپ کے دوران دس دہشت گرد مارے گئے جن کی لاشیں سیکیورٹی فورس نے تحویل میں لے لی ہیں۔
آئی ایس پی آر کے ترجمان کے مطابق مہمند ایجنسی کے علاقے شن کرئی میں گزشتہ رات ڈیڑھ بجے کے قریب دس سے پندرہ دہشت گردوں نے پاکستانی علاقے میں داخل ہونے کی کوشش کی جن کو سیکیورٹی فورسز نے گھیرے میں لے لیا۔
دونوں جانب سے ایک گھنٹے سے زائد تک فائرنگ کا تبادلہ جاری رہا۔ جس کے دوران دس دہشت گرد مارے گئے۔ فائرنگ کے تبادلے میں کسی سیکیورٹی اہلکار کو نقصان نہیں پہنچا۔
آئی ایس پی آر کے مطابق دہشت گردوں کی لاشیں مقامی انتظامیہ کے حوالے کردی گئیں، جنہوں نے لاشیں اسپتال میں منتقل کر دیں۔
