Tag: 11th hour

لاہور : پنجاب کے وزیر قانون رانا ثناءاللہ نے کہا ہے کہ خفیہ قوتیں نواز شریف کو سزا دلانے کے درپے ہیں، لیکن وہ ضمانت پر باہر آجائیں گے، پی ٹی آئی کے ٹکٹوں کے فیصلے بھی وہی قوتیں کررہی ہیں۔

ان خیالات کا اظہار انہوں نے اے آر وائی نیوز کے پروگرام الیونتھ آور میں میزبان وسیم بادامی سے خصوصی گفتگو کرتے ہوئے کیا، رانا ثناءاللہ نے کہا کہ میاں نواز شریف کے کیس میں ہمیں توقع انصاف کی ہے مگر لگتا ایسا ہے کہ انصاف ہوگا نہیں۔

خفیہ قوتیں نواز شریف کو سزا دلانے کے در پے ہیں، جےآئی ٹی اور دیگر معاملات کے پیچھے بھی یہی خفیہ قوتیں تھیں، عمران خان کی جماعت کےٹکٹوں کے فیصلے بھی وہی قوتیں کررہی ہیں۔

خفیہ قوتوں کےدفاتر الیکشن سیل کی طرح کام کررہےہیں، فیصل آباد میں یوسی چیئرمینوں کو فون کرکے ان کی نگرانی کی جارہی ہے۔

پاک فوج کے جوان ملک پر جان نچھاور کرتے ہیں

راناثنااللہ نے مزید کہا کہ فوج کے ادارے پرالزام نہیں لگایا جاسکتا، فوج کے جوان ملک کےلئے جان نچھاور کرتے ہیں، اسٹیبلشمنٹ کے لفظ میں سب شامل ہوجاتے ہیں جو روز میڈیا پر بھی باتیں کرتے ہیں، یہ کام خفیہ قوتیں اور فرشتے کرتے ہیں جو نظر نہیں آتے۔

فوج اور عدلیہ جیسے ادارے اس قسم کے کام نہیں کرتے، راؤانوار جس سیف ہاؤس میں رہا ہے ہمارا اشارہ اسی طرف ہے، لوگوں کو پیچھے سے جو ہلا رہے ہیں وہ خفیہ قوتیں ہیں۔

نوازشریف کیخلاف فیصلے سے سیاسی نقصان نہیں ہوگا

راناثناءاللہ کا کہنا تھا کہ نوازشریف کیخلاف فیصلے سے سیاسی نقصان نہیں ہوگا، 28جولائی کے فیصلے سے جو حاصل نہ ہوا اس کیلئے جوا کھیلا جائیگا، ایسا کرنے والوں کو بہت بڑا نقصان ہوگا، احتساب عدالت کے فیصلے پر ہم ہائیکورٹ میں اپیل پر جاسکتے ہیں۔

نواز شریف لاہور ہائیکورٹ سے ضمانت پر باہر آجائیں گے،جیل جانے کے بعد کسی اور کو بیانیہ لے کر آگے بڑھنے کی ضرورت ہی نہیں ہوگی، نوازشریف کے وہاں پر جانے سے پہلے سے بھی زیادہ بڑے جلسے ہونگے۔

چوہدری نثار ن لیگ چھوڑ کر کبھی نہیں جائیں گے

چوہدری نثار سے متعلق اظہار خیال کرتے ہوئے انہوں نے کہا کہ چوہدری نثار ن لیگ چھوڑ کر نہیں جائیں گے ان کو ٹکٹ بھی ملناچاہئے، وہ نوازشریف سے ناراض نہیں صرف گلہ ہے، جب بھی یہ بیٹھیں گے تو یہ گلہ دور ہوسکتا ہے۔

چوہدری نثار کو مریم نواز بزرگوں کی طرح سمجھتی ہیں، چوہدری نثار الیکشن نہ لڑنا چاہیں تو ان کے احترام میں کسی کو ٹکٹ بھی نہیں دینا چاہئے، وہ ایسے آدمی ہرگز نہیں کہ کسی قوت کا آلہ کار بنیں، چوہدری نثار کی اپنی ایک اہمیت رہی ہے وہ وزیرداخلہ رہے ہیں۔

الیکشن وقت پر نہ ہوئے تو اس کا فائدہ نواز شریف کو ہوگا

راناثنااللہ کا کہنا تھا کہ حالات کے مطابق الیکشن وقت پر ہوتے نظر آرہے ہیں کیونکہ الیکشن میں تاخیر ہوئی تو نوازشریف کے بیانیے میں مزید جان آئے گی، سیاسی جماعتیں جانتی ہیں کہ ن لیگ کو ہرا نہیں سکتیں۔

منحرف اراکین سیاسی گند ہیں مزید بھی جائیں گے

ایک سوال کے جواب میں ان کا کہنا تھا کہ منحرف اراکین سیاسی گند ہیں، ن لیگ سے منحرف ارکان وہ لوگ ہیں جورسک نہیں لیتے، جنہوں نے نوازشریف کو ووٹ نہیں دیا تھا، نوازشریف کو ووٹ پڑے تو درپردہ قوتوں کو حیرانی ہوئی اور کچھ قوتیں متحرک ہوگئی تھیں۔

جو لوگ پارٹی چھوڑ گئے نوازشریف نے انہیں دل سے قبول نہیں کیا تھا، ایک وقت ایسا تھا جب فصلی بٹیروں کی بہت بڑی تعداد ہوتی تھی، ابھی 8 گئے ہیں، تین سے 4اور بھی منحرف ارکان جانے والے ہیں۔

مشاہد حسین سید نے کبھی میاں صاحب پر ذاتی حملہ نہیں کیا

صوبائی وزیر قانون نے کہا کہ سینیٹر مشاہد حسین جب پہلے ن لیگ میں تھے تو میاں صاحب سے بڑا قریبی رابطہ تھا، بعد میں بھی مشاہد حسین سید نے کبھی میاں صاحب پر ذاتی حملہ نہیں کیا، مشاہد حسین سید کو دوبارہ پارٹی میں آنا چاہئے تھا۔

---

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔