پشاور : خیبرپختونخوا میں سہ فریقی اتحاد نے بلدیاتی انتخابات میں مبینہ دھاندلی پرصوبائی حکومت کے خلاف دس جون سے احتجاجی تحریک چلانے کا اعلان کردیا ہے۔
پشاور میں سہ فریقی اتحاد کے اجلاس کے بعد میڈیا سے بات چیت کے دوران اتحاد کے صدر اور اے این پی کے مرکزی سیکرٹری اطلاعات میاں افتخارحسین کا کہنا تھا کہ دس جون کو صوبہ بھر میں شٹرڈاون ہڑتال کے ساتھ ساتھ احتجاجی مظاہرے کئے جائیں گے۔
ان کا کہنا تھا کہ اگر صوبائی حکومت رضاکارانہ طور پر مستعفی نہیں ہوئی تو عوامی قوت سے حکومت کا خاتمہ کیا جائے گا۔
میاں افتخارحسین کا کہنا تھا کہ سہ فریقی اتحاد کشتیاں جلا چکی ہے اور اب صوبائی حکومت کے خاتمہ تک ان کی یہ تحریک جاری رہے گی۔
اس موقع پر انہوں نے تاجر برادری سے بھی شٹرڈاون ہڑتال میں بھر پور ساتھ دینے کی اپیل کی۔
