کراچی : رینجرز اہلکاروں نے جرائم پیشہ افراد کی گرفتاری کیلئے کراچی کے مختلف علاقوں میں چھاپے مار کر 17افراد کو گرفتار کرلیا، ملزمان سے اسلحہ و منشیات برآمد کرلی گئی۔
تفصیلات کے مطابق قانون نافذ کرنے والے ادارے نے شہر قائد کے مختلف علاقوں میں کارروائیاں کرتے ہوئے جرائم میں ملوث17 ملزمان کو گرفتار کرلیا۔
ملزمان کے قبضے سے اسلحہ اور مسروقہ سامان برآمد کرلیا گیا، سندھ رینجرز کے ترجمان کی جانب سے جاری ہونے والے اعلامیے کے مطابق حالیہ کارروائیاں عوامی کالونی، کورنگی، درخشاں، گلستانِ جوہر، شریف آباد اور سعید آباد کے علاقوں میں کی گئیں۔
گرفتار ملزمان منشیات فروشی، ڈکیتی اوراسٹریٹ کرائم کی درجنوں وارداتوں میں ملوث ہیں، گرفتار ملزمان میں احمد علی، منصب علی، شاہد علی چانڈیو، عامر عرف لاہوتی، جنید، نعمان زیدی عرف پٹھان اور اویس علی عرف مظہر شامل ہیں۔
اس کے علاوہ اویس علی، اویس، ارباز، ماکو، عدنان، زریاب عمرعرف مونی، ساجد اور شہزاد نامی ملزمان کو بھی حراست میں لیا گیا ہے۔
ترجمان رینجرز کا کہنا ہے کہ بلوچ کالونی سے گرفتار ہونے والے عقیل، آفتاب منشیات فروشی کے کاروبار میں ملوث ہیں۔
