Tag: 18 نومبر وفات

پرویز ملک اُن ہدایت کاروں میں‌ سے ایک تھے جنھوں نے اپنی فلموں کے لیے منفرد موضوعات کا چناؤ کیا، اور موسیقی اور شاعری پر خاص توجہ دی۔ انھوں نے پاکستانی فلم انڈسٹری کو متعدد کام یاب فلمیں دیں جو ان کی فنی مہارت اور کمال کی یادگار ہیں۔

پرویز ملک 1937ء کو پیدا ہوئے تھے اور 2008 میں‌ آج ہی کے دن وفات پائی۔ وہ پاکستانی فلموں کے چاکلیٹی ہیرو اور مقبول ترین اداکار وحید مراد کے ہم جماعت تھے۔ پرویز ملک ابتدائی تعلیم مکمل کرنے کے بعد امریکا چلے گئے جہاں انھوں نے فلم سازی کی تعلیم اور تربیت حاصل کی اور 1963ء میں وطن واپس آئے۔ یہاں اس وقت ان کے دوست اپنے والد کے فلمی ادارے کے تحت کام شروع کرچکے تھے جس میں پرویز ملک بھی شامل ہوگئے اور ہیرا اور پتھر، ارمان اور احسان جیسی کام یاب فلمیں بنائیں۔

پرویز ملک کی ہدایت کاری میں بننے والی فلموں کو ناقدین اور شائقین دونوں کی طرف سے بہت پزیرائی ملی۔ پہچان، تلاش، پاکیزہ، انتخاب، ہم دونوں، دوراہا اور غریبوں کا بادشاہ جیسی فلمیں پرویز ملک ہی کی یادگار ہیں۔

پرویز کی تین فلموں گمنام، کام یابی اور غریبوں کا بادشاہ) کو اس وقت ٹیکس سے مستثنٰی قرار دیا گیا تھا۔ فلمی صنعت کے لیے ان کے کام اور خدمات پر انھیں صدارتی تمغہ برائے حسنِ کارکردگی‎ سے بھی نوازا گیا۔ پرویز ملک کو فلمی صنعت کے لیے ان کے منفرد کام اور فلموں کی بدولت مدتوں یاد رکھا جائے گا۔

سن 1953ء تک علی بخش ظہور نے گلوکار کی حیثیت سے پاکستانی فلم انڈسڑی کو کئی مقبول گیت دیے۔ منوّر سلطانہ کے ساتھ ان کے دوگانے اس زمانے میں‌ بہت مقبول ہوئے۔ وہ اپنے وقت کے نام وَر غزل گائیک تھے جو 18 نومبر 1975ء کو وفات پاگئے۔ آج علی بخش ظہور کی برسی ہے۔

وہ 11 مئی 1905ء کو پیدا ہوئے تھے۔ استاد برکت علی گوٹے والے کے شاگرد ہوئے اور بعد میں استاد عاشق علی خان سے اکتسابِ فن کیا۔ علی بخش ظہور قیامِ پاکستان سے پہلے سے ریڈیو پر اپنے فنِ گائیکی کا مظاہرہ کرتے رہے تھے۔ وہ ٹھمری، غزل، گیت اور کافیاں گانے کے لیے مشہور تھے۔

پاکستان ہجرت کرنے کے بعد انھوں‌ نے فلم انڈسٹری سے ناتا جوڑا اور یہاں کئی فلموں کے نغمات ان کی آواز میں ریکارڈ ہوئے۔ پاکستان کی پہلی فلم تیری یاد کے لیے بھی علی بخش ظہور نے گانا ریکارڈ کروایا تھا۔

ان کے دور میں منوّر سلطانہ بھی فلم نگری کی ایک کام یاب گلوکارہ تھیں جن کے ساتھ ان کے گائے ہوئے دوگانے بہت مشہور ہوئے۔ فلم بے قرار کے لیے منور سلطانہ کے ساتھ ان کا گایا ہوا نغمہ ”دل کو لگا کے کہیں ٹھوکر نہ کھانا، ظالم زمانہ ہے یہ ظالم زمانہ” بہت پسند کیا گیا۔

اس وقت فلم انڈسٹری میں نئے اور متحدہ ہندوستان کے باکمال موسیقاروں اور گلوکاروں‌ کی آمد کا سلسلہ جاری تھا جن میں عنایت حسین بھٹی بھی شامل تھے انھوں نے پاکستان کی فلم انڈسٹری میں‌ قدم رکھا تو فلم ساز اور موسیقار ان کی جانب متوجہ ہوگئے اور یوں علی بخش ظہور کو فلم انڈسٹری سے دور ہونا پڑا۔

علاّمہ شبلی نعمانی کے اسلوبِ نگارش کا یہی طرّۂ امتیاز ہے کہ انھوں نے خشک اور بے کیف موضوعات میں بھی انشا پردازی سے ایسی شان پیدا کردی کہ اُن کی تحریریں دلآویز اور دل نشیں اور اثر انگیز ہوگئیں۔

انھیں اردو تنقید کے بانیوں میں نمایاں مقام حاصل ہے شبلی نعمانی ایک مؤرخ، محقّق، ادیب اور شاعر تھے۔ سیرت و سوانح نگاری ان کا خاص میدان تھا۔ وہ ایک عالمِ دین اور مفکّر کی حیثیت سے مشہور ہوئے۔

علّامہ شبلی نعمانی کو ان کی تصانیف اور ندوۃُ العلما کے قیام کی کوششوں کے سبب ہندوستان میں بڑی شہرت ملی۔ دارُالمصنّفین، شبلی اکیڈمی ایک علمی و تحقیقی ادارہ ہے جو علّامہ شبلی نعمانی کا خواب تھا، لیکن وہ اس کی عملی صورت دیکھنے سے پہلے ہی دنیا سے چلے گئے۔ وہ اعظم گڑھ میں آسودۂ خاک ہیں۔ 18 نومبر 1914ء کو جہانِ علم و ادب کا یہ تابندہ ستارہ ہمیشہ کے لیے ڈوب گیا۔ آج شبلی نعمانی کی برسی ہے۔

ان کا اصل نام محمد شبلی تھا۔ حضرت امام ابو حنیفہ کی نسبت کو اپنے لیے باعثِ برکت و اعزاز جانتے ہوئے انھوں نے اپنا نام شبلی نعمانی رکھا۔ 1857ء میں اعظم گڑھ کے ایک نواحی قصبے میں پیدا ہوئے۔ ان کی تربیت نہایت عمدہ ماحول میں ہوئی اور اپنے دور کی اعلیٰ ترین درس گاہوں میں تعلیم حاصل کی۔

شبلی نے اپنے وقت کے جیّد علما سے فارسی، عربی حدیث و فقہ اور دیگر اسلامی علوم کی تحصیل کے بعد ایک ملازمت اختیار کی اور بعد میں وکالت کا پیشہ اپنایا، لیکن ناکام رہے اور پھر علی گڑھ میں سر سیّد کے کالج میں عربی کے معلّم کی ملازمت اختیار کرلی۔ یہاں وہ سرسیّد کے بہت قریب آگئے اور یہیں سے شبلی کی کام یابیوں کا سفر شروع ہوا۔

علاّمہ شبلی کے دل میں حمیّتِ اسلامی کا جو دریا موجزن تھا، اُس سے مغلوب ہوکر انھوں نے ’المامون‘، ’الفاروق‘، ’سیرۃ النبی‘ جیسی بلند پایہ کتب تصنیف کیں، سرسیّد احمد خان اور دیگر اہلِ علم و فن کی صحبت نے شبلی کی فکر کو وسعت دی اور ان کے ذوق کو نکھارا اور وہ اپنے ہم عصروں میں ممتاز ہوئے۔

شبلیؔ نے اس زمانے میں‌ مغربی تہذیب اور یورپ کے کارناموں کا شور سننے والوں کو تاریخِ اسلام کے تاب ناک پہلوؤں سے متعارف کرایا اور انھیں ان کی عظمتِ رفتہ کا احساس دلانے کی کوشش کی اور اس سلسلے میں عالمِ اسلام کی نام وَر شخصیات کی سیرت و سواںح، علم و فنون کے تذکرے کو کتابی شکل میں جامع و مستند معلومات کے ساتھ اپنے سحر انگیز اسلوب میں قارئین تک پہنچایا۔

سیرت النّبی ان کی وہ تصنیف ہے جس کا بہت شہرہ ہوا، لیکن شبلی کی زندگی میں اس کی صرف ایک جلد ہی شایع ہوسکی تھی۔ اس کام کو ان کے ایک لائق شاگرد سید سلیمان ندوی نے پایۂ تکمیل تک پہنچایا۔ علّامہ شبلی نعمانی کی دیگر تصانیف میں شعرُ العجم، موازنۂ انیس و دبیر اور الغزالی بہت مشہور ہیں۔