کراچی: سندھ حکومت نے کرونا کیسز میں مسلسل اضافے کے باعث صوبے بھر میں لاک ڈاؤن میں 15 دن کی توسیع کر دی۔
تفصیلات کے مطابق کرونا وائرس کے پھیلاؤ کو روکنے کے لیے سندھ حکومت نے لاک ڈاؤن میں 15 دن کی توسیع کر دی۔محکمہ داخلہ سندھ کی جانب سے جاری نوٹیفکیشن میں کہا گیا ہے کہ 15 جولائی تک صوبے میں لاک ڈاؤن رہے گا۔
محکمہ داخلہ سندھ کے مطابق لاک ڈاؤن پابندیوں کے تحت تعلیمی ادارے بند رہیں گے، کاروباری مراکز شام 7 بجے تک کھلے رکھے جا سکیں گے جبکہ عوامی، تفریحی مقامات پر آمدورفت کی پابندی برقرار رہے گی۔
محکمہ داخلہ کی جانب سے جاری حکم نامے میں کہا گیا ہے کہ شادی ہالز، تعلیمی ادارے اور ریسٹورنٹ بند رہیں گے،ہوم ڈیلیوری رات 11بجے تک ہوگی۔
سندھ میں کرونا کے مزید 2139 نئے کیسز سامنے آگئے: وزیراعلیٰ
اس سے قبل وزیراعلیٰ سندھ مراد علی شاہ کا کہنا تھا کہ سندھ میں چوبیس گھنٹوں کے دوران کروناوائرس کے مزید 2139 مثبت کیسز رپورٹ ہوئے اور 29 مریض انتقال کرگئے۔
سندھ میں کرونا کے باعث اموات کی تعداد 1406ہوگئی، اس وقت 36803 مریض زیرعلاج ہیں، زیر علاج مریضوں میں 35131 گھروں اور 158 آئسولیشن سینٹرز میں ہیں، اس وقت 1514 مریض مختلف اسپتالوں میں زیر علاج ہیں۔
