تاریخ کے اوراق میں کرسٹوفر کولمبس کو ایک ایسا مہم جُو اور جہاز راں لکھا گیا ہے جو ذہین اور چالاک بھی تھا۔ یہی نہیں امریکا کی دریافت کا سہرا بھی اسی کے سَر ہے۔
مؤرخین متفق ہیں کہ وہ پہلا یورپی جہاز راں تھا جس نے پندرھویں صدی عیسوی میں امریکا دریافت کیا، لیکن اس پر شکوک و شبہات کا اظہار بھی کیا جاتا ہے اور کرسٹوفر کولمبس سے متعلق مشہور واقعات اور مختلف باتوں کی صحّت بھی مشکوک ہے۔
کولمبس 20 مئی 1506ء کو دنیا سے رخصت ہوگیا تھا۔ اس کا سنِ پیدائش 1451ء بتایا جاتا ہے۔ اٹلی کے شہر جینیوا (Genoa) میں پیدا ہونے والے کولمبس نے نوعمری ہی میں اسپین کے کیتھولک بادشاہوں کے دربار تک رسائی حاصل کر لی تھی۔ کولمبس کو بہادر اور ذہین شخص کہا جاتا ہے جس نے خود کو ایک مہم جُو کے طور پر متعارف کروایا۔ کولمبس نے شاہی سرپرستی میں بحرِ اوقیانوس کے چار بحری سفر مکمل کیے۔ کہا جاتا ہے کہ ایسے ہی ایک بحری سفر کے دوران کولمبس نے پہلی بار امریکا کی سرزمین پر قدم رکھا تھا۔
اس زمانے میں بادشاہت کے زیرِ اثر نو آبادیوں کا قیام اور سمندر کے راستے نئی منڈیوں تک رسائی حاصل کرکے تجارت کو فروغ دیا جارہا تھا۔ چناں چہ اسپین کے بادشاہوں نے کولمبس کو یہ ذمہ داری سونپی تھی۔
مشہور ہے کہ کرسٹوفر کولمبس 1492ء کو وسطی امریکا پہنچا تھا۔ یہ اکتوبر کا مہینہ اور تاریخ 12 تھی۔ اسی لیے براعظم امریکا کے متعدد ملکوں میں اسے "کولمبس ڈے” کے طور پر منایا جاتا ہے۔ لاطینی امریکا کے علاوہ اٹلی اور اسپین میں بھی کولمبس ڈے کا اہتمام کیا جاتا ہے۔ وہاں اسے تہذیبی اور ثقافتی یادگار کی حیثیت حاصل ہے، مگر اسی خطّے میں چند ملک میں نہ تو کولمبس کو یاد کیا جاتا ہے اور نہ ہی لوگ کولمبس ڈے مناتے ہیں۔ ان کا خیال ہے کہ کولمبس ایسی شخصیت نہیں جس کے لیے کوئی دن مخصوص کیا جائے اور اسے عزّت اور احترام سے یاد کیا جائے۔
اس مخالفت کی کئی وجوہ ہیں۔ بعض مؤرخین نے کولمبس سے متعلق اپنی کھوج اور تحقیق کے بعد جو واقعات تحریر کیے ہیں، وہ اسے ہیرو کے بجائے ایک ظالم، مفاد پرست اور سفاک شخص ظاہر کرتے ہیں۔ تاہم دنیا بھر میں کتابیں کولمبس کی کام یاب بحری مہمّات اور اس کے کارناموں سے بھری پڑی ہیں۔ تاہم صنف مارک ڈیر جیسے متعدد مصنّفین نے اسے ایک وحشی، ظالم اور غارت گر لکھا ہے۔ یہی نہیں بلکہ بعض مؤرخین کے مطابق امریکا کولمبس کی دریافت نہیں۔ اس نے کبھی اس سرزمین پر قدم نہیں رکھا۔
کولمبس کے مخالفین کے مطابق اس جہاز راں نے اپنی بحری مہمّات کے دوران جہاں بھی قیام کیا، وہاں مقامی لوگوں کی خدمات اور ان سے قیام و طعام کی سہولت حاصل کرنے کے باوجود انھیں نقصان پہنچایا۔ وہ لوگوں کو غلام بنالیا کرتا تھا، ان سے جبری مشقت لیتا، وہ اور اس کے ساتھی قبائلی عورتوں سے جنسی زیادتی کے مرتکب ہوئے۔ کولمبس اپنی مہمّات کے دوران قبائلیوں کو دھوکا دے کر ان کے زیورات اور سونا ہتھیا لیتا تھا۔ اس طرح کی کئی باتیں اور قصّے مشہور ہیں جو اس نام وَر مہم جُو کو بدقماش اور سفاک ثابت کرتے ہیں۔
