اسلام آباد : سانحہ آرمی پبلک اسکول (اے پی ایس) کو 10 سال بیت گئے لیکن سفاک دہشت گردوں کے لگائے گئے زخم آج بھی تازہ ہیں۔
تفصیلات کے مطابق آرمی پبلک اسکول پشاور کے سانحے کو دس سال بیت گئے، پھولوں کے شہر میں پھول سے بچوں پر سفاک دہشت گردوں کے لگائے گئے زخم آج بھی تازہ ہیں۔
16 دسمبر 2014 کا درد ہر والدین اور پوری قوم کا درد ہے ، ایسا سانحہ جس نے نہ صرف پاکستانی قوم بلکہ پوری دنیا کو دہلا کر رکھ دیا۔
مسلح دہشت گردوں نے معصوم بچوں اوراستادوں کو نشانہ بنایا اور 132 بچوں سمیت ڈیڑھ سو افراد کو شہید کیا۔
دہشت گردوں کو افغانستان میں ٹریننگ دی گئی تھی، یہ آتشیں ہتھیار بھی افغانستان سے لےکرآئےتھے، سولہ دسمبر 2014کو سفاک دہشت گرد صبح 11 بجے اسکول میں داخل ہوئے اور معصوم بچوں پر اندھا دھند فائرنگ شروع کردی اور بچوں کو چن چن کر قتل کیا۔
تھوڑی ہی دیر میں پاک فوج کے جوان اسکول پہنچے اور ساتوں دہشت گردوں کو مار گرایا، اس کرب ناک دن کے اختتام پر پشاور کی ہر گلی سے جنازہ اٹھا، ڈیڑھ سو کے قریب شہادتوں نے پھولوں کے شہر کو آہوں اور سسکیوں میں ڈبو دیا۔
اسی دن نے پاکستان میں دہشت گردی کے خلاف فیصلہ کن کارروائی کی بنیاد رکھی اور ملک بھر میں شدت پسندوں کے خلاف آپریشن کا آغاز کیا گیا۔
دہشتگرد مسلسل افغانستان کی سرزمین کو استعمال کرتےہوئے پاکستان کے معصوم شہریوں کونشانہ بناتےہیں، آج بھی پاکستان کی افواج اور عوام افغانستان کےدہشتگردوں سے نبردآزما ہیں۔.
ایک بارپھرپوری قوم کومل کر ان دہشت گردوں کا مقابلہ کرنا ہوگا تاکہ پاک سرزمین کو سب کے لیے محفوظ اور جنت نظیربنایا جا سکے۔
