Tag: 20 ستمبر وفات

ہندوستان میں سلطان غیاث الدین تغلق نے دہلی پر حکومت قائم کی تھی جس کے خاندان کا ایک مشہور حکم راں فیروز شاہ تغلق تھا۔ اس کا دور 1351ء سے شروع ہوا اور 1388ء میں‌ آج ہی کے دن اس کی وفات تک جاری رہا۔

وہ محمد تغلق کا چچا زاد بھائی تھا جس کی بیماری کے دوران فیروز شاہ نے اس کی خوب تیمار داری کی جس سے متاثر ہو کر محمد تغلق نے اسے اپنا جانشین نام زد کر دیا تھا۔ کہتے ہیں فیروز شاہ نے بھی محمد تغلق کے بعد ملک میں ابتری اور بد انتظامی کو بہت اچھے انداز سے ختم کر کے خود کو اس منصب کا اہل ثابت کر دکھایا۔

فیروز شاہ تغلق کے باپ کا نام سپہ سالار رجب تھا جو سلطان غیاث الدین تغلق کا بھائی تھا۔ فیروز شاہ سات سال کا تھا جب اس کے باپ کا انتقال ہو گیا تھا۔ اس کے بعد تغلق شاہ نے ہی اس کی تعلیم و تربیت اور پرورش کی۔

جب فیروز شاہ تخت نشین ہوا تو اس وقت وہ کوئی پچاس برس کا تھا۔ فیروز شاہ کو مؤرخین نے ایک عالم فاضل اور نیک انسان لکھا ہے۔ عدل اس کے کردار کی نمایاں خوبی تھی۔

فیروز شاہ نے 40 سال کے قریب حکم رانی کی اور بوقتِ وفات 90 سال کا تھا۔

بادشاہ کے خود تحریر کردہ حالات ایک کتاب میں موجود ہیں جو کہ فتوحات فیروز شاہی کے نام سے مشہور ہے۔

یوسف خان پاکستان فلم انڈسٹری کے صف اوّل کے اداکاروں میں سے ایک تھے جن کا آج یومِ‌ وفات ہے۔ وہ 20 ستمبر 2009ء کو اس جہانِ فانی سے ہمیشہ کے لیے رخصت ہوگئے۔

یوسف خان نے اردو اور پنجابی فلموں‌ میں اپنی اداکاری سے سنیما کے شائقین کو محظوظ کیا۔ انھوں نے اپنے کرداروں کو اس خوبی سے نبھایا کہ وہ یادگار ٹھہرے۔

یوسف خان 10 اگست 1931 کو مشرقی پنجاب کے شہر فیروز پور میں پیدا ہوئے۔ 1954 میں فلم ’’پرواز‘‘ سے انھوں نے اپنے فلمی کیریئر کا آغاز کیا۔ اس فلم میں مشہور اداکارہ صبیحہ خانم ان کی ہیروئن کے روپ میں‌ نظر آئیں۔ یوسف خان نے جن اردو فلموں میں‌ کام کیا ان میں‌ چند نام مجرم، حسرت، بھروسہ، فیصلہ اور نیا دور ہیں۔ بعد میں‌ وہ پنجابی فلموں‌ کی طرف متوجہ ہوئے اور ایک نئے انداز سے شائقین کے سامنے آئے۔

1962 میں فلم ’’پہاڑن‘‘ سے انھوں نے پنجابی فلموں میں‌ اداکاری شروع کی اور یہ سفر بہت کام یاب ثابت ہوا۔ یوسف خان نے پنجابی فلموں میں کئی یادگار کردار نبھائے۔ ان کی پنجابی فلموں میں ملنگی، یارانہ، بائو جی، ضدی، وارنٹ، ہتھکڑی، جگنی، شریف بدمعاش، قسمت، جبرو، خطرناک، حیدر خاں اور بڈھا گجر سرِفہرست ہیں۔

یوسف خان نے اپنی شان دار پرفارمنس پر کئی اعزازات بھی اپنے نام کیے۔ 2006 میں حکومت پاکستان نے انھیں صدارتی تمغہ برائے حسن کارکردگی عطا کیا۔ فلم نگری کا سب سے بڑا اور معتبر ایوارڈ نگار اور 1999 میں نگار ملینئم ایوارڈ بھی انھیں دیا گیا تھا۔

یوسف خان پاکستان میں بھارتی فلموں کی نمائش کے شدید مخالف تھے، اور اس پر ہر فورم پر آواز بلند کی، مگر بھارتی فلموں کی نمائش کا سلسلہ نہ رک سکا جس پر وہ نہایت دل گرفتہ تھے۔