Tag: 24 hours

سندھ حکومت کا پیٹرول پمپس 24گھنٹے کھولنے کا فیصلہ

کراچی : سندھ حکومت نے پیٹرول پمپس 24 گھنٹے کھلے رکھنے کی اجازت دینے کا فیصلہ کرلیا، عوام میں خوشی کی لہر دوڑ گئی۔

تفصیلات کے مطابق کرونا لاک ڈاؤن کے سلسلے میں مخصوص اوقات میں پیٹرول پمپس کھولنے کا فیصلہ کیا گیا تھا تاہم اب سندھ حکومت نے عوام کی پریشانی کو مد نظر رکھتے ہوئے پمپس کو 24 گھنٹے کھولنے کا حتمی فیصلہ کرلیا گیا ہے۔

اس حوالے سے وزیر اطلاعات سندھ ناصر حسین شاہ نے اپنے ایک بیان میں کہا ہے کہ یہ فیصلہ حالیہ بارشوں کی صورتحال میں عوامی مشکلات کے پیش نظر کیا گیا ہے۔

ناصر حسین شاہ نے کہا کہ گاڑی اور جنریٹر کے لیے پیٹرول کے حصول میں لوگوں کو مشکلات درپیش ہیں، پیٹرول پمپس کھلے رکھنے کا فیصلہ عوامی مفاد میں کیا گیا۔ انہوں نے کہا کہ پیٹرول پمپس کھلے رکھنے سے متعلق نوٹی فکیشن آج جاری کردیا جائے گا۔

خیال رہے کہ سندھ حکومت نے لاک ڈاؤن کے تحت پیٹرول پمپس شام 5 بجے تک کھولنے کی اجازت دی تھی تاہم اب 24 گھنٹے کھلے رکھنے کی اجازت دی ہے۔

مزید پڑھیں : پیٹرول پمپس اور سی این جی اسٹیشنز کو مخصوص اوقات میں کھولنے کی اجازت

واضح رہپے کہ اس سے قبل سندھ حکومت کےاحکامات پر کرونا وائرس کے باعث لاک ڈاؤن مزید سخت کرتے ہوئے سی این جی اسٹیشنز کو صبح 8 سے رات 8 (12 گھنٹے) تک کھولنے کا فیصلہ کیسا گیا تھا۔

رپورٹ کے مطابق صوبے بھر کے پیٹرول پمپس اور سی این جی اسٹیشنز رات 8 بجے کے بعد اگلی صبح 8 بجے تک مکمل بند رکھنے کے احکامات دیئے گئے تھے۔

جولائی 18, 2020
مقبوضہ کشمیر میں ظلم و بربریت کی انتہا ،24 گھنٹوں میں 15 کشمیری شہید

سری نگر : مقبوضہ کشمیر میں بھارتی فورسز نے ظلم و بربریت کی انتہا کردی ، 24 گھنٹوں میں 15 کشمیریوں کو شہید کردیا گیا جبکہ گھرگھر تلاشی کے دوران متعدد نوجوانوں کو گرفتار بھی کرلیا۔

تفصیلات کے مطابق مقبوضہ کشمیرمیں بھارت کی ریاستی دہشتگردی جاری ہے، پلواما میں بھارتی فورسزکی فائرنگ سے مزید دوکشمیری نوجوان شہید ہوگئے، جس کے بعد چوبیس گھنٹے میں شہید کشمیریوں کی تعداد پندرہ ہوگئی۔

بھارتی فورسزنے پلواما کا محاصرہ کرکے گھرگھر تلاشی کے دوران متعدد نوجوانوں کو گرفتار بھی کرلیا ہے جبکہ مقبوضہ وادی کے مختلف علاقوں میں بھارتی مظالم کیخلاف احتجاج جاری ہے۔

اس سے قبل راجوڑی میں بھارتی فورسز کی فائرنگ سے تین کشمیری نوجوان شہید ہوگئے تھے، نوجوانوں کونام نہاد سرچ آپریشن میں شہید کیا گیا جبکہ متعدد نوجوانوں کو گرفتار بھی کرلیا گیا تھا۔

کشمیر میڈیا سیل کے مطابق بھارتی فورسز نے مئی میں اکیس کشمیری نوجوانوں کوشہید کیا اور آٹھ سو زائد گھر تباہ کئے جبکہ بدترین تشدد سے دوسو سے زائد کشمیری زخمی ہوئے اور ایک سوچھیالیس کشمیریوں کو بغیر کسی جرم گرفتار کیا گیا۔

یاد رہے اقوام متحدہ میں پاکستانی سفیر منیر اکرم نے سلامتی کونسل سے خطاب کرتے ہوئے کہا تھا کہ سلامتی کونسل کو کشمیر میں بھارتی جنگی جرائم کا نوٹس لینا چاہیئے،بھارت کشمیر میں انسانی حقوق کی سنگین خلاف ورزیاں کر رہا ہے۔

منیر اکرم کا کہنا تھا کہ بھارت مکاری سے کشمیر میں زمینی حقائق تبدیل کر رہا ہے، سلامتی کونسل کے موثر اقدامات نہ کرنے کی قیمت کشمیریوں کو ادا کرنی پڑ رہی ہے۔

انہوں نے مباحثے کے دوران بتایا تھا کہ گزشتہ ماہ میں بھارت نے33 کشمیریوں کو شہید کیا،ایل او سی پر بھارتی فائرنگ سے رواں سال 989 کشمیری شہید ہوئے، بھارت جنیوا کنونشن کی کھلی خلاف ورزی کر کے کشمیرمیں تسلط قائم کیے ہوئے۔

جون 2, 2020
24گھنٹوں کے دوران پنجاب میں 807 ٹریفک حادثات، 9 افراد جاں بحق سیکڑوں زخمی

لاہور : گزشتہ24گھنٹوں کے دوران پنجاب بھرمیں807روڈ ٹریفک حادثات ہوئےجس میں09افراد جاں بحق جبکہ 892افراد شدید زخمی ہوگئے، سب سے زیادہ حادثات موٹر سائیکلوں کے ہوئے۔

پنجاب ایمرجنسی سروس کی رپورٹ میں کہا گیا ہے کہ ریسکیو 1122کے صوبائی مانیٹرنگ سیل کو موصول ہونے والی ایمرجنسی کالز کے مطابق ان ٹریفک حادثات370ڈرائیوز،کم عمرڈرائیور29مسافر374اور157پیدل چلنے والے افراد متاثر ہوئے۔

اعداد و شمار سے ظاہر ہوتا ہے کہ206ٹریفک حادثات کی فون کالز لاہور کنٹر ول روم میں موصول ہوئیں، جن میں صوبائی درالحکومت232متاثرین کے ساتھ پہلے فیصل آباد 75حادثات میں 83متاثرین کے ساتھ دوسرے اور ملتان64حادثات میں63متاثرین کے ساتھ تیسرے نمبر پر رہا۔

ان ٹریفک حادثات کے کل901متاثرین میں719مرد اور182خواتین شامل ہیں جبکہ زخمی ہونے والوں میں183افراد کی اوسط عمر18سال سے کم اور 490افراد کی اوسط عمر 18سے 40سال کے درمیان جبکہ228زخمی افراد کی اوسط عمر 40سال سے زائد ہے۔

ان ٹریفک حادثات کے بیشتر واقعات میں675موٹر سائیکلوں،115آٹو رکشے،77موٹر کاریں،27وین7مسافر بسیں،22ٹرک اور82دوسری اقسام کی گاڑیاں شامل ہیں۔

جولائی 20, 2019
دبئی: پولیس نے خاتون کے قتل کا معمہ 24 گھنٹوں میں حل کردیا

دبئی : ال براحہ کی عمارت سے مردہ حالت میں ملنے والی افریقی خاتون کے قتل کا معمہ 24 گھنٹے میں حل کرتے ہوئے قتل میں ملوث پاکستانی شخص کو گرفتار کر لیا۔

تفصیلات کے مطابق متحدہ عرب امارات کے شہر دبئی میں واقع ال براحہ اپارٹمنٹ میں ایک افریقی خاتون کو قتل کرنے کے الزام میں پولیس نے پاکستان سے ملازمت کی غرض سے یو اے ای میں مقیم شخص کو گرفتار کرلیا ہے۔

دبئی پولیس کے اسسٹنٹ کمانڈر انچیف میجر جنرل خلیل المنصوری کا کہنا ہے کہ گذشتہ اپارٹمنٹ کے سیکیورٹی گارڈ نے فلیٹ میں ناگوار تعفن اٹھنے پر پولیس کو اطلاع دی تھی۔

ان کا کہنا تھا کہ پولیس کو فلیٹ کی تلاشی کے دوران ایتھوپین خاتون کی لاش ملی تھی، مقتول کو چند روز قبل قتل کیا گیا تھا جس کے باعث نعش بہت زیادہ خراب ہوچکی تھی۔

میجر خلیل المنصوری نے بتایا کہ متاثرہ خاتون ایتھوپیا کی رہائشی تھی اور وزٹ ویزے پر دبئی میں مقیم تھی، جس کے ال عین میں رہائش پذیر پاکستانی شخص کے ساتھ قریبی تعلقات تھے۔

پولیس ترجمان کا کہنا تھا کہ گرفتار کئے گئے ملزم نے دوران تفتیش اعتراف کیا کہ پچھلے کچھ ماہ سے مقتولہ سے ناجائز تعلقات تھے۔

پولیس حراست میں ملزم بتایا کہ واردات سے پہلے مقتولہ کے ساتھ دو بار مکروہ فعل انجام دیا، جس کے عوض 200 درہم بھی ادا کیے تھے اور صبح تک رکنے کی خواہش ظاہر کی جس پر اس نے مزید 200 درہم کی رقم کا مطالبہ کیا تھا۔

پولیس حراست میں ملزم نے کہا کہ ’میں نے خاتون کی جانب سے مزید رقم کا مطالبہ کرنے پر گلا دبا کر قتل کیا اور مقتولہ کے دو موبائل، 450 درہم اور دیگر اشیاء لے کر فرار ہوگیا تھا۔

پولیس کمانڈر انچیف نے بتایا کہ دبئی پولیس نے مذکورہ قتل کیس کی تحقیقات 24 گھنٹوں میں مکمل کرکے قاتل کو گرفتار کرلیا ہے۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

اپریل 21, 2018
لاہور ہائیکورٹ کی زینب کے قاتل کی گرفتاری کے لئے مزید 48 گھنٹوں کی مہلت

لاہور : لاہور ہائیکورٹ نے زینب کے قاتل کی گرفتاری کے لئے آئی جی پنجاب کو 48 گھنٹوں کی مزید مہلت دے دی، چیف جسٹس نے ریمارکس دیتے ہوئے کہا ہے کہ اگر پولیس پہلے واقعات کے بعد سنجیدہ اقدامات کرتی تو زینب اور دیگر بچیوں کو بچایا جا سکتا تھا۔

تفصیلات کے مطابق لاہور ہائیکورٹ کے چیف جسٹس سید منصور علی شاہ کی سربراہی میں دو رکنی بنچ نے کیس کی سماعت کی۔ آئی جی پنجاب قصور میں مصروفیت کی بناء پر عدالت پیش نہ ہوئے۔

ایڈیشنل آئی جی کی جانب سے عدالت میں رپورٹ پیش کی گئی۔

ایڈیشنل آئی جی نے کہا کہ زینب کے ملزم کی گرفتاری کے لئے تفتیشی ٹیمیں تشکیل دے دی گئی ہیں جلد ملزم تک پہنچ جائیں گے۔

انہوں نے عدالت کو بتایا کہ پنجاب میں گذشتہ دو برسوں میں دس سال سے کم عمر بچوں اور بچیوں سے زیادتی کے تیرہ سو چالیس واقعات پیش آئے، قصور شہرمیں دو برسوں کے دوران چوبیس کم سن بچوں اور بچیوں کو جنسی تشدد کا نشانہ بنایا گیا۔

آئی جی کی رپورٹ میں کہا گیا کہ زینب کا قتل کرنے والا سیریل کلر ہے، قتل کرنے والےشخص کی ڈی این اے کی رپورٹ آگئی، زینب کاقاتل وہی ہےجس نے پہلے 7بچیوں کوقتل کیا، سیریل کلر نے پہلا قتل جون2015میں کیا۔

ڈی جی فرانزک سائنس لیبارٹری نے عدالت کو آگاہ کیا کہ گذشتہ چھ دنوں میں گیارہ سو مشتبہ افراد سے پوچھ گچھ کی گئی، چھیانوے مشتبہ افراد کے ڈین این اے کے نمونے لئے گئے۔

چیف جسٹس منصورعلی شاہ نے ریمارکس دیتے ہوئے کہا کہ بچے سب کے سانجھے ہیں ، پہلےملزم کوگرفتارکرنےکیلئےکارروائی کیوں نہیں کی گئی، 4ماہ میں صرف67لوگوں کاڈی این اےٹیسٹ ہوا، اب 100،100افرادکاڈی این اےٹیسٹ کیاجارہاہےاگر پہلے سنجیدہ اقدام ہوتا توآج زینب زندہ ہوتی۔

ڈی جی فرانزک نے بتایا کہ 200افرادکےڈی این اےٹیسٹ کیےمگرمیچ نہیں ہوا ملزم قصورمیں ہے توبچ نہیں پائے گا۔

عدالت نے قصور میں دو چائلڈ کورٹس تشکیل دیتے ہوئے بچوں سے زیادتی کے مقدمات کی روزانہ کی بنیاد پر سماعت کی ہدایت کر دی جبکہ عدالت نے قصور میں جنسی زیادتی کا شکار ایک اور بچی کائنات کا مکمل علاج کروانے کا حکم دے دیا۔

مزید پڑھیں : چیف جسٹس لاہور ہائیکورٹ کا زینب کے قاتل کو گرفتار کرنے کیلئے 36گھنٹے کا الٹی میٹم

عدالت نے کیس کی سماعت سترہ جنوری تک ملتوی کرتے ہوئے آئی جی پنجاب، جے آئی ٹی کے سربراہ، سیکرٹری صحت پنجاب اور سیکرٹری ایجوکیشن کو ذاتی حیثیت میں طلب کر لیا۔

یاد رہے گذشتہ سماعت میں چیف جسٹس لاہور ہائیکورٹ نے آئی جی پنجاب کو قصور میں سات سالہ بچی کے قاتل کو گرفتار کرنے کے لئے چھتیس گھنٹے کا الٹی میٹم دیتے ہوئے پنجاب بھر میں معصوم بچیوں اور بچوں سے زیادتی کے تمام مقدمات کا ریکارڈ طلب کر لیا تھا۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

جنوری 15, 2018
اسنیپ چیٹ کا نیا فیچر‘ واٹس ایپ کے لیے خطرہ

سان فرانسسکو: سماجی رابطے کی ویب سائٹ اسنیپ چیٹ واٹس ایپ و دیگرپر سبقت حاصل کرنے اور صارفین کی توجہ حاصل کرنے کے لیے اپیلیکشن میں نت نئے فیچرز متعارف کروارہی ہے‘ اس بار انتظامیہ نے اسنیپ چیٹ میں صارفین کے لیے گروپ چیٹ کی سہولت متعارف کروائی ہے۔

تفصیلات کے مطابق فیس بک ‘ واٹس ایپ کے مد مقابل سماجی رابطے کی معروف موبائل ایپلیکشن اسنیپ چیٹ نے پہلی بار صارفین کے لیے گروپ چیٹ کی سہولت متعارف کروائی ہے جس کے بعد واٹس ایپ کے لیے مقابلہ مزید سخت ہوگیا ہے۔

اسنیپ چیٹ کی انتظامیہ نے اعلان کیا ہے کہ ’’موبائل ایپلیکشن میں گروپ چیٹ کی سہولت متعارف کروائی گئی ہے جس کے تحت اب 16 صارفین ایک گروپ میں موجود رہ کر چیٹ کرسکیں گے اور اسکرین کے نیچے دیکھا جاسکے گا کہ گروپ میں کون سے ممبران آن لائن ہیں‘‘۔

پڑھیں: ’’ فیس بک کا’اسنیپ چیٹ ‘کے لیے میدان سخت کرنے کا فیصلہ ‘‘

اسنیپ چیٹ نے صارفین کو ہر شخص سے علیحدہ چیٹ کے لیے علیحدہ سے آپشن بھی فراہم کیا ہے تاہم اس کی خصوصیت یہ ہے کہ ممبران کی جانب سے گروپ میں بھیجی جانے والی تصاویر اور ویڈیوز 24 گھنٹے بعد خود ڈیلیٹ ہوجائیں گی۔

اسنیپ چیٹ گروپ میں بھیجی جانے والی ویڈیو صرف ایک بار ہی دیکھی جاسکے گی‘ جبکہ اگر کوئی صارف چوبیس گھنٹے کے دوران پیغام کو نہیں دیکھ سکا تو بھیجا جانے والا پیغام پالیسی کے حساب سے خود بہ خود غائب ہوجائے گا۔

علاوہ ازیں اسنیپ چیٹ نے چند فیچرز متعارف کروائے ہیں جن میں اسٹیکرز سے تصویر سجانے‘ پینٹ برش کے استعمال سے تصویر کو نیا رخ دینے کی سہولت فراہم کی گئی ہے۔

دسمبر 13, 2016
یمن:24گھنٹے میں سعودی اتحادی فوج کے حوثی قبائل پر 106حملے

یمن: سعودی اتحادی افواج نے حوثی قبائل کے ٹھکانوں پر چوبیس گھنٹے کے دوران ایک سو چھ حملے کیے، حوثی قبائل نے حملوں کا ڈٹ کر مقابلہ کرنے کے عزم کا اظہار کردیا ہے۔

یمن میں سعودی اتحادی افواج نے حوثی قبائل کے خلاف حملے تیز کردیئے ہیں، سعودی اتحادی افواج کے ترجمان جنرل احمد اسیری کے مطابق حوثی قبائل کے ٹھکانوں پر چوبیس گھنٹے کےدوران ایک سو چھ حملے کیےگئے ہیں جبکہ حوثی قبائل کے بیلسٹک میزائل نظام کو نوے فیصد تک تباہ کر دیا گیا ہے۔

یمنی حکام کے مطابق دالیح، شبوہ اور تعز میں سابق صدر ہادی کے حامیوں اور حوثی قبائل میں جھڑپوں کے دوران اڑتالیس حوثی قبائل کے ارکان مارے گئے جبکہ چھبیس حامی بھی ہلاک ہوئے ۔

حوثی قبائل کی قیادت نے بیان جاری کرتے ہوئے کہا ہے کہ سعودی حملوں کا ڈٹ کر مقابلہ کریں گے ۔

ایران کےفوجی حکام کا کہنا ہے کہ حوثی قبائل سعودی حملوں کا مقابلہ کرنے کی صلاحیت رکھتے ہیں، سعودی عرب کو یمن میں زمینی حملے میں ناکامی کا سامنا کرنا پڑے گا۔

اقوام متحدہ نے یمن میں سنگین انسانی بحران سے نمٹنے کےلیے ستائیس کروڑ چونتیس لاکھ ڈالر کی فوری امداد کی اپیل کی ہے۔

اپریل 20, 2015
محکمہ موسمیات نے کراچی میں بارش کی پیش گوئی کردی

کراچی : شہریوں کا انتظار ختم ہوا اب کراچی میں بھی بادل کھل کر برسیں گے۔ چوبیس گھنٹوں کے دوران کراچی میں بارش کا امکان کے مطابق کراچی اور ساحلی علاقوں میں جمعرات سے بارشوں کا نیا سلسلہ شروع ہوگا، کہیں گر می کا زور برقرار ہے تو کہیں بارش سے موسم خوشگوار کراچی والوں کو شدت سے بارش کا انتظار ہے ۔ اب انتظار ختم ہوگاکیونکہ محکمہ موسمیات نے کراچی والوں کو خوشی کی نوید سنادی ۔

آئندہ چوبیس گھنٹے کے دوران سندھ بھر میں مون سون کا نیا سسٹم داخل ہوگا ۔جس سے سندھ کے مشرقی علاقوں میں بارش کا امکان ہے ۔ جبکہ کراچی اور ساحلی علاقوں میں جمعرات سے بارشوں کا سلسلہ شروع ہوگا۔اندرون سندھ ابر آلود موسم نے گرمی کی شدت کو کم کیا۔جس سے گرمی سے بلبلائے شہریوں نے سکھ سانس لیا ہے۔

جبکہ راولپنڈی، گوجرا نوالہ، سرگودھا، ساہیوال اور ملتان سمیت پنجاب کے مختلف شہروں میں بھی بارش کی پیش گوئی کی گئی ہے ۔ آئندہ چوبیس گھنٹے کے دوران خیبر پختونخوا،گلگت بلتستان اور کشمیر بادلوں کے سائے میں رہیں گے،تاہم بیشتر شہروں میں موسم گرم اور مرطوب رہنے کی توقع ہے۔

اگست 5, 2014
ملک کے بیشترعلاقوں میں موسم گرم اورمرطوب رہے گا

ملک کے مختلف شہروں میں گرمی نے ایک بار پھر زور پکڑ لیاہے۔ محکمہ موسمیات نے کشمیر، گوجرانوالہ اور میرپورخاص میں بعض مقامات پر بارش کی پیشگوئی کی ہے۔ ملک بھر میں موسم کے تیور الگ ہیں۔کہیں سورج آگ برسا رہا ہے اور کہیں بادل برسنے کا امکان ہے۔ مختلف شہروں میں شدید گرمی نے شہریوں کو پریشان کر رکھا ہے۔

محکمہ موسمیات کے مطابق آئندہ چوبیس گھنٹے کے دوران ملک کے بیشتر علاقوں میں موسم گرم اور مرطوب رہیگا تاہم کشمیر، گوجرانوالہ اور میرپورخاص سمیت بعض مقامات پر تیز ہوائوں اور گرج چمک کے ساتھ بارش کا امکان ہے۔ گزشتہ چوبیس گھنٹے کے دوران ملک کے بیشتر علاقوں میں موسم گرم اور مرطوب رہا تاہم بالائی پنجاب، خیبرپختونخوا، کشمیر، گلگت اور بالائی پہاڑی علاقوں میں چند مقامات پر بارش بھی ہوئی ۔

جس سے گرمی کی شدت میں کچھ حد تک کمی دیکھنے میں آئی۔گزشتہ چوبیس گھنٹے کے دوران سب سے زیادہ درجہ حرارت نوکنڈی میں چھیالیس، دالبندین ،سبی اور دادو میں پینتالیس،نوابشاہ میں چوالیس ڈگری سینٹی گریڈ رہا۔

جولائی 22, 2014
ملک کےبیشترعلاقوں میں مطلع صاف رہےگا،محکمہ موسمیات

اسلام آباد :ملک بھرمیں موسم کے بدلتی رت نے کہیں شہریوں کوگرمی سے پریشان کررکھاہے تو متعددعلاقوں میں برستے بادل نے روزے آسان بنادیئے ہیں ۔موسم کے نرالے رنگ ہیں۔ کہیں برسات ہورہی ہے،تو کہیں سورج آگ برسا رہا ہے ۔ ملک کے بیشتر علاقوں میں مطلع صاف ہے جبکہ شمالی علاقوں کشمیر، گلگت بلتستان اور کراچی میں بادل چھائے ہوئے ہیں۔

محکمہ موسمیات کا کہنا ہے کہ آئندہ چوبیس گھنٹوں کے دوران ملک کےبیشترعلاقوں میں مطلع صاف رہےگاتاہم کشمیر،گوجرانوالہ، راولپنڈی، لاہور، ڈی جی خان،ملتان،ساہیوال،مالاکنڈ،ہزارہ،پشاور،ڈی آئی خان اورمیرپورخاص ڈویژن میں چند ایک مقامات پر گرج چمک کے ساتھ بارش کا امکان ہے۔گزشتہ چوبیس گھنٹوں کے دوران ملک کے بیشترعلاقوں میں موسم گرم اورمرطوب رہا۔

جبکہ راولپنڈی،لاہور،گوجرانوالہ،فیصل آباد،اوکاڑہ،ساہیوال، مالاکنڈ ڈویژن اورکشمیرمیں چندایک مقامات پربادل کھُل کربرسے۔ حویلی لکھا میں بھی صبح سویرے تیزہواؤں کے ساتھ ہونے والی بارش نے موسم خوشگواربنادیا۔ اورروزہ داروں کے چہرے کھل اُٹھے۔ سب سے زیادہ بارش اوکاڑہ میں چالیس ملی میٹرریکارڈ کی گئی۔

جولائی 20, 2014