ARYNews.tv | Urdu – Har Lamha Bakhabar

Tag: 2021 T20 World Cup

  • آسٹریلیا نے ویسٹ انڈیز کو 8 وکٹوں سے شکست دے دی

    آسٹریلیا نے ویسٹ انڈیز کو 8 وکٹوں سے شکست دے دی

    ابوظبی: ٹی 20 ورلڈ کپ کے سپر 12 مرحلے کے میچ میں آسٹریلیا نے ویسٹ انڈیز کو باآسانی 8 وکٹوں سے شکست دے دی۔

    تفصیلات کے مطابق ابوظبی کے شیخ زید اسٹیڈیم میں کھیلے گئے میچ میں آسٹریلیا نے ویسٹ انڈیز کی جانب سے دیا جانے والا 158 رنز کا ہدف 16.1 اوورز میں 2 وکٹوں کے نقصان پر حاصل کرلیا۔

    اوپنر ڈیوڈ وارنر نے 56 گیندوں پر 89 رنز کی ناقابل شکست اننگز کھیلی ، ان کی اننگز میں 9 چوکے اور چار چھکے شامل تھے۔

    کپتان ایرون فنچ 9 رنز بنا کر آؤٹ ہوئے، مچل مارش نے 53 رنز کی ذمہ دارانہ اننگز کھیلی۔

    ویسٹ اندیز کی جانب سے اکائل حسین اور کرس گیل نے ایک، ایک وکٹ حاصل کی۔

    اس سے قبل ویسٹ انڈیز نے پہلے بیٹنگ کرتے ہوئے مقررہ اوورز میں 7وکٹوں کے نقصان پر 157رنز بنائے اور آسٹریلیا کو جیت کیلئے 158رنز کا ہدف دیا تھا۔

     

    View this post on Instagram

     

    A post shared by ICC T20 World Cup (@t20worldcup)

    ویسٹ انڈیز کی طرف سے کیرون پولارڈ شاندار 44 رنز بنا کر نمایاں رہے جبکہ شمرون 27 رنز بنانے میں کامیاب ہوئے۔

    ویسٹ انڈیز کی جانب سے کرس گیل اور ایون لیوس نے میدان میں اتر کر کھیل کا آغاز کیا ۔ کرس گیل نے 9 گیندوں پر 15 رنز بنائے اور کیومنز کی گیند پر ان سائیڈ ایج کے ذریعے بولڈ ہو گئے۔

     

    View this post on Instagram

     

    A post shared by ICC (@icc)

    ان کے ساتھ آنے والے ایون لیوس نے 26 گیندوں پر 29 رنز کی اننگ کھیلی اور زمپا کی گیند پر اسمتھ کے ہاتھوں کیچ آوٹ ہو کر پولین لوٹ گئے۔ ان کے علاوہ شمرون 27 رنز اور ڈوائن براوو 10 اسکور بنانے میں کامیاب ہوئے اور باؤنڈری کے قریب کیچ آوٹ ہوگئے۔

    آسٹریلیا کی ٹیم میں ڈیوڈ وانر، ایرون فنچ، مچل مارش، سٹیو سمتھ ، گلین میکسویل ، مارکس سٹونس، میتھیو ویڈ ، پیٹ کیومنز، مچل سٹارک ، جوش ہیزل ووڈ، ایڈم زامپاشامل ہیں ۔

    ویسٹ انڈیز کی ٹیم میں کرس گیل، الیون لیوس، نکولس پورن ، روسٹن چیز، شرمون ، ہٹمیئر ، آندرے رسل ، کیرون پولارڈ، جیسن ہولڈر، ڈوائن براوو، اکیل حسین، ہیڈن والش شامل ہیں ۔

  • اب ہمیں افغانستان کی نیوزی لینڈ سے جیتنے کی دعائیں کرنا ہوں گی، سنیل گواسکر

    اب ہمیں افغانستان کی نیوزی لینڈ سے جیتنے کی دعائیں کرنا ہوں گی، سنیل گواسکر

    نئی دہلی : آئی سی سی مینز ٹی ٹوئنٹی ورلڈ کپ کے سپر12 مرحلے میں گروپ ٹو کے میچ میں نیوزی لینڈ کے ہاتھوں بھارت کی عبرتناک شکست پر سابق بھارتی کھلاڑی نے اپنی ٹیم کو آڑے ہاتھوں لیا۔

    بھارت کے ماسٹر کلاس بیٹسمین سنیل گواسکر نے کہا ہے کہ ہماری فائنل الیون ہی درست نہیں، اس لیے آج یہ سب کچھ دیکھنا پڑ رہا ہے۔ انہوں نے کہا کہ اب ہمیں دعا کرنی ہوگی کہ افغانستان کی ٹیم نیوزی لینڈ کو بری طرح ہرائے۔

    ساتھ میں انہوں نے یہ بھی کہا کہ جس طرح نیوزی لینڈ کی ٹیم کھیل رہی ہے، ایسے میں افغانستان ٹیم کا جیتنا مشکل دکھائی دے رہا ہے۔

    ٹیم کی شکست پر سابق آف اسپنر ہربھجن سنگھ کا کہنا تھا کہ ہم صرف ٹیم سلیکشن کی وجہ سے نہیں بلکہ اچھے اسٹروک نہ کھیلنے کی وجہ سے ہارے۔

    واضح رہے کہ نیوزی لینڈ نے بھارت کو یکطرفہ مقابلے کے بعد 8 وکٹوں سے شکست دے کر اس کے ایونٹ کے سیمی فائنل میں پہنچنے کے امکانات نہ ہونے کے برابر کردیے ہیں۔

  • پہلے ہی کہ دیا تھا کہ پاکستان کو کم نہ سمجھو، شعیب اختر

    پہلے ہی کہ دیا تھا کہ پاکستان کو کم نہ سمجھو، شعیب اختر

    لاہور : ٹی20 ورلڈ کپ میں پاکستان کی افغانستان سے شاندار فتح اور آصف علی کی دھواں دھار بیٹنگ پر سابق فاسٹ باؤلر شعیب اختر بھی بول پڑے۔

    اس حوالے سے اپنے ایک حالیہ ویڈیو بیان میں راولپنڈی ایکسپریس شعیب اختر کا کہنا ہے کہ میں پہلے ہی کہہ دیا تھا کہ پاکستان کو کبھی کم نہ سمجھیں، گرین کیپس کسی کو بھی حیران کر سکتی ہیں۔

    شعیب اختر نے مائیکرو بلاگنگ ویب سائٹ ٹوئٹر پر ٹی ٹوئنٹی ورلڈ کپ2021 کے اہم مقابلے پاکستان اور افغانستان کے درمیان میچ کے بعد اپنا ایک ویڈیو پیغام شیئر کیا ہے۔

    انہوں نے کہا کہ ٹی 20 ورلڈ کپ کے اس ایڈیشن میں پاکستان ٹیم ایک بڑی مضبوط قوت ہیں، جس کا ثبوت انہو ں نے اپنا تیسرا میچ جیت کر دے دیا ہے۔

    شعیب اختر نے آصف علی کو ہیروقرار دیتے ہوئے کہا کہ آج اس نے دل خوش کردیا میری دعا ہے کہ اسی طرح چلتے رہو۔

    انہوں نے افغان ٹیم کو مشورہ دیا کہ ان گراؤنڈز میں کوشش کریں کہ پہلے باؤلنگ کریں کیونکہ اس پچ پر اوس پڑتی ہے گیند اسپن اور سوئنگ نہیں ہوتی،  واضح رہے کہ گزشتہ روز ٹی20 ورلڈ کپ میں پاکستان نے آصف علی کی جارحانہ بیٹنگ کی بدولت افغانستان کو سنسنی خیز مقابلے کے بعد 5وکٹوں سے شکست دی تھی۔

    اس سے قبل ایک ویڈیو میں بھی شعیب اختر نے بھارتی ٹیم کے کپتان ویرات کوہلی کا حوالہ دیتے ہوئے کہا تھا کہ’پاکستان کے لیے آپ کو اے گیم لانی پڑے گی اور ان کو ہرانے کے لیے آپ کو بیسٹ گیم کھیلنی پڑتی ہے کیونکہ پاکستان کا کوئی پتہ نہیں چلتا کہ وہ کس وقت اپ سیٹ کردے۔

  • پاکستان ٹیم نے بھارت کا غرور بھی خاک میں ملادیا، شعیب اختر

    پاکستان ٹیم نے بھارت کا غرور بھی خاک میں ملادیا، شعیب اختر

    قومی کرکٹ ٹیم کے سابق فاسٹ بولر شعیب اختر نے کہا ہے کہ ورلڈ کپ میں میچ ہارنے کی ریت ہم نے توڑ دی ہے اور بھارت کا غرور بھی خاک میں ملادیا ہے۔

    انہوں نے کہا کہ ہم میچ پہلے بڑھکیں نہیں مارتے نہ یہ کہتے ہیں کہ واک اوور مل جائے گا یا دے دیں گے، ہم نے ایک مہذب قوم کی طرح میچ کھیلا اور مکمل فتح حاصل کی ہے۔

    اپنی جاری کردہ ایک ویڈیو میں سابق فاسٹ بالر نے کہا کہ بھارت کے حوالے سے یہی کہوں گا کہ ویرات کوہلی کا ٹاس ہارنا ان کیلئے اچھا شگون نہیں تھا، اور بال بھی کافی گیلی ہوگئی تھی۔

    انہوں نے کہا کہ میری خواہش ہے کہ ٹی 20 ورلڈ کپ کے فائنل میں بھی انڈیا اور پاکستان کی ٹیمیں مدمقابل ہوں، ان کا کہنا تھا کہ پاکستان کا ورلڈ کپ تو اب شروع ہوا ہے۔

    میچ میں شاندار کارکردگی پر انہوں نے شاہین شاہ آفریدی کی تعریف کی اور کہا کہ شاباش تم نے واقعی کسی شاہین کی طرح ان پر حملہ کیا، دو خوبصورت ڈلیوریاں کیں جس کے بعد چراغوں میں روشنی نہ رہی۔

    انہوں نے پاکستانی عوام خصوصاً میڈیا سے اپیل کی کہ بھارتی میڈیا کی طرح سلوک کرنے کی ضرورت نہیں ہم مہذب قوم ہیں اور تہذیب کے دائرے میں رہ کر جیت کا جشن منائیں گے۔

    یاد رہے کہ گزشتہ روز ہونے والے پاک بھارت مقابلے میں قومی ٹیم کے اوپنرز بابراعظم اور محمد رضوان نے اپنی کارکردگی سے انڈیا اور پاکستان کے شائقین کوحیران کردیا۔

    اس میچ میں محمد رضوان نے شاندار بیٹنگ کا مظاہرہ کرتے ہوئے55 گیندوں پر79 رنز کی شاندار اننگز کھیلی جس میں 3 بلند و بالا چھکے اور 6 چوکے شامل تھے۔

    کپتان بابراعظم نے شاندار بلے بازی کرتے ہوئے 52 گیندوں پر 68 رنز کی اننگز کھیلی جس میں 2 چھکے اور 6چوکے شامل تھے۔

  • شکر ہے اپنی زندگی میں بھارت کو ورلڈ کپ میں ہارتے ہوئے دیکھ لیا، وسیم اکرم

    شکر ہے اپنی زندگی میں بھارت کو ورلڈ کپ میں ہارتے ہوئے دیکھ لیا، وسیم اکرم

    لاہور : قومی ٹیم کے سابق فاسٹ بولر وسیم اکرم نے کہا ہے کہ شکر ہے میں نے اپنی زندگی میں دیکھ لیا کہ پاکستان نے بھارت کو ورلڈ کپ میں ہرادیا۔

    صحافیوں سے گفتگو کرتے ہوئے ان کا کہنا تھا کہ کل کا میچ پاکستان کرکٹ ٹیم کے ریوائیو کا تھا، بھارت سے جیتے جانے والے میچ کے دن دنیا کو پاکستان کے کھلاڑیوں کی صلاحیت کا بخوبی اندازا ہوگیا ہے۔

    وسیم اکرم نے کہا کہ محمد رضوان ڈیڑھ دو سال سے بہت اچھی پرفارمنس دے رہا ہے، اب قومی کرکٹ ٹیم کوآگے کی طرف دیکھنا ہے یہ ایک لمبی ریس ہے۔

    ایک سوال کے جواب میں سوئنگ کے سلطان کا کہنا تھا کہ خدا کا شکر ہے کہ میں نے اپنی زندگی میں ہی دیکھ لیا کہ پاکستان نے بھارت کو ورلڈ کپ میں شکست دے دی ہے۔

    انہوں نے کھلاڑیوں کو مشورہ دیتے ہوئے کہا کہ ہمارے کھلاڑی پریکٹس کرکے اسکلز کو مزید بہتر بنا سکتے ہیں، آپ پریکٹس سے اپنی باؤلنگ اور بیٹنگ بہتر بناسکتے ہو، فٹنس آپ کے اپنے ہاتھ میں ہے۔

    سابق کرکٹر وسیم اکرم کا کہنا تھا کہ فزیکلی فٹ ہوگئے تو دنیا سے مقابلہ کر پاؤ گے، دنیا کے ٹاپ کرکٹر پہلےاپنی فٹنس کا پورا خیال رکھتے ہیں جو انہیں مستعد اور چا ق و چوبند رکھتی ہے۔

    اپنی فٹنس کے بارے میں انہوں نے بتایا کہ سال1988میں میرا آسٹریلیا کا پہلا دورہ تھا تو کپتان عمران خان نے کہا تھا کہ پریکٹس کے بعد سونا نہیں میچ دیکھنا ہے کیونکہ میچ دیکھنے سے بھی آپ بہت کچھ سیکھتے ہو۔

    انہوں نے مزید کہا کہ شاہین شاہ آفریدی دنیا کے بہترین بولرز میں شامل ہوچکا ہے تاہم شاہین کو ابھی مزید کارکردگی کو بہتر کرنے کی ضرورت ہے، وہ جتنی زیادہ بولنگ کرے گا اس کی پیس اور بڑھے گی۔

  • کھلاڑیوں کے اہلخانہ گراؤنڈ میں بیٹھ کر پاک بھارت ٹاکرا دیکھیں گے

    کھلاڑیوں کے اہلخانہ گراؤنڈ میں بیٹھ کر پاک بھارت ٹاکرا دیکھیں گے

    لاہور : ٹی ٹوئنٹی ورلڈ کپ کا ہائی وولٹیج ٹاکرا (پاک بھارت مقابلہ) آج ہوگا، پاک بھارت میچ کا مظاہرہ قومی کھلاڑیوں کی فیملیز بھی گراؤنڈ میں بیٹھ کر کریں گی۔

    تفصیلات کے مطابق انٹرنیشنل کرکٹ کاؤنسل ٹی ٹوئنٹی ورلڈ کپ کا سب سے بڑا مقابلہ آج دبئی انٹرنیشنل اسٹیڈیم میں ہوگا، جہاں روایتی حریف پاکستان اور بھارت آمنے سامنے نظر آئیں گے، میچ پاکستانی وقت کے مطابق شام 7 بجے شروع ہوگا۔

    ذرائع کا کہنا ہے کہ کھلاڑیوں کی فیملیز بھی پاک بھارت میچ گراؤنڈ میں بیٹھ کر دیکھیں گی، جن کےلیے بائیو سیکیور ماحول کا انتظام کیا گیا ہے۔

    ذرائع کا کہنا ہے کہ سرفراز احمد، حسن علی، عثمان قادر، محمد حفیظ ، عماد وسیم کے اہلخانہ میچ دیکھیں گے جب کہ شعیب ملک ،فخر زمان ، کوچ ثقلین مشتاق کی فیملیز گراؤنڈ میں میچ ہائی وولٹیج ٹاکرے سے لطف اندوز ہوں گی۔

    واضح رہے کہ پاکستان اور بھارت سمیت دنیا بھر کے کروڑوں کرکٹ شائقین اس میچ کا شدت سے انتظار کررہے ہیں۔

    پا کستان کی 12 رکنی ٹیم کا اعلان

    آئی سی سی ٹی 20 ورلڈ کپ 2021 میں بھارت کے خلاف میچ کے لیے پاکستان کی 12 رکنی ٹیم کا اعلان کیا جاچکا ہے، ٹیم کے کپتان بابر اعظم ہوں گے جبکہ محمد رضوان، فخر زمان، شعیب ملک، محمد حفیظ، عماد وسیم، شاہین آفریدی،حسن علی،حارث روؤف، شاداب خان، آصف علی اور حیدر علی ٹیم میں شامل ہوں گے۔

  • پاکستانی ٹیم سے متعلق بھارتی کپتان کا بیان

    پاکستانی ٹیم سے متعلق بھارتی کپتان کا بیان

    دبئی: بھارتی ٹیم کے کپتان ویرات کوہلی نے پاکستانی ٹیم کو خطرناک قرار دے دیا۔

    تفصیلات کے مطابق ویرات کوہلی نے ٹی 20 ورلڈ کپ کے زبردست ٹاکرے سے ایک دن قبل پریس کانفرنس کرتے ہوئے کہا کہ پاکستان کی ٹیم میں بہت سے گیم چینجر ہیں، اور بھارت کو ان سے بہتر کھیل کے لیے اپنا ’اے گیم‘ کھیلنے کی ضرورت ہوگی۔

    بھارتی کپتان کا کہنا تھا ہماری ٹیم بہت متوازن ہے، لیکن پاکستان کی ٹیم خطرناک ہے، اس کے پاس میچ تبدیل کرنے والے کھلاڑی ہیں۔

    انھوں نے کہا میرے لیے پاک بھارت میچ ایک عام میچ ہے، دباؤ نہیں لیتا، ہمیں پروفیشنل کرکٹرز کی طرح حالات میں ڈھلنا ہوتا ہے، اور باہر کون کیا کہہ رہا ہے، یا لکھ رہا ہے اس سے مطلب نہیں۔

    نیوزی لینڈ کو بھاگنے نہیں دینگے، چھوڑنا انڈیا کو بھی نہیں، شعیب اختر

    کپتانی کیوں چھوڑی کے سوال پر ویرات کوہلی بھڑک اٹھے، کہا کپتانی پر بات نہیں کروں گا، توجہ میچ پر ہے۔

    کپتان نے کہا ہردک پانڈیا دو اوور کرانے کے لیے تیار ہے، اس کی بیٹنگ اچھا آپشن دیتی ہے، ہمارے پاس بولرز کی کمبنیشن ہے لیکن ابھی میں اس کے بارے میں نہیں بتاؤں گا۔

    ویرات کوہلی کا کہنا تھا کہ ابوظبی اور دبئی کی پچز بہتر ہیں، شارجہ کی پچ پرگیند نیچے رہتی ہے۔

    واضح رہے کہ دبئی میں اتوار کو بھارت اور پاکستان کے درمیان ٹی ٹوئنٹی ورلڈ کپ کے سپر 12 میں مقابلہ ہوگا، عمان اور متحدہ عرب امارات میں جاری ٹی 20 ورلڈ کپ میں دونوں ٹیموں کا یہ پہلا میچ ہوگا۔ بھارت پاکستان کے خلاف پانچ ٹی 20 ورلڈ کپ میچز میں ناقابل شکست رہا ہے۔

  • نیوزی لینڈ کو بھاگنے نہیں دینگے، چھوڑنا انڈیا کو بھی نہیں، شعیب اختر

    نیوزی لینڈ کو بھاگنے نہیں دینگے، چھوڑنا انڈیا کو بھی نہیں، شعیب اختر

    کراچی : پاکستان کرکٹ ٹیم کے سابق فاسٹ بولر شعیب اختر نے کہا ہے کہ ہمیں بھارت سے زیادہ غصہ نیوزی لینڈ ٹیم پر ہے، لیکن بھارت کو بھی نہیں چھوڑیں گے۔

    یہ بات انہوں نے ایک بھارتی نجی ٹی وی چینل پر دوران پروگرام گفتگو کرتے ہوئے کہی، اس موقع پر ان کے ساتھ سابق بھارتی اسپنر ہربھجن سنگھ بھی موجود تھے۔

    راولپنڈی ایکسپریس شعیب اختر نے اپنی گفتگو میں کہا کہ ٹی ٹوئنٹی ورلڈکپ میں پاکستان کا سارا فوکس نیوزی لینڈ ٹیم سے میچ پر ہے اس لیے بھارت پر فوکس ذرا کم ہے۔

    انہوں نے کہا کہ نیوزی لینڈ کی ٹیم جو ی ہمارے ہاں سے بھاگ کر گئی ہے ہمارا اصل غصہ ان پر ہے اور اسی لیے ہم نے انہیں ورلڈ کپ میں نہیں چھوڑنا۔

     شعیب اختر نے سماجی رابطے کی ویب سائٹ ٹوئٹر پر جاری اپنے پیغام میں بھی کہا کہ نیوزی لینڈ کو نہیں بھاگنے دینا اب لیکن چھوڑنا بھارت کو بھی نہیں ہے۔

    انہوں نے کہا کہ بھارت کے پاس شاندار کھلاڑی ہیں لیکن ٹی ٹوئنٹی میں پیشگوئی نہیں کی جاسکتی، بھارتی کرکٹ ٹیم پاکستان سے بہتر ہے لیکن پاکستان جارحانہ مزاج کی کرکٹ کھیلےگا۔

    شعیب اختر نے کہا کہ پاکستان ورلڈکپ میں بھارت سے بہتر ٹیم رہی ہے، ورلڈکپ میچوں میں بھارت نے پاکستان سےبہتر پریشر ہینڈل کیا ہے۔

    انہوں نے کہا کہ میرے کیریئر کے دنوں میں پاکستان کے پاس بھارت سے بڑے کھلاڑی ہوا کرتے تھے۔ایک انٹرویو میں انہوں نے کہا کہ کوہلی پر بابر اعظم سے زیادہ پریشر ہوگا کیونکہ میچ میں دبئی اسٹیڈیم پورا نیلا ہوگا۔

    براڈ کاسٹرز بھی بھارت کے ہیں، لہٰذا اگر ہم ہار بھی جاتے ہیں تو زیادہ مسئلہ نہیں ہوگا اصل مسئلہ بھارت کو ہوگا کیونکہ ان کے پاس اس میچ کو کھونے کے ساتھ ساتھ کھونے کے لیے اور بھی کچھ ہے۔

    شعیب اختر نے بھارت کے اسٹار بیٹسمین اور کپتان کے بارے میں بات کرتے ہوئے کہا کہ قسمت کوہلی کے ساتھ نہیں ہے۔ یہاں یہ بات قابل ذکر ہے کہ یہ ٹی 20 ورلڈ کپ کوہلی کا بطور کپتان آخری ٹورنامنٹ ہے۔

  • ٹی20ورلڈکپ: اسکاٹش ٹیم کی جرسی ڈیزائن کرنے والی 12 سالہ بچی کے دنیا بھر میں چرچے

    ٹی20ورلڈکپ: اسکاٹش ٹیم کی جرسی ڈیزائن کرنے والی 12 سالہ بچی کے دنیا بھر میں چرچے

    دبئی: آئی سی سی ٹی ٹوئنٹی ورلڈ کپ کے لیے اسکاٹ لینڈ کرکٹ ٹیم کی کٹ ڈیزائن کرنے والی بارہ سالہ ربیکا ڈاونی کو دنیا بھر سے داد مل رہی ہے۔

    اس وقت 12 سالہ ڈیزائنر سب کی توجہ کا مرکز بنی ہوئی ہیں، اسکاٹش کرکٹ بورڈ نے ربیکا ڈوانی کی ایک تصویر اپنے ٹوئٹر ہینڈل پر شیئر کی جس میں وہ ٹی وی کے سامنے کھڑی ہیں اور پس منظر میں اسکاٹ لینڈ کا میچ جاری ہے، بورڈ نے ٹوئٹ میں لکھا کہ یہ اسکاٹ لینڈ کرکٹ ٹیم کی کٹ ڈیزائنر ہیں۔

    اس دوران آئی سی سی نے اسکاٹ لینڈ کرکٹ بورڈ کی ٹویٹ پر جواب دیتے ہوئے ربیکا کے کام کو خوب سراہا۔ اسکاٹش جرسی جامنی اور سیاح سمیت دیگر رنگوں کے ملاپ سے بنائی گئی ہے، سامنے حصے پر قوم کا نام اور لوگو درج ہے۔

    خیال رہے کہ اسکاٹ لینڈ کرکٹ بورڈ نے ٹیم کی جرسی اور کٹ کے ڈیزائن کے لیے ایک آن لائن مقابلہ کر وایا تھا۔ جس میں 200 سے زائد اسکول کے بچوں نے حصہ لیا تھا۔

    مذکورہ مقابلے میں ربیکا فاتح قرار پائیں اور ان کے بہترین ڈیزائن والی کٹ کو ورلڈکپ کے لیے منتخب کیا گیا۔

    بارہ سالہ ڈیزائنر اور اس کی فیملی کو زمبابوے کے خلاف اسکاٹ لینڈ کے ٹی ٹوئنٹی میچ میں مہمان خصوصی کے طور پر مدعو کیا گیا تھا۔ اسے پروڈکشن لائن کی طرف سے پہلی شرٹ بھی تحفے میں دی گئی تھی۔

  • ویرات کوہلی نے اوپننگ کرنے سے انکار کردیا، وجہ کیا بنی؟

    ویرات کوہلی نے اوپننگ کرنے سے انکار کردیا، وجہ کیا بنی؟

    بھارتی کپتان ویرات کوہلی نے ٹی ٹوئنٹی ورلڈ کپ میں اوپننگ سے انکار کرتے ہوئے تیسرے نمبر پر بیٹنگ کرنے کا اشارہ دیا ہے۔

    انگلینڈ کے خلاف وارم اپ میچ میں ٹاس کے دوران غیر ملکی میڈیا سے گفتگو کرتے ہوئے ویرات کوہلی نے کہا کہ آئی پی ایل سے قبل صورتحال مختلف تھی لیکن آئی پی ایل کے دوران لوکیش راہول نے اچھی کارکردگی کا مظاہرہ کیا ہے۔

    راہول کی کارکردگی نے مجھے تیسرے نمبر پر کھیلنے پر مجبور کردیا ہے اب اوپننگ دوبارہ لوکیش راہول کریں گے۔

    بھارتی کپتان نے کہا کہ روہت کے بارے میں بھی نہیں سوچ سکتا۔ وہ ایک عالمی معیار کے کھلاڑی ہیں اور ہمارے لیے وہ سب سے اوپر آئیں گے اس لیے میں اب تیسرے نمبر پر بیٹنگ کروں گا۔

    میڈیا رپورٹس کے مطابق راہول نے 2018 کے بعد سے آئی پی ایل میں سب سے زیادہ 2548 رنز بنائے ہیں اور 2020 میں اورنج کیپ جیتنے والے کھلاڑی تھے۔