اسلام آباد : 27 یوٹیوب چینلز کی بندش کے فیصلے میں اہم پیش رفت سامنے آئی، عدالت نے 2 یو ٹیوب چینلز کی حد تک بندش کا حکم معطل کر دیا۔
تفصیلات کے مطابق اسلام آباد کی عدالت میں 27 یو ٹیوب چینلز کی بندش کے فیصلے کیخلاف اپیل پر سماعت ہوئی۔
ایڈیشنل ڈسٹرکٹ اینڈسیشن جج افضل مجوکہ نے اپیل پر سماعت کی ، وکلا صفائی نے کہا کہ ضابطہ کی کارروائی مکمل کئے بغیر یوٹیوب چینلز کی بندش کے احکامات دیئے گئے۔
جس پر ایڈیشنل ڈسٹرکٹ اینڈسیشن جج نے 2 یو ٹیوب چینلز کی حد تک بندش کا حکم معطل کر دیا۔
مزید پڑھیں : 27 معروف یوٹیوب چینلز بلاک کرنے کا حکم
یاد رہے عدالت نے ایف آئی اے کی درخواست پر دو صفحات کا تحریری حکم نامہ جاری کیا تھا ، جس میں 27 معروف یوٹیوب چینلز بلاک کرنے کا حکم دیا تھا۔
حکم نامے میں کہا گیا تھا شواہد کی بنیاد پر عدالت سمجھتی ہے، معاملہ پیکا ایکٹ اور تعزیرات پاکستان کے تحت قابل سزا جرم ہے۔
عدالت نے اپنے فیصلے میں یوٹیوب کے افسر انچارج کو حکم دیا تھا کہ مذکورہ ستائیس چینلز کو مکمل طور پر بند کرے۔
تحریری حکم نامے کے مطابق مطیع اللہ جان ، صابر شاکر ، عبد القادر ، حیدر مہدی ، عمران ریاض ، اوریا مقبول جان ، مخدوم شہاب الدین، وجاہت سعید خان، عبدالقادر، ساجد گوندل، اسد طور ، صدیق جان کے علاوہ پاکستان تحریک انصاف ، نیا پاکستان اور ڈیلی قدرت کے یوٹیوب چینلز بند کرنے کا حکم دیا گیا تھا۔