اسلام آباد : آئل اینڈ گیس ریگولیٹری اتھارٹی (اوگرا) نے یکم جولائی سے گیس مہنگی کرنے کی منظوری دے دی ہے، فیصلے کے مطابق گیس کے نرخ 74 فیصد تک بڑھائے جائیں گے۔
تفصیلات کے مطابق اوگرا نے گیس قیمت میں اضافے کیلئے سوئی گیس کمپنیوں کی درخواستوں پر فیصلہ جاری کردیا ہے۔
اوگرا نے یکم جولائی سے گیس74فیصد تک مہنگی کرنے کی سمری منظور کرلی جس کے مطابق سوئی ناردرن کیلئے گیس74.42فیصد مہنگی اور سوئی سدرن کیلئے گیس67.75فیصدمہنگی کرنے کی منظوری دی گئی ہے۔
اس کے علاوہ سوئی ناردرن کیلئے قیمت میں 406روپے28پیسے فی ایم ایم بی ٹی یو اضافہ اور سوئی سدرن کیلئے قیمت میں469روپے28پیسے فی ایم ایم بی ٹی یو اضافے کی منظوری دی گئی۔
فیصلے کے مطابق سوئی ناردرن کیلئے گیس کی موجودہ اوسط قیمت545روپے89پیسے فی ایم ایم بی ٹی یو ہے جبکہ سوئی ناردرن کیلئے گیس کی نئی قیمت952روپے17پیسے فی ایم ایم بی ٹی یو کی منظوری دی گئی ہے۔
ترجمان آئل اینڈ گیس ریگولیٹری اتھارٹی (اوگرا) کا کہنا ہے کہ سوئی سدرن کیلئے گیس کی موجودہ قیمت692روپے63پیسے ہے، سوئی سدرن کیلئے نئی قیمت1161روپے91پیسےفی ایم ایم بی ٹی یو ہوگی۔
واضح رہے کہ اوگرا کے اس فیصلے کا اطلاق وفاقی حکومت کی منظوری کے بعد ہوگا تاہم اگر موجودہ حکومت نے40روز کے اندر اضافے کی منظوری نہ دی تو اوگرا فیصلے پر ازخود عمل درآمد ہوجائے گا۔
