گوجرانوالہ: ایف آئی اے گوجرانوالہ زون نے جعلی ویزے بنانے والی فیکٹری پر کارروائی کے دوران 2 ملزمان کو گرفتار کر لیا۔
تفصیلات کے مطابق وفاقی تحقیقاتی ادارے (ایف آئی اے) گوجرانوالہ زون کی جانب سے انسانی اسمگلرز کے خلاف خفیہ اطلاع پر بڑی کارروائی کی گئی، شادمان کالونی میں چھاپے کے دوران 2 ملزمان کو گرفتار کر لیا گیا۔
ایف آئی اے ترجمان کا کہنا ہے کہ گرفتار ملزمان مختلف شہروں میں ایجنٹوں کے ذریعے شہریوں کو جعلی ویزے فراہم کرتے تھے، ملزمان جعلی پاسپورٹ، ویزا اسٹیکرز اور دیگر سفری دستاویزات بنانے میں ملوث ہیں۔
ترجمان کا بتانا ہے کہ ملزمان انسانی سمگلنگ میں ملوث بین الاقوامی نیٹ ورکس کا حصہ ہیں جب کہ چھاپے کے دوران ملزمان سے 20 پاکستانی اور 31 غیر ملکی پاسپورٹ بھی برآمد کیے گئے۔
ایف آئی اے ترجمان کا کہنا ہے کہ ملزمان سے جعلی ویزا اسٹیکرز کی تیاری میں استعمال ہونے والی مشینیں بھی برآمد ہوئیں، برآمد اسٹیکرز میں یورپ، چین، برطانیہ، امریکا، برازیل، انڈونیشیا، ترکی، سربیا، یونان، سویڈن، مالٹا، کروشیا، اسپین، پرتگال، یو اے ای کے جعلی ویزا اسٹیکرز شامل ہیں۔
ترجمان ایف آئی اے کے مطابق گروہ میں شامل افراد سادہ لوح شہریوں کو اپنے جال میں پھنساتے تھے، ملزمان کو گرفتار کر کے تفتیش کا آغاز کر دیا گیا جب کہ دیگر ملزمان کی گرفتاری کے لئے چھاپے مارے جا رہے ہیں۔
