کابل: افغانستان میں طالبان نے ایک خود کش حملے میں 10 پولیس اہلکاروں سمیت 14 افراد کو ہلاک کردیا طالبان نے بڑی کارروائی کرتے ہوئے لشکرگاہ شہر کے کچھ حصوں پر قبضہ بھی کر لیا۔
تفصیلات کے مطابق افغانستان کے صوبے ہلمند کے دارالحکومت لشکرگاہ پر افغان طالبان نے بڑا حملہ کیا ہے جبکہ ایک خودکش حملے میں 10 پولیس اہلکاروں سمیت 14 افراد ہلاک ہوگئے۔
برطانوی نشریاتی ادارے بی بی سی کے مطابق افغان طالبان کی جانب سے حالیہ کارروائی شہر پر دھاوا بولنے کی اب تک کی سب سے بڑی کارروائی ہے۔
لشکرگاہ اسٹریٹیجک اہمیت کا حامل شہر ہے اور اس کی آبادی تقریبا دو لاکھ سے زائد ہے۔
اطلاعات کے مطابق طالبان نے شہر کے مرکزی علاقے کے قریب بولان کے علاقے اور شہر کے داخلی علاقے ناوا کا کنٹرول حاصل کر لیا ہے۔ لڑائی کے باعث حکام کی جانب سے شہر کا ہوائی اڈہ بھی بند کر دیا گیا ہے۔
