Tag: 21 اکتوبر

یش چوپڑا بالی وڈ میں ’کنگ آف رومانس‘ مشہور تھے۔ اس معروف ہدایت کار نے شائقینِ سنیما کو زندگی سے بھرپور فلمیں دیں اور اپنے فن اور صلاحیتوں سے انڈسٹری میں نام کمایا۔ یش چوپڑا آج ہی کے دن 2012ء میں ہمیشہ کے لیے یہ دنیا چھوڑ گئے تھے۔

یش چوپڑا ڈینگی بخار میں مبتلا تھے اور اسپتال میں زیرِ علاج تھے، لیکن وائرس نے ان کی زندگی بچانے کی ہر کوشش ناکام بنا دی۔

یش چوپڑا کا فلمی سفر کئی دہائیوں پر محیط ہے۔ جس میں انھوں نے شائقین کو ’’دیوار‘‘، ’’چاندنی‘‘، ’’سلسلہ‘‘ اور ’’ڈر‘‘ جیسی مقبول فلمیں دیں۔

وہ 1932ء میں لاہور میں پیدا ہوئے تھے۔ انھوں نے آئی ایس جوہر اور اپنے بڑے بھائی بی آر چوپڑا کے اسسٹنٹ کے طور پر اپنے کیریئر کا آغاز کیا۔ ان کی پہلی فلم ’دھول کا پھول‘ 1959ء میں ریلیز ہوئی تھی۔ یش چوپڑا نے 1973ء میں اپنی فلم کمپنی ’یش راج‘ فلمز بنائی جس کے بعد انھوں نے امیتابھ بچن کے ساتھ بالی وڈ کی کام یاب ترین فلمیں ’دیوار‘، ’کبھی کبھی‘ اور ’ترشول‘ بنائیں۔

’سلسلہ‘، ’مشعل‘، ’چاندنی‘ اور ’لمحے‘ ان کی وہ کام یاب ترین فلمیں تھیں جن کے بارے میں کہا گیا کہ یہ منفرد اور رجحان ساز فلمیں ہیں۔

یش چوپڑا کو 6 نیشنل فلم ایوارڈ اور 11 فلم فیئر دیے گئے جن میں بہترین ہدایت کار کے 4 ایوارڈ انھوں نے اپنے نام کیے تھے۔ بھارتی حکومت نے یش چوپڑا کو دادا صاحب پھالکے اور پدم بھوشن اعزازات سے نوازا تھا۔

بالی وڈ کے اس ہدایت کی رومانوی فلموں کی خاصیت ان کے منفرد گیت، موسیقی اور رقص ہے۔ ہدایت کار نے اپنی فلموں میں سماجی مسائل کو بھی اجاگر کیا۔