Tag: 28 مئی

اسلام آباد: سابق وزیر خارجہ خواجہ آصف نے کہا ہے کہ آج ذوالفقار علی بھٹو اور نواز شریف کو یاد کرنے کا دن ہے، دو منتخب وزرائے اعظم نے پاکستان کا نام بلند کیا۔

تفصیلات کے مطابق قومی اسمبلی اجلاس سے خطاب کرتے ہوئے ن لیگی رہنما نے کہا کہ آج یوم تکبیر ہے، جس شخص نے یہ پروگرام شروع کیا وہ پھانسی چڑھ گیا، جس نے تکمیل کی وہ جیل میں ہے۔

خواجہ آصف کا کہنا تھا کہ آج ہم نہ نظریاتی طور پر آزاد ہیں نہ معاشی طورپر، ایوان میں بیٹھے افراد پر ملک میں جمہوریت اور نظریاتی سرحدوں کی حفاظت کا فرض عاید ہوتا ہے۔

انھوں نے کہا کہ ہمیں آج دشمنوں نے گھیرا ہوا ہے، موقع دیا جاتا تو پاکستان معاشی طور پر مستحکم ہو چکا ہوتا، ہمیں معاشی غلام بنایا جا رہا ہے، زنجیروں میں جکڑا جا رہا ہے۔

یہ بھی پڑھیں:  چیئرمین نیب کو بلیک میل کرنے کے واقعے پر خصوصی کمیٹی تشکیل دی جائے: خواجہ آصف

آج نواز شریف کوٹ لکھپت جیل میں ہے اس کو یاد کرنے کا دن ہے، سلسلہ چلتا رہتا تو آج پاکستان جمہوری اور معاشی لحاظ سے نا قابل تسخیر ہوتا۔

خیال رہے گزشتہ روز قومی اسمبلی میں خطاب کے دوران انھوں نے کہا تھا کہ میرانشاہ واقعے پر کسی نے کچھ نہیں کہا، واقعے پر کچھ نہ کہنا پارلیمنٹ کی توہین ہے، غلطیاں کرنے والے کہیں بھی ہوں ان کو سیاسی طور پر ٹھیک کریں، لوگ ایوان میں مسئلے حل کرنے کے لیے بیٹھے ہیں۔

انھوں نے کہا کہ حکومت اس معاملے میں خاموش رہ کر افواج اور وہاں کی عوام کے ساتھ زیادتی کر رہی ہے۔

اسلام آباد: وفاقی وزیر برائے مواصلات مراد سعید نے کہا ہے کہ نواز شریف ذاتی کرپشن سے جیل میں ہیں، اس کا 28 مئی سے کوئی تعلق نہیں ہے۔

تفصیلات کے مطابق قومی اسمبلی اجلاس سے خطاب کرتے ہوئے مراد سعید نے کہا کہ 28 مئی کو ہمیں ڈاکٹر عبدالقدیر خان کو خراج تحسین پیش کرنا چاہیے، نواز شریف 28 مئی کی وجہ سے جیل نہیں گئے۔

مراد سعید نے اپوزیشن جماعت پر تنقید کرتے ہوئے کہا کہ ن لیگ اپنے دور میں کوئی ایسا اسپتال نہ بنا سکی جہاں خود نواز شریف کا علاج ہوتا، نواز شریف کرپشن کی وجہ سے آج جیل میں ہیں، 23 ہزار ارب روپے کا قرض بتایا جائے کیسے چڑھا؟

انھوں نے کہا کہ پاکستان کو جن بحرانوں میں انھوں نے ڈالا تھا اب ان سے عمران خان نکالیں گے، جب ہم احتساب کی بات کرتے ہیں تو یہ شور شروع کر دیتے ہیں، اگر یہ سن سن کر تھک گئے ہیں تو ہم سہ سہ کر تھک چکے ہیں۔

خیال رہے کہ جب مراد سعید اسمبلی کے فورم پر تقریر کرنے لگے تو اس دوران ن لیگ کے ارکان نے شور شرابا اور نعرے لگانے شروع کر دیے۔

وفاقی وزیر نے کہا کہ پاکستان کے اندرونی اور بیرونی خطرات سے مل کر نمٹنا ہوگا، مقابلہ اس وقت ہوگا جب ہم لسانیت اور قومیت سے بالا ہو کر سوچیں گے۔

مراد سعید نے کہا کہ آپ جتنا شور کریں گے، میں اتنا اچھے انداز میں بولوں گا، آرام سے سنیں، آپ عہد کریں لسانیت کے بجائے پاکستانیت پر چلیں تو ترقی کریں گے۔