کراچی : انیس سوبانوے اور دوہزار پندرہ کے کرکٹ ورلڈکپ میں یوں تو کئی مشترکہ باتیں سامنے آئی ہیں، لیکن ایک ایسی بات سامنے آئی ہے جس نے سب کو حیران کردیا۔
انیس سو بانوے کے ورلڈکپ میں بھی قومی ٹیم کے ستارے گردش میں تھے ۔ پاکستانی ٹیم نے ایونٹ کا آغاز ہار سے کیا تھا۔ اورویسٹ انڈیز کے خلاف بری طرح مار کھائی تھی۔
لیکن گرتی پڑتی ٹیم نے ہمت نہ ہاری اور زمبابوے کے خلاف میچ جیت کر فتوحات کا آغاز کیا تھا اور پھر پیچھے مڑ کر نہ دیکھا۔
اس بار بھی اب تک حالات مختلف نہیں، منجدھار میں پھنسی قومی ٹیم نے ایونٹ کا آغاز بھی ہار سے کیا ہے اورزمبابوے کے خلاف پہلی جیت کا مزہ بھی چکھ لیا ہے۔
ایسا لگتا کہ کہیں یہ ملتے جلتے حالات پاکستان کو ایک اور ورلڈ کپ دلانے کی کوئی نوید تو نہیں سنا رہے، کیونکہ خواب دیکھنا توسب کا حق ہے، کہیں ایسا نہ ہو کہ ہمارا یہ خیال بس خیال ہی رہ جائے گا۔
