ممبئی: معروف شخصیات کی انٹرنیٹ پر بعض اوقات ایسی تصاویر سامنے آتی ہیں جنہیں دیکھ کر یقین کرنا مشکل ہوتا ہے۔ اسی طرح گذشتہ دنوں بالی ووڈ کے نامور اداکار کی ایک ایسی تصویر سامنے آئی، جس میں انھیں پہچاننا بہت ہی مشکل ہے۔
انٹرنیٹ کے بڑھتے ہوئے رجحان کو مدنظر رکھتے ہوئے تقریباً تمام ہی معروف شخصیات نے سوشل میڈیا کے مختلف فورمز پر اپنی آئی ڈیز بنالی ہیں تاکہ وہ وقتاً فوقتاً اپنے مداحوں سے رابطے میں رہ سکیں۔
بالی ووڈ اداکار ہوں یا پھر کوئی بھی معروف شخصیت وہ اپنی روز مرہ کے معمول اور دیگر نئی چیزوں کو سوشل میڈٰیا پر اپ لوڈ کرتے ہیں جنہیں مداح بہت پسند بھی کرتے ہیں اور بعض اوقات تو اُن کی عام سی تصاویر وائرل بھی ہوجاتی ہیں۔
انٹرنیٹ پر وائرل ہونے والی تصویر میں دیکھا جاسکتا ہے کہ ایک معمر بزرگ حیران و پریشانی کی کیفیت میں رکشے میں سوار ہیں اور اُن کے بال بھی بکھرے ہوئے ہیں، رکشے میں سوار شہری کوئی عام شخص نہیں بلکہ بالی ووڈ کی معروف شخصیت ہیں۔
مزید پڑھیں: عام سا نظر آنے والا کروڑ پتی شخص
مذکورہ تصویر جب انٹرنیٹ پر وائرل ہوئی تو کوئی رکشے میں سوار بوڑھے شخص کو پہچان نہ سکا البتہ بھارتی میڈیا نےصارفین کی اس الجھن کو دور کیا اور بتایا کہ رکشے میں سوار معمر شخص دراصل بالی ووڈ کے بگ بی (امیتابھ بچن) ہیں۔
امیتابھ بچن نے بھیس بدل کر فلم کا کوئی منظر عکس بند نہیں کروایا البتہ انہوں نے شوٹنگ کے لیے ایک مقام سے دوسرے مقام پر پہنچنے کے لیے پرائیوٹ گاڑی کے بجائے پبلک ٹرانسپورٹ سے استفادہ حاصل کیا۔
فلم ڈائریکٹر کو یہ منظر اس قدر لبھایا کہ انہوں نے اسے محفوظ کرلیا اور اب اُن کا کہنا ہے کہ اگر کہیں مناسب لگا تو اس منظر کو ضرور فلم میں شامل کیا جائے گا۔
حیران کُن امر یہ ہے کہ امیتابھ بچن جو کسی تعارف کے محتاج نہیں وہ رکشے میں سوار ہوئے تو بھارتی شہریوں نے انہیں عام شہری ہی سمجھا، اس سے زیادہ مزیدار بات یہ بھی ہے کہ رکشے والا بھی بالی ووڈ کے لیجنڈری اداکار کو پہچان نہ سکا۔
یہ بھی پڑھیں: رشی کپور امیتابھ بچن کے بیٹے بن گئے، تصویر وائرل
قبل ازیں فلم شعلے اور پیکو کی شوٹنگ کے دوران بالی ووڈ اداکار نے موٹرسائیکل کی سواری حاصل کی تھی تاہم یہ اب تک کا پہلا انوکھا واقعہ ہے کہ انہوں نے رکشے میں تنہا سوار ہوئے۔
واضح رہے کہ بگ بی 27 سال بعد معروف ساتھی اداکار رشی کپور کے ساتھ نئی آنے والی فلم ’102 ناٹ آؤٹ‘ میں جلوہ گر ہورہے ہیں، طویل عرصے بعد دونوں سپراسٹارز کو اسکرین پر ایک ساتھ دیکھنے کے لیے مداح کافی پرجوش ہیں۔
گزشتہ دنوں بالی ووڈ انڈسٹری پر راج کرنے والے اداکار امیتابھ بچن نے سماجی رابطے کی ویب سائٹ پر اپنے نئے کردار کی تصویر اپلوڈ کی تھی جس میں وہ بالکل انوکھے انداز میں نظر آرہے تھے، بعد ازاں فلم کا پوسٹر بھی جاری کیا گیا تھا۔
فلم ناٹ آؤٹ 102 میں لیجنڈری اداکار رشی کپور کے 102 سالہ والد کا کردار ادا کررہے ہیں، فلم کے پوسٹر میں دیکھا جاسکتا ہے کہ رشی کپور پودے کو پانی ڈال رہے ہیں جبکہ امتابھ بچن اپنے فلمی بیٹے سرپر پانی ڈال رہے ہیں اور یہ سارا منظور اسکول دور کا ہے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
