ڈیرہ اسماعیل خان : سی آر بی سی کینال حادثہ میں ڈوب کر جاں بحق ہونیوالوں کی تعداد 22 ہوگئی ، ڈوبنے والوں میں 8 خواتین اور 14 بچے شامل ہیں۔
تفصیلات کے مطابق ڈی جی خان اور ڈی آئی خان کے سرحدی علاقے بستی شاہ جمال کے قریب شادی کی تقریب سے واپسی آنیوالے بدقسمت خاندان کا لوڈر رکشہ بے قابو ہوکر چشمہ رائٹ بینک کینال میں جاگرا تھا، حادثے میں 28 افراد ڈوب گئے تھے۔
ریسکیو ذرائع کا کہنا ہے کہ تین دن ریسکیو آپریشن جاری رہا جو آج مکمل ہو گیا ہے، آپریشن کے پہلے دن 4 لاشیں دوسرے روز 15لاشیں اور باقی تین لاشیں آج ریکور کر لی گئیں ہیں۔
پہلے روز 6 افراد کو زندہ بچا لیا گیا تھا جبکہ ڈرائیور فرار ہو گیا تھا ، سوموار کے روز شاہ اجمل گاؤں سے دیہاتیوں کا یہ بدقسمت قافلہ جس میں زیادہ تر عورتیں اور بچے شامل تھے۔
ریسکیو حکام کے مطابق ڈرائیور کی غفلت اورتیزرفتاری کے باعث چنگچی رکشہ بے قابو ہوکر چشمہ رائٹ بینک کینال میں جاگرا۔
.عینی شاہدین کے مطابق ایک ہی لوڈر میں سوار کم و بیش 29 افراد میں زیادہ تر عورتیں اور بچے شامل تھے، یہ چنگچی لوڈر جب سی آر بی سی کینال کے قریب پہنچا تو بے قابو ہو کر کینال میں جا گرا ۔
اس حادثہ کے وقت ڈرائیور نے اپنے سمیت تین سواریوں کی جان بچا لی تھی، مگر بعد میں عوامی غم و غصہ کے خوف سے فرار ہو گیا۔
انتظامیہ کے مطابق ریسکیو ٹیموں نے پہلے روز چار لاشیں نکل لی تھیں اور دوسرے روز پاک فوج اور ڈی جی خان کی ریسکیو 1122 سروس کی مدد سے 15 مزید لاشیں نکل لی گئی تھیں اور آج تیسرے روز 3 لاشیں نکال کر آپریشن مکمل کر لیا گیا۔
پولیس کے مطابق گزشتہ روز مل جانے والی لاشوں کو آج نماز جنازہ ادا کر کے دفنا دیا گیا ہے۔
