اسلام آباد : 190ملین پاؤنڈ اسکینڈل میں پی ٹی آئی رہنما زلفی بخاری اور شہزاد اکبر نے نیب میں پیش ہونے سے معذرت کر لی۔
تفصیلات کے مطابق پی ٹی آئی رہنما زلفی بخاری و دیگر کے خلاف 190 ملین پاؤنڈ کی غیرقانونی منتقلی کی نیب انویسٹی گیشن میں زلفی بخاری نےنیب میں پیش ہونے سے معذرت کر لی۔
زلفی بخاری نے نیب کو تحریری جواب جمع کرادیا، جس میں کہا ہے کہ نیب کاکال اپ نوٹس موصول ہونے کی اطلاع آج ملی، بیرون ملک ہونےکےباعث پیش نہیں ہوسکتا۔
دوسری جانب 190ملین پاؤنڈ اسکینڈل میں پی ٹی آئی رہنما شہزاد اکبر نے بھی نوٹس پر نیب کو تحریری جواب دے دیا اور ذاتی حیثیت میں پیشی سے پھر معذرت کرلی۔
جواب میں کہا کہ تین بار پہلے خط لکھ کر ویڈیو لنک پر بیان کی پیشکش کر چکا،پاکستانی سفارتخانے میں بھی بیان قلمبند کروانے پر رضامندی دکھائی، اب بھی ویڈیو لنک پر بیان قلمبند کروانے کو تیار ہوں۔
شہزاد اکبر کا کہنا تھا کہ میں اب پاکستان میں نہیں رہتا ہوں،میں اب قانونی طور پر برطانیہ کا رہائشی ہوں،پاکستان کے میرے ایڈریس اب میرے نہیں ہیں، نیب نوٹس کا میڈیا سے پتہ چلا۔
انھوں نے کہا کہ زندگی کو خطرات ہیں،برطانیہ کا ایڈریس شیئر نہیں کر سکتا،نیب نے جو بھی نوٹس بھیجنا ہوای میل کرے۔
شہزاد اکبر نے جواب میں اپنے بھائی کے گھر چھاپےاوراغواکا بھی ذکر کرتے ہوئے کہا ہے کہ این سی اے نے کبھی رقم پاکستانی حکومت کو نہیں بھیجی، این سی اے پریس ریلیز میں کہہ چکی یہ سول سیٹلمنٹ ہے کوئی جرم نہیں، نیب میں ون ہائیڈ پارک پلیس کی تحقیقات پہلے سے جاری تھیں، حسن نواز نے ون ہائیڈ پارک 2007 میں 10.5ملین پاؤنڈ کا خریدا تھا۔
رہنما پی ٹی آئی کا کہنا تھا کہ نوازشریف کے وزیراعظم ہوتے مبینہ طور پر زبردستی یہ اضافی قیمت پر فروخت کیا گیا، نیب اس انکوائری کا اسٹیٹس پتہ کرے اور بتائے۔
