ARYNews.tv | Urdu – Har Lamha Bakhabar

Tag: 15 people killed

  • تارکین وطن کی ایک اور کشتی کو خوفناک حادثہ ، درجنوں ہلاکتوں کا خدشہ

    تارکین وطن کی ایک اور کشتی کو خوفناک حادثہ ، درجنوں ہلاکتوں کا خدشہ

    موریطانیہ کے دارالحکومت نواکچوٹ کے قریب سینکڑوں مسافروں سے بھری کشتی الٹنے سے کم از کم 15 افراد ہلاک اور 150 سے زائد لاپتہ ہیں۔

    غیر ملکی خبر رساں ادارے کی رپورٹ کے مطابق حادثہ گیمبیا کی سمندری حدود ماریطانیہ کے ساحل کے قریب پیش آیا۔

    انٹرنیشنل آرگنائزیشن فار مائیگریشن نے بتایا ہے کہ کشتی 300 سے زیادہ مسافروں کو لے کر اسپین جانے کیلئے افریقی ملک گیمبیا سے روانہ ہوئی تھی اور 7 روز سمندر میں گزارنے کے بعد تارکین وطن کی کشتی 22 جولائی کو حادثے کا شکار ہوگئی۔

    Migrants

    مغربی افریقہ کے ساحل سے کینری جزائر تک بحر اوقیانوس کی نقل مکانی کا راستہ عام طور پر اسپین جانے کی کوشش کرنے والے افریقی تارکین وطن استعمال کرتے ہیں جو دنیا کے خطرناک ترین راستوں میں سے ایک ہے۔

    ایک بیان میں آئی او ایم نے کہا کہ موریطانیہ کے کوسٹ گارڈ نے 120 افراد کو زندہ بچا لیا ہے اور ان میں سے 10 کو فوری طور پر ہسپتالوں میں منتقل کر دیا گیا ہے جبکہ لاپتہ افراد کی تلاش تاحال جاری ہے۔

    Mauritania

    واضح رہے کہ افریقی ممالک کے شہریوں کی اکثریت غربت، بیروزگاری اور لاقانونیت کے باعث ہر سال ہزاروں کی تعداد میں ملک سے نکلنے کیلئے کشتیوں پر غیرقانونی سفر کرکے بیرون ملک جانے کی کوشش کرتے ہیں۔

    مزید پڑھیں : تارکین وطن کی کشتی میں آتشزدگی، 40 افراد ہلاک

    یاد رہے کہ چند روز قبل ہیٹی میں تارکین وطن کی ایک کشتی میں آگ لگنے سے 40 افراد ہلاک ہوگئے تھے۔ کشتی میں کُل 81 افراد سوار تھے جن میں سے 40 افراد اپنی جان گنوا بیٹھے جبکہ 41 افراد کو ریسکیو کرلیا گیا ہے۔

    انٹرنیشنل آرگنائزیشن فار مائیگریشن کے مطابق تارکین وطن کی کشتی کو حادثہ ہیٹی سے ٹرکس اور کایکوس (220 کلومیٹر دور) جزائر جانے کے دوران پیش آیا۔

  • کابل : پاکستانی سفارت خانے کے باہر بھگدڑ مچنے سے 15افراد جاں بحق

    کابل : پاکستانی سفارت خانے کے باہر بھگدڑ مچنے سے 15افراد جاں بحق

    کابل : جلال آباد میں پاکستان قونصل خانے کے قریب اسٹیڈیم میں بھگدڑ مچ گئی جس کے باعث 15افراد جاں بحق اور متعدد زخمی ہوگئے، ہلاک ہونے والے افراد ویزا کے حصول کیلئے موجود تھے۔

    تفصیلات کے مطابق افغانستان کے شہر جلال آباد میں پاکستانی سفارت خانے کے قریب اسٹیڈیم میں اچانک بھگڈر مچ گئی، جس کے نتیجے میں 11خواتین سمیت 15افراد جاں بحق ہوگئے۔

    غیر ملکی خبر رساں ادارے کی رپورٹ میں کہا گیا ہے کہ پاکستانی قونصلیٹ کے باہر مذکورہ اسٹیڈیم میں ہزاروں افراد ویزے کی درخواست دینے کے لیے جمع ہوئے تھے۔

    ذرائع کے مطابق حادثہ اس وقت پیش آیاجب وہاں موجود لوگ باہر نکلنے کی کوشش کر رہے تھے تو اچانک بھگدڑ مچی اور افرا تفری میں کئی افراد ایک دوسرے پر گر کر کچلے گئے۔

    کابل : جلال آباد میں پاکستان قونصل خانے کی انتظامیہ نے اسٹیڈیم میں بھگدڑ سے جانوں کے ضیاع پر افسوس کا اظہار کیا ہے ترجمان کا کہنا ہے کہ کابل میں پاکستانی سفارتخانے سے ویزوں کا اجرا جاری رہے گا۔

    اپنے جاری بیان میں سفارت خانے کے ترجمان نے کہا کہ جلال آباد ،مزارشریف، قندھار اور ہرات میں تمام سفارت خانے اپنا کام بدستور جاری رکھیں گے، افغانیوں کو کاروبار، تعلیم، طبی بنیادوں اور خاندان سے ملنے کیلئے ویزے جاری کیے جاریے ہیں۔

    واضح رہے کہ پاکستانی سفارتخانہ نے افغان عوام کی سہولت کیلئے ملٹی پل انٹری ویزہ دینے کا اعلان کر رکھا ہے،  پاکستانی قونصل خانے نے سات مہینے کے وقفے کے بعد ایک ہفتہ پہلے ویزے کے اجراء کا سلسلہ شروع کیا تھا۔

     

  • طوفانی بارشوں سے15افراد جاں بحق اور31زخمی،500سے زائد مکانات تباہ

    طوفانی بارشوں سے15افراد جاں بحق اور31زخمی،500سے زائد مکانات تباہ

    اسلام آباد : ملک بھرمیں ہونے والی طوفانی بارشوں سے اب تک 15افراد جاں بحق اور31زخمی ہوگئے، سب سے زیادہ جانی ومالی نقصان بلوچستان میں ہوا۔

    تفصیلات کے مطابق نیشنل ڈیزاسٹر مینجمنٹ اتھارٹی (این ڈی ایم اے) نے ملک بھر میں ہونے والی حالیہ طوفانی بارشوں اور برفباری سے جانی ومالی نقصان سے متعلق رپورٹ جاری کی ہے۔

    رپورٹ میں کہا گیا ہے کہ بارشوں کےباعث15افراد جاں بحق اور31افراد زخمی ہوئے ہیں، بارشوں کے باعث سب سے زیادہ نقصان صوبہ بلوچستان میں ہوا۔

    این ڈی ایم اے رپورٹ کے مطابق بلوچستان میں نو افراد جاں بحق ہوئے اور500سے زائد مکانات منہدم ہوئے جبکہ فاٹا میں چار اور خیبر پختونخوا میں دو افراد جاں بحق ہوئے۔

    اس کے علاوہ مختلف علاقوں میں درجنوں دکانیں تباہ ہوئیں، رپورٹ میں بتایا گیا ہے کہ جاں بحق افراد کا تعلق ٹانک اور چارسدہ سے ہے، متاثرہ علاقوں میں ریسکیو آپریشن جاری ہے۔

    ہیوی مشینری بھی پہنچا دی گئی ہے، کھانے پینے کے دس ہزار پیکٹس متاثرہ افراد تک پہنچا دیئے گئے، امدادی ٹیمیں اور متعلقہ ادارےہائی الرٹ ہیں۔

  • نیروبی کے فائیو سٹار ہوٹل پر دہشت گردوں کا حملہ، 15 افراد ہلاک

    نیروبی کے فائیو سٹار ہوٹل پر دہشت گردوں کا حملہ، 15 افراد ہلاک

    نیروبی : کینیا کے دارالحکومت میں واقع ایک فائیو سٹار ہوٹل پر دہشت گردوں کے حملے میں 15 افراد ہلاک جبکہ متعدد زخمی ہوگئے۔

    تفصیلات کے مطابق افریقی ملک کینیا کے دارالحکومت نیروبی کے ضلع ویسٹ لینڈ میں واقع ڈوسٹ ڈی 2 نامی پُر تعیش ہوٹل پر منگل کے روز دہشت گردوں نے حملہ کرکے متعدد افراد کو قتل کردیا۔

    نیروبی پولیس چیف کا کہنا ہے کہ دہشت گرد ابھی بھی عمارت کے اندر موجود ہیں تاہم سیکیورٹی فورسز نے سات منزلہ عمارت کی چھ منزلیں دہشت گردوں سے خالی کروالی لی ہیں۔

    مقامی خبر رساں ادارے کا کہنا ہے کہ تقریباً تمام لوگوں کو ہوٹل سے نکال لیا گیا ہے جبکہ 100 افراد بدھ کی صبح عمارت سے ریسکیو کیا گیا تھا۔

    غیر ملکی خبر رساں ادارے کا کہنا ہے کہ ہوٹل پر دہشت گردانہ حملے کی ذمہ داری صومالیہ کی دہشت گرد تنظیم الشباب نے قبول کی ہے۔

    کینین حکام کا کہنا ہے کہ ہوٹل کا محاصرہ ختم ہوگیا لیکن سیکیورٹی فورسز کا آپریشن جاری ہے اور وقفے وقفے سے فائرنگ کا تبادلہ ہورہا ہے جبکہ مسلسل دھماکوں کی آوازیں بھی آرہی ہیں۔

    پولیس ذرائع کا کہنا ہے کہ دہشت گردانہ حملے میں 15 افراد لقمہ اجل بنے ہیں لیکن سرکاری ذرائع نے تاحال ہلاک ہونے والوں کی تعداد کی تصدیق نہیں کی ہے۔

    سرکاری ذرائع کا کہنا ہے کہ حملے میں 30 افراد زخمی ہوئے ہیں جنہیں قریبی اسپتال منتقل کردیا گیا تھا جہاں انہیں طبی امداد فراہم کی جارہی ہے۔

    مزید پڑھیں : کینیا کے اسکول میں فائرنگ‘ 6 بچوں سمیت 7 افراد ہلاک

    مزید پڑھیں : صومالیہ میں کینیا کی فوج کا آپریشن،الشباب کے 52 جنگجو ہلاک

    برطانوی میڈیا کے مطابق امریکی محکمہ داخلہ نے نیروبی ہوٹل حملے میں ایک امریکی شہری کے ہلاک ہونے کی تصدیق کی ہے۔

     

    اس حملے کا آغاز اس وقت ہوا جب 101کمروں کے ہوٹل، ایک ریسٹورنٹ اور متعدد دفاتر پر مشتمل ڈوسٹ ڈی 2 کمپلیکس میں ایک زوردار دھماکا ہوا جس کی آواز پانچ کلو میٹر دور تک واضح طور پر سنی گئی۔

  • کویت: 2 بسوں میں تصادم 3 پاکستانیوں سمیت 15 افراد جاں بحق

    کویت: 2 بسوں میں تصادم 3 پاکستانیوں سمیت 15 افراد جاں بحق

    کویت سٹی: کویت میں 2 بسوں میں تصادم کے نتیجے میں 3 پاکستانیوں سمیت 15 افراد جاں بحق جبکہ 3 افراد زخمی ہوگئے۔

    غیر ملکی خبر رساں ادارے کے مطابق کویت کے جنوبی علاقے ہرجان آئلد فیلڈ کے قریب دو بسوں میں تصادم ہوا جس کے نتیجے میں 15 افراد جاں بحق ہوگئے، بسیں آئل کمپنی کے ملازمین کو لے کر جارہی تھیں جبکہ حادثے میں تین افراد زخمی بھی ہوئے۔

    رپورٹ کے مطابق حادثے میں جاں بحق ہونے والوں میں 7 بھارتی، 5 مصری اور تین پاکستانی شہری شامل ہیں، جبکہ زخمی ہونے والوں میں 2 بھارتی اور ایک کویت کا مقامی شہری شامل ہے، زخمیوں کی حالت تشویشناک بتائی جاتی ہے۔

    حادثے میں زخمی ہونے والوں کو فوری طور پر طبی امداد کے لیے اسپتال منتقل کردیا گیا، کویت فائر سروس ڈائریکٹر کا کہنا ہے کہ حادثے کے فوری بعد ہی امدادی ٹیمیں جائے وقوعہ پر پہنچ گئی تھیں لیکن پھر بھی 4 افراد کو بسیں کاٹ کر نکالنا پڑا۔

    دوسری جانب کویت آئل کمپنی کے ترجمان کا کہنا ہے کہ بسوں میں کمپنی کے کنٹریکٹ ملازمین سوار تھے اور حادثے کی مکمل تحقیقات کرائی جائیں گی۔

    مزید پڑھیں: ترکی بس حادثے میں پاکستانیوں سمیت 17 افراد جاں بحق

    واضح رہے کہ چند روز قبل ترکی کے شہر اجدیر میں غیر قانونی تارکین وطن کی بس حادثے کا شکار ہوگئی تھی جس کے نتیجے میں پاکستانیوں سمیت 17 افراد جاں بحق ہوگئے تھے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔