Tag: 14/ 8 /2025

اسلام آباد / لاہور / کراچی (14 اگست 2025) ملک بھر میں رات کے 12 بجتے ہی جشن آزادی کا آغاز کردیا گیا، عوام بڑی تعداد میں مختلف شاہراہوں پر آزادی کا جشن منانے نکل آئے۔

پاکستان کے 78ویں جشن آزادی کا رنگا رنگ آغاز ہوگیا ہے، وطن عزیز کے مختلف علاقوں میں آتش بازی کا شاندار مظاہرہ کیا جارہا ہے۔

کراچی میں فائیواسٹار چورنگی پر یوم آزادی معرکہ حق کی کامیابی پر جشن کا سلسلہ شروع کردیا گیا، اس موقع پر چیئرمین ایم کیوایم خالد مقبول صدیقی، انیس قائم خانی، فاروق ستارو دیگر موجود ہیں۔

تقریب میں میوزیکل فیسٹیول جاری، معروف فنکار شرکاء کا لہو گرما رہے ہیں، عوام کی بڑی تعداد نارتھ ناظم آباد فائیواسٹار چورنگی پر موجود ہے، فائیو اسٹار اوور ہیڈ برج پر بھی شہریوں کی بڑی تعداد میں سبزہلالی پرچم کے ساتھ جمع ہوگئی

لاہور میں حکومت پنجاب کے تحت لبرٹی گول چکر پر میوزیکل کنسرٹ کا اہتمام کیا گیا، شہریوں کی بڑی تعداد موجود ہے، شرکاء ملی نغموں کے ساتھ پاک فوج زندہ باد کے نعرے لگاتے رہے
شہریوں کا کہنا ہے کہ اس بار بھارت سے جنگ جیتنے کے بعد آزادی کا جشن منانے کا الگ ہی مزہ ہے۔

پشاور میں بھی رات 12 بجتے ہی جشن آزادی کے موقع پر زبردست آتش بازی کا شاندار مظاہرہ کیا گیا۔

اس کے علاوہ کراچی، لاہور، پشاور، مظفرآباد، گلگت سمیت ملک کے طول و عرض میں گھروں سے باہر نکل آئے اور پاکستان کے زندہ باد کے نعرے بلند کیے۔