نئی دہلی: بھارتی ریاست ہماچل پردیش میں مسافر بس کھائی میں جاگری جس کے نتیجے میں 25 افراد ہلاک ہوگئے۔
بھارتی میڈیا کے مطابق بھارتی ریاست ہماچل پردیش میں مسافر بس کھائی میں گرنے سے 25 افراد ہلاک اور 35 زخمی ہوگئے، بس بنجار سے گداگوشانی کی طرف جارہی تھی۔
مسافر بس میں 50 افراد سوار تھے، پولیس حکام کا کہنا ہے کہ حادثے میں زخمی ہونے والوں کو طبی امداد کی فراہمی کے لیے اسپتال منتقل کردیا گیا ہے۔
سپرنٹنڈنٹ آف پولیس شالنی اگنی ہوتری نے اندوہناک حادثے کے نتیجے میں 25 افراد کی ہلاکت اور 35 افراد کے زخمی ہونے کی تصدیق کی ہے۔
بھارتی وزیراعظم نریندر مودی نے بس حادثے میں انسانی جانوں کے ضیاع پر شدید دکھ کا اظہار کرتے ہوئے متاثرہ خاندانوں سے ہمدردی کا اظہار کیا ہے۔
Deeply saddened by the bus accident in Kullu. Condolences to the families of those who lost their lives. I hope the injured recover soon. The Himachal Pradesh Government is providing all possible assistance that is required: PM @narendramodi
— PMO India (@PMOIndia) June 20, 2019
نریندری مودی کا اپنے ٹویٹ میں کہنا تھا کہ ہماچل پردیش کی حکومت اس معاملے پر مکمل تعاون کررہی ہے۔
مزید پڑھیں: بھارت میں ہندو یاتریوں کی بس کھائی میں جاگری، 55 افراد ہلاک
واضح رہے کہ گزشتہ سال ستمبر میں بھارتی ریاست تلنگانا میں ہندو یاتریوں کو لے جانے والی بس موڑ کاٹتے ہوئے کھائی میں جاگری تھی جس کے نتیجے میں 55 افراد ہلاک اور متعدد زخمی ہوگئے تھے۔
خیال رہے کہ بھارت میں خستہ حال سڑکوں، ٹوٹی پھوٹی گاڑیوں اور ڈرائیونگ کے دوران غفلت برتنے کی وجہ سے ہر سال ڈیڑھ لاکھ سے زائد افراد جان کی بازی ہار جاتے ہیں۔
محکمہ موسمیات کے مطابق بھارت میں غیر معمولی بارشوں کی وجہ سے موسمی تغیر ہے، ماحولیاتی تبدیلیوں سے زمین کا درجہ حرارت ہی تبدیل نہیں ہورہا بلکہ موسموں کی ترتیب اور انداز پر مرتب ہورہے ہیں۔
