سال 2022 ایک طرف اگر سیاسی میدان میں گرماگرمی کا سال رہا، تو دوسری طرف جرائم کے میدان میں بھی کئی ایسے دل خراش سانحات کا شاہد رہا، جس نے لوگوں کے دلوں کو ہلا کر رکھ دیا۔
ہم یہاں سال بھر کے ان واقعات کو درج کر رہے ہیں جو قتل پر مبنی ہیں، اور خاص طور سے وہ واقعات جن میں ایک سے زیادہ افراد کو قیمتی جانوں سے محروم کیا گیا، اور جو میڈیا میں بھی ’بریکنگ نیوز‘ کی حیثیت اختیار کر گئے۔
29 نومبر 2022
کراچی میں ملیر شمسی سوسائٹی سے تین بیٹیوں اور ماں کی لاش برآمد
ابھی گزشتہ ماہ کراچی کے علاقے ملیر میں شمسی سوسائٹی میں ایک گھر سے 4 افراد کی لاشیں ملی تھیں، اس واقعے نے علاقے میں ایک ہلچل مچا دی تھی، ایس ایس پی کورنگی ساجد سدوزئی نے بتایا کہ لاشیں 2 بچیوں اور 2 خواتین کی تھیں، جاں بحق بچیوں میں 10 سال کی ثمرہ، 12 سال کی فاطمہ، 16 سال کی نیہا اور ایک شادی شدہ خاتون ہما شامل تھیں، جب کہ فواد نامی شخص کو شدید زخمی حالت میں وہاں پایا گیا تھا۔
پولیس نے بتایا کہ بچیوں کا والد فواد نجی کمپنی میں سیلز منیجر تھا، تفتیش سے معلوم ہوا کہ پہلی منزل پر گھر کا دروازہ اندر سے لاک تھا، جب کہ گراؤنڈ فلور پر موجود بھائی اور والدہ نے کوئی شور نہیں سنا، معلوم ہوا کہ فواد نے نشہ آور چیز کھلا کر بیٹیوں اور بیوی کی جان لی تھی۔ ملزم فواد نے ابتدائی بیان میں بتایا کہ نوکری کے ساتھ پارٹ ٹائم ٹریڈنگ بھی کرتا ہے، اور انویسٹرز نے پیسہ لگایا ہوا تھا اور ٹریڈنگ میں نقصان ہو گیا، قرض واپس کرنا تھا، مالی پریشانی کی وجہ سے بیوی سے بھی جھگڑا رہتا تھا۔
فواد نے بتایا میں پیسوں کی وجہ سے سخت ڈپریشن میں تھا، آخر میں نے فیصلہ کیا کہ سب کو ختم کر کے خود کشی کرلوں گا، جب بیوی واش روم گئی تو میں نے بڑی بیٹی کے گلے پر چھری پھیری، پھر دونوں بیٹیاں جو سو رہی تھیں ان کے گلے پر چھری پھیری، پھر بیوی کو بولا باہر آ جاؤ، اس کے باہر آتے ہی اس کے گلے پر بھی چھری پھیر دی۔ اپنی بیٹیوں کی تصاویر میں نے انویسٹرز کو بھیجیں، انویسٹرز کو لکھا میں نے اپنی فیملی کو ختم کر دیا ہے اور میں اب اپنی جان لینے لگا ہوں، پھر میں نے اپنے گلے پر بھی چھری پھیر دی۔
ڈاکٹروں نے بتایا کہ چھری پھرنے کی وجہ سے فواد کا ووکل کارڈ متاثر ہوا ہے اور اب شاید وہ پھر کبھی نہ بول سکے۔ اس لیے پولیس کے سوالات کا جواب بھی اس نے لکھ کر دیا۔ پولیس نے سرکار کی مدعیت میں اس کے خلاف چار قتل کا مقدمہ درج کیا۔
7 اکتوبر 2022
پشاور: گھر سے ماں اور بیٹیوں کی لاشیں برآمد
پشاور کے علاقے حیات آباد میں گھر سے تین خواتین کی لاشیں برآمد ہوئیں، جو گھر کے ایک بند کمرے میں پڑی تھیں، ان میں سے ایک ماں تھیں اور باقی ان کی نوجوان بیٹیاں تھیں۔ ابتدائی تفتیش کے مطابق 44 سالہ والدہ عنبر ناصر نے پہلے دونوں بیٹیوں 18 سالہ مائرہ اور 14 سالہ عیشال کو قتل کرنے کے بعد خود کشی کی تھی۔ پولیس کے مطابق خاتون نے دو سال قبل اپنے شوہر سے علیحدگی اختیار کی تھی۔
عنبر ناصر کے چچا ارشد علاؤالدین نے پولیس کو بیان دیا کہ ’میری بھتیجی نے دو سال قبل اپنے شوہر سے علیحدگی اختیار کی تھی، وہ بار بار مجھ سے وراثت میں حصہ مانگتی تھی، میرے گھر آ کر مجھ سے جھگڑا کیا، میری آنکھوں میں مرچیں بھی ڈالیں، ارشد علاؤالدین نے مزید کہا کہ ان کی بھتیجی نے اپنی بیٹیوں اور خود پر فائرنگ کر کے زندگی کا خاتمہ کیا ہے۔
6 دسمبر 2022
راولپنڈی میں ایک گھر میں بہن کے مرنے کے بعد معذور بھائی کا انجام
یہ واقعہ اگرچہ قتل کا نہیں تھا لیکن راولپنڈی کے علاقہ صادق آباد میں پیش آنے والا یہ واقعہ ایک نہایت افسوس ناک پہلو کا حامل تھا، ایک گھر سے بہن اور بھائی کی لاشیں برآمد ہوئیں تھیں، تھانہ صادق آباد پولیس نے تفتیش کی تو معلوم ہوا کہ آفندی کالونی میں واقع گھر سے ملنے والی لاشوں میں سے ایک بہن کی لاش تھی، جو 25 دن پرانی تھی، جب کہ بھائی کی لاش 4 روز پرانی تھی۔
پولیس کے مطابق بہن اپنے معذور بھائی کی واحد کفیل تھی، لیکن بہن کے مرنے کے بعد معذور بھائی کچھ نہ کر سکا، اور وہ بھی سسک سسک کر گھر میں زندگی کی بازی ہار گیا اور قریبی گھروں میں رہنے والوں کو کانوں کان خبر تک نہ ہوئی۔
1 جنوری 2022
جہلم: ماں کے ہاتھوں تین بچیوں کا بے دردی سے قتل
سال کے پہلے ہی دن یہ دل خراش واقعہ پیش آیا، جہلم کے نواحی گاؤں ہرن پور میں حالات سے دلبرداشتہ ایک ماں نے اپنی تین بچیوں کو موت کے گھاٹ اتارا۔ بچیوں کی عمریں 2، 3 اور 5 سال تھیں، انھیں قتل کرنے کے بعد ماں نے بھی خودکشی کی کوشش کی، لیکن شدید زخمی ہو گئیں۔ اس دل خراش واقعے کی خبر جب بچیوں کے والد کو دی گئی تو وہ صدمے سے بے ہوش ہو گئے۔
ڈی ایس پی سلیم خٹک نے واقعے سے متعلق بتایا کہ خاتون کا اپنے شوہر سے رات گئے جھگڑا ہوا تھا، جس کے بعد وہ گھر سے نکل جانا چاہتی تھیں، لیکن رشتے داروں نے صلح کراتے ہوئے معاملہ رفع دفع کرا دیا۔ ڈی ایس پی کے مطابق خاتون کا شوہر صبح 6 بجے اپنی والدہ کے گھر گیا اور وہیں سے کام پر چلا گیا، شوہر کے جانے کے بعد کمرے کا دروازہ بند کر کے ماں نے بچیوں کو تیز دھار آلے سے قتل کر دیا، خاتون نے اپنے آپ کو زخمی کرنے کے بعد آگ بھی لگائی، تاہم خاتون کے دیور کو پتا چلا تو اس نے دروازہ توڑ کر ریسکیو 1122 کو اطلاع دے دی۔
6 جنوری 2022
چونیاں: سنگ دل باپ نے 3 بیٹیوں کو نہر میں پھینک دیا
پنجاب کے شہر چونیاں میں ایک سنگ دل باپ نے 3 بیٹیوں کو نہر میں پھینک دیا تھا، جسے پولیس نے گرفتار کر لیا، باپ کے حوالے سے پولیس کا کہنا تھا کہ اس نے چند دن پہلے آلہ آباد کےعلاقے بگھیانہ میں فائرنگ کر کے ایک شخص کو قتل اور کئی افراد کو زخمی کیا تھا۔ ڈی پی او چونیاں کے مطابق ملزم نے بیٹیوں کے قتل کا اعتراف بھی کیا۔ ایک دن بعد ریسکیو کو صرف ایک بچی کی لاش نہر سے ملی۔
19 جنوری 2022
کاہنہ میں گھر سے خاتون ڈاکٹر کی 3 بچوں سمیت لاشیں برآمد
لاہور کے علاقے کاہنہ میں قتل کی ایک ایسی لرزہ خیز واردات ہوئی جس نے ہر کسی کے دل دہلا دیے۔ ایک خاتون ڈاکٹر کو ان کے 3 بچوں سمیت قتل کر دیا گیا تھا، ابتدائی طور پر جب گجومتہ میں ایک مکان سے خاتون ڈاکٹر اور 3 بچوں کی لاشیں برآمد ہوئیں تو ہر طرف سنسنی پھیل گئی تھی، واقعے کے وقت مقتولہ کا ایک 14 سالہ بیٹا علی زین دوسرے کمرے میں ہونے کے باعث بچ گیا تھا۔ تین بچوں میں 8 سالہ فاطمہ لے پالک تھی۔
ڈاکٹر ناہید گائناکالوجسٹ تھیں اور گھر کے نیچے ہی کلینک تھا، معلوم ہوا تھا کہ مقتولہ کے سابق شوہر سبطین نے انھیں طلاق دے کر ایک لیڈی ٹریفک وارڈن سے دوسری شادی کر رکھی تھی اور وہ ڈیفنس میں رہائش پذیر تھے۔ قتل کے واقعے کا مقدمہ بچ جانے والے بیٹے علی زین کی مدعیت میں درج کیا گیا تھا۔
تاہم چند دن بعد پولیس نے آخر کار اس قتل کیس کا ڈراپ سین کر دیا، جب انھوں نے ثابت کر دیا کہ قاتل کوئی اور نہیں بلکہ خاتون کا اپنا بچ جانے والا بیٹا زین تھا، جس نے پب جی گیم کھیلنے سے منع کرنے پر ان سب کو فائرنگ کر کے قتل کیا تھا، زین سے آلہ قتل بھی برآمد کیا گیا۔ اس کیس نے یہ بھی بتایا کہ پب جی جیسے آن لائن گیموں کے اثرات ناپختہ ذہنوں پر کس گہرائی سے ثبت ہوتے ہیں۔
12 جنوری 2022
کراچی: ماں کے سامنے بیٹے کا قتل
اگرچہ اس کیس میں صرف ایک فرد کا قتل ہوا لیکن میڈیا پر یہ خبر کئی ہفتوں تک چھائی رہی۔ کراچی کے علاقے کشمیر روڈ پر ڈکیتی کی مزاحمت پر ماں کے سامنے اس کا بیٹا شاہ رخ قتل کر دیا تھا۔ اس واقعے کی سی سی ٹی وی فوٹیج بھی منظرعام پر آئی، مقتول کی والدہ نے گھر کی بیل بجائی، تو اسی وقت لٹیرے لوٹنے آ گئے، شاہ رخ نے گیٹ کھولتے ہی ڈاکو پر کو پکڑنے کی کوشش کی جس پر اس نے فائرنگ کر دی۔ قاتل فائرنگ کرنے کے بعد زیورات لوٹ کر موٹر سائیکل پر بہ آسانی فرار ہو گیا۔
شاہ رخ کی صرف ایک ہفتے قبل ہی شادی ہوئی تھی، وہ ایک ہفتے قبل دلہا بنا اور ڈاکو نے اسے کفن پہنا دیا، اہل خانہ نے بتایا کہ شاہ رخ 7 بہن بھائیوں میں سب سے چھوٹا تھا اور گھر والوں کا لاڈلہ تھا، کزن نے بتایا کہ وہ دوستوں کا دوست اور ملنسار تھا۔
27 جنوری 2022
کراچی: صدر میں ہوٹل کے کمرے سے لاش برآمد
کراچی کے علاقے صدر میں ہوٹل میں چھری کے وار سے قتل ہونے والے ایک شخص کی لاش ملنے کے واقعے نے بھی میڈیا پر بریکنگ نیوز کی حیثیت سے جگہ بنائی، پولیس نے چوبیس گھنٹوں کے اندر معلوم کیا کہ یاجد نامی شخص کو اس کے دوست اسامہ نے قتل کیا ہے۔ قاتل نے ایک ویڈیو بیان میں کہا کہ وہ یاجد کے ساتھ ہوٹل پہنچا، ساتھ ناشتہ کیا پھر اسے قتل کر دیا، اس نے مقتول سے کئی سال تک بلیک میل کر کے بدفعلی کرنے کا بدلہ لیا۔
معلوم ہوا کہ یاجد کا تعلق خیبر پختون خوا کے شہر بونیر سے تھا، دونوں ایک ہی مدرسے میں پڑھتے تھے، اسامہ نے بتایا کہ وہ اسے غلط کام پر مجبور کرتا تھا، اور شکایت پر یاجد کو مدرسے سے نکال دیا گیا تھا۔ واقعے والے دن بھی یاجد نے غلط نیت سے بلایا۔ جھگڑا ہوا اور اس دوران اسامہ نے اسے چھری کے وار کر کے قتل کر دیا۔ پولیس کے مطابق اسامہ کو بونیر فرار ہوتے وقت بس اسٹاپ سے گرفتار کیا گیا، اور اس سے یاجد کا فون بھی برآمد ہوا۔
3 فروری 2022
کراچی میں قتل کی لرزہ خیز واردات، گھر سے میاں بیوی کی لاشیں برآمد
کراچی کے علاقے منظور کالونی میں ایک گھر سے میاں بیوی کی لاشیں برآمد ہوئی تھیں، پولیس نے تفتیش کی تو انکشاف ہوا کہ شوہر نے بیوی کو ذبح کر کے خود کشی کی ہے۔ پولیس کے مطابق شوہر سیف اللہ نے بیوی آمنہ کو تیز دھار آلے سے وار کر کے قتل کیا اور بعد میں پنکھے سے پھندا لگا کر خود کشی کر لی۔
مقامی پولیس کا کہنا تھا کہ کثیرالمنزلہ عمارت میں میاں بیوی کے ساتھ بچے بھی تھے، لیکن کوئی بھی بچہ عینی شاہد نہیں تھا۔ 7 بہن بھائیوں میں کچھ بالائی اور کچھ نچلی منزلوں پر تھے لیکن کوئی بھی وقوعہ کے وقت والدین کے پاس نہیں تھا۔
12 فروری 2022
سوات: گھر سے 3 افراد کی لاشیں برآمد، علاقے میں کہرام مچ گیا
یہ واقعہ سوات کی تحصیل مٹہ، وینئی میں پیش آیا، جہاں ایک گھر سے 3 افراد کی لاشیں برآمد ہوئیں تھیں، پوسٹ مارٹم رپورٹ سے معلوم ہوا کہ خواتین اور بچی کو تیز دھار آلے سے قتل کیا گیا ہے۔ پولیس نے مقتولہ کے بیٹے کی مدعیت میں نامعلوم افراد کے خلاف مقدمہ درج کیا، ابتدائی طور پر جنگلی جانور کے حملے میں تینوں افراد کی موت کا خدشہ ظاہر کیا گیا تھا۔
بعد ازاں، مینگورہ میں ڈی پی او سوات زاہد نواز مروت نے ایک پریس کانفرنس میں انکشاف کیا کہ یہ قتل کی واردات تھی، اور اس کی وجہ پسند کی شادی تھی، انھوں نے بتایا چار باغ میں پسند کی شادی کرنے والے کوہستانی جوڑے کے قاتل کو گرفتار کر لیا گیا ہے، قاتلوں میں مقتولین کے بھائی اور مقتولہ کا چچا شامل تھا۔
ڈی پی او سوات نے کہا کہ مقتول مجیب اور لاہوری بی بی نے محض 4 ماہ قبل پسند کی شادی کی تھی
16 فروری 2022
لاہور شاہدری میں ماں بیٹی کا لرزہ خیز قتل
پنجاب کے صوبائی دارالحکومت لاہور میں ماں بیٹی کا لرزہ خیز قتل ہوا، شاہدرہ میں ایک گھر سے ماں بیٹی کی لاشیں ملیں، جن کی شناخت 45 سالہ بشریٰ اور 20 سالہ ثنا کے ناموں سے کی گئی، دونوں کو تیز دھارآلے سے قتل کیا گیا تھا۔ پولیس نے ابتدائی رپورٹ ہی میں کہا کہ مبارک نامی شخص نے رشتے کے تنازع پر ماں بیٹی کا قتل کیا اور فرار ہو گیا۔
ایس ایس پی نے میڈیا کو بتایا کہ ابتدائی معلومات کے مطابق ملزم مبارک نے اپنے بھائی کی بیوی، اور ساس کو قتل کیا اور فرار ہو گیا۔
28 فروری 2022
کراچی میں مالک مکان نے بیوہ خاتون کے 2 بچوں کو آگ لگا دی
صوبہ سندھ کے دارالحکومت کراچی میں ایک بیوہ خاتون کے مکان خالی نہ کرنے پر مالک مکان نے ان کے 2 بچوں کو آگ لگا دی، جس سے دونوں بچے جاں بحق ہو گئے۔ یہ اندوہناک واقعہ سہراب گوٹھ کے علاقے جنت گل ٹاؤن میں پیش آیا تھا، خاتون کا کہنا تھا کہ ان کے بچے بسوں میں پانی فروخت کرتے تھے، مالک مکان نے پچھلے مہینے گھر خالی کرنے کا کہا تھا۔
خاتون نے دعویٰ کیا کہ مالک مکان نے ایک دن قبل انھیں بہانے سے ایک گھر دیکھنے کے لیے بھیجا، وہ جیسے ہی گئی، پیچھے سے بچوں کو پیٹرول چھڑک کر اس نے آگ لگا دی۔ خاتون کے مطابق وہ بچوں کو سول اسپتال لے گئیں جہاں دونوں دم توڑ گئے، خاتون نے ایک بچے کی لاش ایدھی سرد خانے میں رکھوائی اور دوسرے کی لاش کے ساتھ پریس کلب کے باہر احتجاج کرنے لگیں۔
دوسری جانب ایس ایس پی ایسٹ نے میڈیا کو بتایا کہ آتش زدگی کا یہ واقعہ ایک دن قبل رونما ہوا تھا، کسی کے جاں بحق ہونے کی اطلاع نہیں ملی تھی تاہم تحقیقات جاری ہیں۔
27 فروری 2022
سفاک قاتل نے بھائی، بھابی، بھتیجی کو قتل کر دیا
لاہور کے علاقے چوہنگ میں ایک سفاک قاتل نے میاں بیوی اور ان کی بیٹی کو قتل کیا، پولیس نے واردات کے چند گھنٹوں بعد ہی قاتل کو گرفتار کر لیا۔ معلوم ہوا کہ کہ قاتل مقتول امانت علی کا بھائی امین ہے۔ پولیس کے مطابق امین دو نامعلوم افراد کے ساتھ صبح 8 بجے مقتول امانت کے گھر مٹھائی دینے کے بہانے گیا، اور پھر ساتھیوں کے ساتھ مل کر اپنے بھائی، بھابی اور بھتیجی کے ہاتھ باندھے اور انھیں بے دردی سے قتل کر کے فرار ہو گیا۔
پولیس کی ابتدائی رپورٹ کے مطابق مقتول امانت کا اپنے بھائی امین سے جائیداد کا تنازع تھا۔ ایس پی صدر نے بتایا کہ امین نے 2014 میں والد کو بھی قتل کیا تھا اور چند روز قبل ہی والد کے قتل کے الزام میں جیل سے قید کاٹ کر آیا تھا۔
27 فروری 2022
لاہور: نواب ٹاؤن میں تہرے قتل کی لرزہ خیز واردات
صوبائی دارالحکومت لاہور میں میاں بیوی اور ان کی بیٹی کا سفاکانہ قتل ہوا، یہ واقعہ چوہنگ، نواب ٹاؤن میں پیش آیا، تہرے قتل کی اس لرزہ خیز واردات میں تینوں افراد کو ہاتھ پاؤں باندھ کر قتل کیا گیا تھا، مقتولین کی شناخت امانت علی، شبانہ اور ازل کے نام سے ہوئی۔ دل خراش واقعے کی اطلاع ملنے پر پولیس کی بھاری نفری موقع پر پہنچی تو گھر میں دل دہلا دینے والے مناظر تھے، کمرے میں ہر طرف خون ہی خون پھیلا ہوا تھا، مقتولین کی لاشیں کپڑے میں لپیٹی گئی تھیں۔
پولیس نے بتایا کہ مقتول امانت علی کا والد بھی کچھ عرصہ قبل دشمنی کی وجہ سے قتل ہوا تھا، نواب ٹاؤن میں قتل ہونے والے امانت علی کے بھائی سلیم نے بتایا کہ بھائی، بھابھی اور بھتیجی کو دشمنی پر قتل کیا گیا ہے، 2014 میں بھی میرے والد کو بھی قتل کر دیا گیا تھا۔
31 مارچ 2022
گھریلو جھگڑے کا خوفناک انجام، ماں نے اپنے 3 بچوں ذبح کر ڈالا
اسلام آباد کے علاقے شہزاد ٹاؤن میں دل خراش واقعہ رونما ہوا، جہاں ایک ماں نے تین بچوں کو چھری کے وار سے بے دردی سے ذبح کر کے قتل کیا، ابتدائی تفتیش کے مطابق اندوہناک واقعہ شوہر اور بیوی کے درمیان گھریلو لڑائی جھگڑے پر پیش آیا، جس پر خاتون نے عاجز آ کر اپنے لخت جگر پر چھریاں چلا دیں، خاتون نے بھی خود کشی کی کوشش کی۔
جاں بحق ہونے والوں میں سات سالہ ایان، چار سالہ مسکان اور تین سالہ نور شامل تھے، علاقے میں قتل کی اس لرزہ خیز واردات کی خبر جنگل میں آگ کی طرح پھیلی اور لوگوں کی بڑی تعداد متاثرہ مقام پر پہنچی۔
7 مارچ 2022
7 دن کی بیٹی کو گولیاں مار کر بے دردی سے قتل کرنے والا باپ
اس واقعے میں پنجاب کے ضلع میانوالی میں سفاک باپ نے نومولود کو فائرنگ کر قتل کیا اور پھر فرار ہو گیا، پولیس نے تین دن بعد قاتل کو بھکر سے گرفتار کیا، اس کیس میں وزیر اعلیٰ اور آئی جی پنجاب نے ملزم کی جلد گرفتاری کا حکم دیا تھا۔ ڈی پی او نے بتایا کہ ملزم کو جدید ٹیکنالوجی کی مدد سے بھکر سے گرفتار کیا گیا، گرفتاری کے لیے 3 ٹیمیں تشکیل دی گئی تھیں۔
سوشل میڈیا پر زیرِ گردش خبروں کے مطابق میانوالی میں شاہ زیب نامی شخص نے اپنی 7 روز کی بیٹی کو محض اس لیے گولیاں مار دی تھیں کہ اس کی پہلی اولاد بیٹے کی بجائے بیٹی تھی۔ صارفین نے ننھی پری کی تصاویر شیئر کیں تھیں، جس میں معصوم جان کو بے دردی سے 5 گولیاں مار کر ابدی نیند سلا دیا گیا تھا۔
7 مارچ 2022
کراچی: ماں بیٹی کا لرزہ خیز قتل، وجہ کیا تھی؟
شہر قائد کے علاقے ناظم آباد نمبر چار میں ایک گھر سے ماں اور بیٹی کی لاشیں برآمد ہوئی تھیں، معلوم ہوا کہ نامعلوم قاتلوں نے گھر میں گھس کر ماں اور بیٹی کو گولیاں مار کر موت کے گھاٹ اتارا تھا۔ پولیس کو واقعے سے متعلق 15 پر کال موصول ہوئی تھی۔ پولیس نے تحقیقات کے آغاز میں بتایا کہ ماں بیٹی گھر میں اکیلے تھے، ایک بجے کے قریب گھریلو ملازمہ آئی تو لاشوں کا علم ہوا، ایک لاش صوفے پر ملی تھی دوسری بیڈ پر تھی، اور جائے واردات سے نائن ایم ایم کا ایک خول اور ایک سکہ ملا۔
پولیس کے مطابق مقتولہ روبینہ کے شوہر نے دو شادیاں کی تھیں، مقتولہ کے شوہر کا دوسرا گھر گلشن میں ہے۔ قتل سے متعلق پولیس نے بتایا کہ دونوں خواتین کو سر میں گولی ماری گئی ہے، واقعہ ذاتی دشمنی لگتا ہے، ممکنہ طورپر مقتولین قاتل کو جانتے تھے۔
1 مئی 2022
کوئٹہ: ماں اور 4 بچوں کا سفاکانہ قتل
صوبہ بلوچستان کے دارالحکومت کوئٹہ کے علاقے کچلاک ناصران میں ایک خاتون کو ان کے 4 بچوں سمیت بے دردی سے قتل کر دیا تھا، مقتولین کو تیز دھار آلے سے قتل کیا گیا، پولیس کا کہنا تھا کہ ماں اور 3 بچوں کے گلے تیز دھار آلے سے کاٹے گئے، ایک بچے کو گلا دبا کر قتل کیا گیا۔
مقتولین میں 13 سالہ سلمان، 11 سالہ صائمہ، 9 سالہ عنایت اللہ اور 7 سالہ شاہدہ شامل تھی، تحصیل دار جنید باروزئی نے میڈیا کو بتایا کہ بچوں کے باپ کو کچلاک پولیس نے چار افراد کے قتل کے الزام میں گرفتار کر لیا ہے، یہ بھی معلوم ہوا کہ باپ نے 2 شادیاں کر رکھی تھیں۔
