ایران میں ایک خاتون (سیریل کلر بیوی) کے ہاتھوں 11 شوہروں کو قتل کرنے کا انکشاف ہوا ہے، جسے ملک کی تاریخ کا سب سے خوفناک سلسلہ وار قتل (Serial Murder) کیس قرار دیا جا رہا ہے۔
ایرانی میڈیا کا اس حوالے سے کہنا ہے کہ آج تہران کی عدالت میں کلثوم اکبری نامی خاتون کو پیش کیا گیا، جہاں اس پر 11 قتل اور ایک اقدامِ قتل کا الزام عائد کیا گیا۔
رپورٹس کے مطابق ملزمہ کلثوم اکبری، جسے ایرانی میڈیا میں ”بلیک وِڈو” (Black Widow) کا نام دیا جا رہا ہے۔ عدالت میں 22 سال کے دوران اپنے 11 شوہروں کو پیسہ اور جائیداد ہتھیانے کے لیے قتل کرنے کا اعتراف کیا۔
پراسیکیوٹرز کا کہنا ہے کہ قتل و غارت کا یہ سلسلہ سال 2000 سے شروع ہوا۔ اکبری عام طور پر بوڑھے اور بیمار مردوں کو اپنا شکار بناتی تھیں، ان سے شادی کے بعد انہیں آہستہ آہستہ ذیابیطس کی دوا، محرکات، اور بعض اوقات صنعتی الکوحل کے ذریعے زہر دے کر مار دیتی تھی۔
ضعیف العمر شوہروں کی ان اموات کو عام طور پر طبعی وجوہات سمجھا جاتا تھا جس کے باعث ملزمہ شک کے دائرے میں نہیں آتی تھی، وہ یکے بعد دیگرے ہولناک وارداتیں کرتی رہی اور پیسے بٹورتی رہی۔
رپورٹس کے مطابق ملزمہ کا آٓخری شکار عزیزاللہ بابائی نامی شخص بنا، جس کی موت 2023 میں ہوئی اور عزیز اللہ کے بیٹے نے اپنی سوتیلی ماں پر شک کا اظہار کیا، پولیس نے اس حوالے سے تحقیقات کیں تو ملزمہ نے اپنے جرائم کا اعتراف کرلیا۔
امریکا میں آئرش خاتون ڈیزائنر کی لاش کشتی سے برآمد
کلثوم اکبری نے ایک اور شخص کو زہر دینے کی کوشش کی تھی، مگر خوش قسمتی سے اس کی جان بچ گئی، جس پر ایک اقدام قتل کا الزام بھی عائد کیا گیا۔
چار مقتولین کے خاندانوں کی جانب سے عدالت میں ملزمہ کے لیے سزائے موت کا مطالبہ کیا گیا ہے، اب تک 45 سے زائد افراد کیس میں مدعی بن چکے ہیں، جنہوں نے خاتون پر مختلف الزامات عائد کیے ہیں۔