ARYNews.tv | Urdu – Har Lamha Bakhabar

Tag: #100DaysofKhan

  • وفاقی کابینہ کے 6 نئے وزرا نے حلف اٹھا لیا

    وفاقی کابینہ کے 6 نئے وزرا نے حلف اٹھا لیا

    اسلام آباد : وفاقی کابینہ کے6 نئے وزرا ء نے حلف اٹھا لیا، صدر ڈاکٹر عارف علوی نے نئے وزراء سے حلف لیا جبکہ میاں سومرو نے وزیر مملکت کا عہدہ لینے سے انکار کردیا۔

    تفصیلات کے مطابق وفاقی کابینہ میں توسیع کر دی گئی، جس کے لئے نئے وزراء کی حلف برداری کی تقریب ایوان صدر میں ہوئی، تقریب میں 6 نئے وزراء نے حلف اٹھالیا، صدر مملکت ڈاکٹر عارف علوی نے وزراء سے حلف لیا۔

    حلف اٹھانے والوں میں تین نئے وزرا ء اور تین وزرائے مملکت شامل ہیں۔

    علی محمد خان، عمر ایوب، علی زیدی نے وفاقی وزیر جبکہ مراد سعید، محمد شبیر علی اور محمد حماد اظہر نے وزیرمملکت کی حیثیت سے حلف اٹھایا۔

    کابینہ میں شامل عمر ایوب کو وفاقی وزیر برائے توانائی جبکہ علی زیدی کو وفاقی وزیر برائے بحری امور کا قلمدان سونپا گیا ہے، دیگر وزرا کے عہدوں کا اعلان بعد میں کیا جائے گا۔

    نئے وزراء اور وزرائے مملکت کی شمولیت کے بعد وفاقی کابینہ کی کُل تعداد 28 ہوگئی ہے۔

    دوسری جانب محمد میاں سومرو نے وزیر مملکت کا عہدہ لینے سے انکار کردیا اور حلف نہیں اٹھایا، محمدمیاں سومرو سابق چیئرمیں سینٹ اور نگراں وزیر اعظم رہ چکے ہیں۔

    مزید پڑھیں : وزیرِ اعظم عمران خان کا وفاقی کابینہ میں توسیع کا فیصلہ

    یاد رہے 3 روز قبل وزیرِ اعظم عمران خان نے وفاقی کابینہ میں توسیع کا فیصلہ کرتے ہوئے 4 نئے وزرا کابینہ میں شامل کر دیے تھے، جن میں تین وفاقی وزیر اور ایک وزیرِ مملکت شامل تھے جبکہ اس فیصلے پر عمل در آمد صدارتی انتخاب کے بعد ہونا تھی۔

    واضح رہے 20 اگست کو پہلے مرحلے میں وزیر اعظم عمران خان کی کابینہ میں 16 وفاقی وزرا اور 5 مشیروں نے اپنے عہدوں کا حلف اٹھایا تھا۔

  • وزیراعظم 50 لاکھ مکانات کے تعمیرکی خود نگرانی کریں گے

    وزیراعظم 50 لاکھ مکانات کے تعمیرکی خود نگرانی کریں گے

    اسلام آباد : وزیراعظم 50 لاکھ مکانات کے تعمیر کی خود نگرانی کریں گے، عمران خان کا کہنا ہے کہ حکومت بے گھر افراد کو گھروں کی فراہمی کیلئے پر عزم ہے۔

    تٖفصیلات کے مطابق اسلام آباد میں ملک میں پچاس لاکھ گھروں کی تعمیر کے حوالے سے اعلیٰ سطح اجلاس وزیراعظم عمران خان کی زیر صدارت ہوا، اجلاس میں 50 لاکھ مکانات کی تعمیر کے طریقہ کار اور اقدامات پر غور کیا گیا جبکہ ہاؤسنگ سیکٹر کی طلب اور کمی سے متعلق امور پر بریفنگ دی گئی۔

    اجلاس میں وزیراعظم عمران خان نے بے گھر افراد کو سستے گھروں کی فراہمی کے منصوبے کی اونر شپ خود لینے کا فیصلہ کیا اور اس حوالے سے کمیٹی کو ہدایت کی کہ دو ہفتے میں حتمی سفارشات مرتب کی جائیں تاکہ منصوبے کا جلد از جلد اعلان کیا جاسکے۔

    اس موقع پروزیراعظم عمران خان نے کہا پچاس لاکھ گھروں کی تعمیر اور کچی آبادیوں کو بنیادی سہولیات کی فراہمی اور انہیں ریگولیٹ کرنا حکومت کا اہم ایجنڈا ہے، حکومت بے گھر افراد کو گھروں کی فراہمی کیلئے پرعزم ہے۔

    وزیراعظم کا مزید کہنا تھا کہ اس منصوبے سے بے گھر افرادکی رہائش کا مسئلہ حل ہوگا بلکہ اسکے ساتھ ساتھ روزگار کے مواقع بھی پیدا ہوں گے اور ہاؤسنگ سیکٹر اور منسلک صنعتوں کو ترقی ملے گی۔

    انھوں نے کہا کہ پنجاب اور خیبر پختونخواہ کے گیسٹ ہاؤسز اور دیگر سرکاری عمارتوں و زمین سے ہاؤسنگ پروگرام کےلئے خاطر خواہ وسائل اکھٹے کئے جا سکتے ہیں۔

    یادرہے انتخابات سے قبل پاکستان تحریک انصاف کے سربراہ عمران خان کا کہنا تھا کہ اقتدار میں آکر5 سال میں 50لاکھ گھر بنائیں گے، منصوبہ مذاق نہیں ہم کر کے دکھائیں گے۔

    پچاس لاکھ گھروں کی تعمیر پی ٹی آئی کے منشور کا بھی حصہ تھا، عمران خان کا کہنا تھا بلین ٹری سونامی کی طرح ہاؤسنگ اسکیم لے کر آئیں گے،منصوبے پر عملدرآمد میں کامیاب ہوگئے تو معیشت اٹھے گی اور روزگار ملے گا، منصوبے کے ذریعے نئی تعمیراتی کمپنیاں آئیں گے، روزگار کا مسئلہ حل ہوگا، منصوبے کیلئے پاکستان بلڈنگ ایسوسی ایشن سے مدد لی جائےگی۔

  • ریلوے اکیلی پاکستان کے قرضے اتار سکتی ہے: شیخ رشید

    ریلوے اکیلی پاکستان کے قرضے اتار سکتی ہے: شیخ رشید

    اسلام آباد: وفاقی وزیر ریلوے شیخ رشید کا کہنا ہے کہ ریلوے کے پاس ایک لاکھ 76 ہزار ایکڑ زمین ہے، ریلوے اکیلی پاکستان کے قرضے اتارنے میں تاریخی کردار ادا کر سکتی ہے۔

    تفصیلات کے مطابق پاکستان ریلوے نے گرین پاکستان گرین ریلوے مہم کا آغاز کر دیا۔ وفاقی وزیر ریلوے شیخ رشید نے پاکستان ریلوے کی پہلی نرسری کا مارگلہ ریلوے اسٹیشن پر افتتاح کر دیا۔

    اس موقع پر میڈیا سے گفتگو کرتے ہوئے ان کا کہنا تھا کہ وزیر اعظم کی ہدایت پر شجر کاری کر رہے ہیں، شجر کاری مہم کے تحت ایک لاکھ 84 ہزار پودے لگا چکے ہیں۔ پاکستان ریلوے بہت جلد قوم کو بڑی خوش خبری دے گی، کوشش ہے کہ ریلوے کو بہتر ادارہ بنائیں۔

    انہوں نے کہا کہ کل یا پرسوں سے لاہور کے لیے ایکسپریس ٹرین چلائیں گے، چین سے موسم بہتر بنانے کے لیے پودے منگوائیں گے۔ ہمارے پاس کوچز کی بہت کمی ہے۔ ریلوے کے افسران ادارے کو بہتر بنانے کے لیے پر عزم ہیں۔

    شیخ رشید کا کہنا تھا کہ آپ 100 دن میں ریلوےادارے کی کارکردگی میں بہتری دیکھیں گے، ریلوے کو جدید خطوط پر استوار کریں گے۔ ٹرینوں میں وائی فائی سمیت ون ونڈو آپریشن شروع کریں گے۔

    انہوں نے کہا کہ پاکستان ریلویز کو عوام دوست ادارہ بنائیں گے۔ تھوڑا وقت دیں بہتری آنے میں کچھ وقت لگے گا۔ عمران خان کی ہدایت پر بھرتیاں میرٹ پر ہوں گی۔ پچھلی دفعہ گیس میٹر لگائے تھے، اب بجلی کے میٹر لگاؤں گا۔

    انہوں نے کہا کہ ریلوے میں اب کرپشن بھول جائیں، معاہدوں سے کک بیکس نکالیں گے۔ سی پیک کے تحت 33 ہزار آسامیاں ہیں، بطور اپوزیشن بات کرنے کا انداز الگ ہوتا ہے۔ سی پیک کی کارکردگی میں ریلوے کلیدی کردار ادا کرے گی۔

    شیخ رشید نے مزید کہا کہ ریلوے کی خراب کوچز کو دوبارہ قابل استعمال بنائیں گے، راولپنڈی میں بھی پانی اور بجلی کے مسائل ہیں۔

    وزیر ریلوے کا کہنا تھا کہ عمران خان نے واضح کہا ہے کہ جس پر کرپشن کا الزام ہے کارروائی کریں، اسپتال پر کام شروع کروا کر چیف جسٹس نے مجھے خرید لیا ہے۔ لوٹی ہوئی رقم واپس لانے کا کام بہت مشکل ہے، عمران خان نے لوٹی ہوئی رقم لانے کا ٹاسک اپنے ہاتھ میں رکھا ہے۔

    انہوں نے کہا کہ امید ہے لوٹی ہوئی رقم ملک میں واپس لانے میں کامیابی ملے گی۔ ریلوے مزدوروں کو ایک گریڈ اپ کرنے کی سمری وزیر اعظم کو بھیج رہے ہیں۔ ایک لاکھ 76 ہزار ایکڑ زمین ریلوے کے پاس ہے، ’ریلوے اکیلی پاکستان کے قرضے اتارنے میں تاریخی کردار ادا کر سکتی ہے‘۔

  • پاکستان کا مفاد سب سے مقدم ہے، شام محمود قریشی نے امریکی وزیرِخارجہ پرواضح کردیا

    پاکستان کا مفاد سب سے مقدم ہے، شام محمود قریشی نے امریکی وزیرِخارجہ پرواضح کردیا

    اسلام آباد: دفترِ خارجہ میں پاک امریکا وفود کی سطح پر جاری مذاکرات اختتام پذیر ہوگئے، شاہ محمود قریشی نے امریکی وفد کو واضح کیا کہ نئی حکومت کے لیے ملک کا مفاد سب سے مقدم ہے۔

    تفصیلات کے مطابق امریکی وزیرِ خارجہ مائیک پومپیو کی قیادت میں امریکی وفد دفترِ خارجہ پہنچا تھا جہاں شاہ محمود قریشی نے ان کا استقبال کیا ، دونوں ممالک کے وفود کے درمیان مذاکرات 40 منٹ تک جاری رہے، ترجمان دفتر ِ خارجہ کے مطابق پاکستان نے امریکی وفد پر واضح کیا کہ دونوں ممالک کے تعلقات ایک بار پھر بھروسے اور احترام کی بنیادوں پر استوار کرنے کی ضرورت ہے۔

    امریکا کے وزیر خارجہ مائیک پومپیو آج ایک روزہ دورے پر اسلامی جمہوریہ پاکستان پہنچے ہوئے ہیں۔ ان کے ہمراہ امریکا کی مسلح افواج کے چیف آف اسٹاف جنرل جوزف ڈنفرڈ بھی ہیں۔وزیر خارجہ مائیک پومپیو کا طیارہ نور خان ایئر بیس پر اترا تو ان کا استقبال وزیر خارجہ کے بجائے دفتر خارجہ کے ایڈیشنل سیکریٹری شجاع عالم نے کیا تھا۔

    شاہ محمود قریشی نے پاکستانی وفد کی قیادت کرتے ہوئے امریکی حکام کو مختلف معاملات پر پاکستان کے تحفظات کا اظہار کرتے ہوئے ان پر پاکستانی موقف سے آگاہ کیا۔

    مذاکرات میں شاہ محمودقریشی نے امریکی وفد کو وزیراعظم عمران خان کےاصلاحاتی ایجنڈےسےآگاہ کیا اور بتایا کہ عام آدمی کےمعیارزندگی میں بہتری اور عالمی سطح پرپاکستان کاتشخص بلندکرنا نئی حکومت کی اولین ترجیحات میں شامل ہے۔

    دونوں وفود کے درمیان ہونے والے ان مذاکرات میں پاکستان اور امریکا کے تعلقات پربھی گفتگو ہوئی اور طرفین کی جانب سے پاک امریکا دوطرفہ تعلقات میں بہتری کےمواقع پرتبادلہ خیال کیا گیا۔

    امریکی وفد نے خطے کی مجموعی صورتحال اور بالخصوص افغانستان کے موضوع پر پاکستانی وفد سے تبادلہ خیال کیا اور پاکستان سے تعاون طلب کیا ، جس پر شاہ محمود قریشی کا کہنا تھا کہ افغانستان میں قیام امن کے لیے کرداراداکرتےرہیں گے لیکن نئی حکومت کے لیے پاکستان کا مفاد سب سے مقدم ہے۔

    پاکستانی سفارتی ذرائع کے مطابق امریکی وزیر خارجہ کے دورہ پاکستان کے موقع پر ان کی وزیر اعظم عمران خان سے بھی ملاقات متوقع ہے۔ پومپیو دورہ مکمل کر کے آج ہی نئی دہلی روانہ ہوں گے جہاں امکان ہے کہ وہ بھارت پر ایران سے تیل کی خریداری روکنے کے لیے دباؤ ڈالیں گے۔

    امریکی وزیر خارجہ مائیک پومپیو نے دورہ پاکستان سے قبل واشنگٹن میں میڈیا سے گفتگو کرتے ہوئے کہا کہ امید ہے پاک امریکا تعلقات میں نئی پیشرفت کا آغاز کریں گے۔امریکی وزیر خارجہ نے میڈیا نمائندگان نے بات چیت کرتے ہوئے کہا تھاکہ پاکستان افغانستان میں ثالثی کے لیے امریکا کے ساتھ تعاون کرے۔

  • ہیلتھ سیکٹرکےترقیاتی منصوبوں کی بروقت تکمیل یقینی بنائی جائے‘ ڈاکٹریاسمین راشد

    ہیلتھ سیکٹرکےترقیاتی منصوبوں کی بروقت تکمیل یقینی بنائی جائے‘ ڈاکٹریاسمین راشد

    لاہور: وزیرصحت ڈاکٹریاشمن راشد کا کہنا ہے کہ محکمہ صحت میں بھرتیوں اور ترقیوں میں مکمل خیال رکھا جائے۔

    تفصیلات کے مطابق صوبائی دارالحکومت لاہور میں وزیرصحت ڈاکٹریاسمین راشد کی زیرصدارت پرائمری اینڈ سیکنڈری ہیلتھ کا اجلاس جاری ہے جس میں سیکرٹری پرائمری اینڈ سیکنڈری ہیلتھ کی بھی موجود ہیں۔

    اس موقع پرڈاکٹریاسمین راشد نے کہا کہ محکمہ صحت میں بھرتیوں اور ترقیوں میں میرٹ کا مکمل خیال رکھا جائے اور ہیلتھ سیکٹر کے ترقیاتی منصوبوں کی بروقت تکمیل یقینی بنائی جائے۔

    صوبائی وزیرصحت نے کہا کہ خطرناک بیماریوں کے علاج ک موثرآگائی مہم ضروری ہے۔

    یاد رہے کہ دو روز قبل صوبائی وزیرِ صحت ڈاکٹر یاسمین راشد نے اے آر وائی نیوز کی خبر کا نوٹس لیتے ہوئے دل میں سوراخ والی 3 بہنوں کے فوری علاج کا حکم جاری کیا تھا۔

    صوبائی وزیرِ صحت نے بیماری کو موروثی قرار دیتے ہوئے کہا تھا کہ تینوں بہنوں کا ایک جیسے مرض کا شکار ہونا دراصل موروثی مسئلہ ہے۔

    پہلے 100 دن میں صحت کے محکمے میں انقلابی تبدیلی نظر آئے گی‘ ڈاکٹر یاسمین راشد

    واضح رہے کہ رواں ہفتے 27 اگست کو وزیر صحت پنجاب ڈاکٹر یاسمین راشد کا کہنا تھا کہ پہلے 100 دن میں صحت کے محکمے میں انقلابی تبدیلی نظر آئے گی۔

    ڈاکٹر یاسمین راشد کا کہنا تھا کہ خان صاحب کی سپاہی ہوں، پروٹوکول نہیں لوں گی، اب پاکستان میں حقیقی تبدیلی لے کر آئیں گے، وزیراعظم عمران خان نےتبدیلی کےسفرکوشروع کردیا ہے۔

  • وزیراعظم ہاؤس کی قیمتی گاڑیاں17ستمبر کو نیلام کی جائیں گی، اشتہار جاری

    وزیراعظم ہاؤس کی قیمتی گاڑیاں17ستمبر کو نیلام کی جائیں گی، اشتہار جاری

    اسلام آباد : وزیر اعظم ہاؤس میں موجود اضافی غیرضروری گاڑیوں کی فوری فروخت کا فیصلہ کرلیا گیا، گاڑیوں کی نیلامی17ستمبر کو وزیراعظم ہاؤس میں ہوگی۔

    تفصییلات کے مطابق وزیر اعظم عمران خان کی جانب سے اپنے پہلے خطاب میں کیے گئے اعلان کے مطابق وزیر اعظم ہاؤس کی نواز لیگ کے دورمیں منگوائی گئی پر تعیش گاڑیوں کی نیلامی کا باقاعدہ فیصلہ کرلیا گیا ہے۔

    اس سلسلے میں پہلے مرحلے میں33گاڑیاں نیلام کی جائیں گی، جس کیلئے وزیراعظم کی ہدایت پر کیبنٹ ڈویژن نے  ذرائع ابلاغ کو اشتہار بھی جاری کردیا ہے۔ ان33گاڑیوں میں قیمتی ترین8جدید بی ایم ڈبلیو اور چار مرسڈیز بینز بھی شامل ہیں۔

    اشتہار کے مطابق وزیراعظم ہاؤس میں 17ستمبر کی صبح دس بجے گاڑیاں نیلامی کیلئے پیش کی جائیں گی،گاڑیوں کی نیلامی سے حاصل رقم قومی خزانے میں جمع کرائی جائےگی۔

    علاوہ ازیں وزیراطلاعات فواد چوہدری نے اسلام آباد میں میڈیا سے غیر رسمی بات چیت کرتے ہوئے کہا ہے کہ جن گاڑیوں کی نیلامی کی جائے گی، اس سے خاطرخواہ رقم ملے گی،5 کروڑ والی گاڑی کی قیمت5کروڑ سے زیادہ ہی ملیں گے، کیوں کہ ہم نیلامی فنڈریزنگ کے لئے کررہے ہیں۔

    مزید پڑھیں: وزیراعظم کا نواز لیگ کے دورمیں منگوائی گئی پر تعیش گاڑیاں نیلام کرنے کا فیصلہ

    یاد رہے وزیراعظم عمران خان نے قوم سے اپنے پہلے خطاب میں کہا تھا کہ حکمرانی کرنے والوں کے رہن سہن سے آپ سب کو بچانا چاہتا ہوں، پاکستان میں وزیراعظم ہاؤس کے 524 ملازم ہیں، وزیراعظم ہاؤس 1100کینال پر واقع ہے، وزیراعظم کیلئے33بلٹ پروف سمیت 80گاڑیاں ہیں، ہم ان کو نیلام کرکے اس پیسے کو قوم کے استعمال میں لائیں گے۔

  • وزیراعلیٰ پنجاب سے وزیر صحت ڈاکٹر یاسمین راشد کی ملاقات

    وزیراعلیٰ پنجاب سے وزیر صحت ڈاکٹر یاسمین راشد کی ملاقات

    لاہور: وزیراعلیٰ پنجاب عثمان بزدار کا کہنا ہے کہ عام آدمی کا صحت کی معیاری سہولتوں پر پورا حق ہے۔

    تفصیلات کے مطابق وزیر اعلیٰ پنجاب عثمان بزدارسے وزیر صحت ڈاکٹر یاسمین راشد نے ملاقات کی جس میں صحت عامہ کی معیاری سہولتوں کی فراہمی کے اقدامات پر تبادلہ خیال کیا گیا۔

    اس موقع پر وزیراعلیٰ پنجاب کا کہنا تھا کہ عام آدمی کا صحت کی معیاری سہولتوں پر پورا حق ہے، معیاری طبی سہولتوں کی فراہمی کے لیے اصلاحات کریں گے۔

    سردار عثمان بزادر کا یہ بھی کہنا تھا کہ وزیر اعظم کی قیادت میں اسپتالوں کی حالت زارکوبدلیں گے، معیاری سہولتوں کے لیے متعلقہ حکام کومتحرک اندازمیں کام کرنا ہو گا۔

    وزیراعلیٰ پنجاب کا مزید کہنا تھا کہ معیاری طبی سہولتوں کی فراہمی تحریک انصاف کی حکومت کا مشن ہے، تبدیلی کا آغاز ہوچکا ہے، جلد شعبہ صحت میں انقلابی تبدیلی نظرآئے گی۔

    عمران خان کے نئے پاکستان کے خواب کو حقیقت میں بدلنا ہے‘ عثمان بزدار

    یاد رہے کہ گزشتہ ہفتے وزیراعلیٰ پنجاب عثمان بزدارکا کہنا تھا کہ عمران خان کے نئے پاکستان کے خواب کو حقیقت میں بدلنا ہے، گڈ گورننس کو فروغ دیں گے، کرپشن برداشت نہیں کروں گا۔

  • وزیراعظم نےشہریارآفریدی کووزیرمملکت برائے داخلہ بنانے کی منظوری دے دی

    وزیراعظم نےشہریارآفریدی کووزیرمملکت برائے داخلہ بنانے کی منظوری دے دی

    اسلام آباد : وزیراعظم عمران خان نے شہریار آفریدی کو وزیرمملکت برائے داخلہ بنانے کی حتمی منظوری دے دی۔

    تفصیلات کے مطابق وفاقی کابینہ کی جانب سے شہریار آفریدی کو وزیرمملکت برائے داخلہ بنانے کا فیصلہ کیا گیا، وزیراعظم عمران خان نے منظوری دے دی۔

    ذرائع کے مطابق شہریار آفریدی کو وزیرمملکت برائے داخلہ بنانے کا نوٹیفیکشن آج جاری کیے جانے کا امکان ہے۔

    وزارت داخلہ لوٹی گئی دولت کی واپسی کے لیے ہرممکن اقدامات کرے‘ عمران خان

    یاد رہے کہ گزشتہ روز وزارت داخلہ میں اجلاس کی صدارت کے دوران وزیراعظم عمران خان کو ماتحت اداروں کے بارے میں بریفنگ دی گئی تھی۔

    وزیراعظم عمران خان نے اجلاس سے خطاب کرتے ہوئے کہا تھا کہ وزارت داخلہ ملک سے لوٹی گئی دولت کی واپسی کے لیے ہرممکن اقدامات کرے۔

    عمران خان کا کہنا تھا کہ ایف آئی اے اور نیب مل کرکام کریں، منظم جرائم اور کرپشن کے خاتمے کے لئے مربوط روابط قائم کیے جائیں.

    وزیراعظم کا کہنا تھا کہ بیرون ملک پاکستانی ملک کا اثاثہ ہیں،ان کو ملک میں سرمایہ کاری کے مواقع فراہم کیے جائیں گے۔

    عمران خان کا کہنا تھا کہ وزارت داخلہ اور اس کے ذیلی ادارے شہریوں کے تحفظ کے لیے ضروری اقدامات اٹھائیں۔