کراچی: بہن پر تیزاب پھینکنے اور بیٹوں کو زخمی کرنے کے جرم میں ملزم کو 14 سال قید کی سزا سنادی گئی اور 10 لاکھ روپے جرمانہ عائد کردیا۔
تفصیلات کے مطابق ایڈیشنل سیشن جج جنوبی/جینڈر بیسڈ وائلنس کورٹ نے منظور کالونی میں تیزاب گردی کے کیس کا فیصلہ سناتے ہوئے ملزم محمد رمضان کو جرم ثابت ہونے پر 14 سال قید اور 10 لاکھ روپے جرمانے کی سزا سنادی۔
عدالت نے فیصلے میں کہا کہ ملزم متاثرہ خاتون کو 50 ہزار روپے ہرجانہ ادا کرے، جبکہ متاثرہ خاتون کے دو بیٹوں کو زخمی کرنے پر ملزم کو الگ الگ 4، 4 سال قید کی سزا بھی دی گئی ہے۔
عدالت نے دونوں بیٹوں کو مجموعی طور پر 4 لاکھ روپے ہرجانہ ادا کرنے کا بھی حکم دیا۔
استغاثہ نے بتایا کہ ملزم محمد رمضان نے 2022 میں اپنی بہن پر تیزاب پھینکا تھا۔ بعدازاں اس نے خاتون کا پیچھا کیا اور گھر کے باہر دوبارہ تشدد کا نشانہ بنایا۔ بچاؤ کے لیے آنے والے بیٹوں پر بھی ملزم نے چھری سے حملہ کیا تھا، جس سے وہ زخمی ہوگئے تھے۔