کراچی : محکمہ موسمیات کا کہنا ہے کہ کراچی میں 22 جنوری سے سردی میں کمی کاامکان ہے ، آج بھی کم سے کم درجہ حرارت 8 ڈگری سینٹی گریڈ ریکارڈ کیا گیا جبکہ کوئٹہ میں پارہ منفی10ڈگری سینٹی گریڈ پہنچ گیا ہے۔
تفصیلات کے مطابق کراچی میں سردی کی لہر برقرار ہے، آج کم سے کم درجہ حرارت 8 ڈگری سینٹی گریڈ تک ریکارڈ کیا گیا جبکہ دن کے اوقات میں درجہ حرارت23 ڈگری تک جاسکتا ہے۔
محکمہ موسمیات کا کہنا ہے کہ کراچی میں 22 جنوری سے سردی میں کمی کاامکان ہے جبکہ آج شہر کا مطلع جزوی ابرآلود رہے گا۔
خیال رہے محکمہ موسمیات نے خبردار کیا تھا کہ کراچی میں جمعہ اور ہفتہ کودرجہ حرارت مزید گرنے کا امکان ہے ، درجہ حرارت 6 ڈگری تک جاسکتا ہے۔
کو ئٹہ سمیت بلوچستان کے بیشتر اضلاع میں درجہ حرارت نقطہ انجماد سےگرگیا، وادی کوئٹہ کے اطراف کے پہاڑ سفید چادر اوڑھے ہوئے ہیں اور پارہ منفی10 ڈگری سینٹی گریڈ پہنچ گیا۔
مزید پڑھیں : کراچی میں رواں ہفتے درجہ حرارت میں مزید کمی کی پیش گوئی
محکمہ مو سمیات کے مطابق زیارت میں کم سے کم درجہ حرارت منفی 13 ، قلات میں منفی 12، ژوب میں منفی 2،دالبندین میں منفی 3 اور پنجگور اور نوکنڈی میں صفر ڈگری سیٹی گریڈ ریکارڈ کیا گیا۔
دوسری جانب ملک کے بیشتر علاقوں میں موسم سرد اور خشک جبکہ شمالی علاقوں میں شدید سرد رہے گا،محکمہ موسمیات نے آئندہ چوبیس گھنٹے میں کراچی،کوئٹہ،لاہور، اسلام آباد،پشاور سمیت ملک کے بیشترعلاقوں میں موسم سرد اور خشک رہنےکی پیشگوئی کی ہے،جبکہ شمالی علاقوں اور بلو چستان کے اضلاع آج بھی یخ بستہ ہواؤں کی لپیٹ میں رہیں گے۔
