لندن : برطانوی شہزادی ڈیانا کی بھتیجی و ماڈل کٹی اسپینسر نے خود سے 32 سال بڑے شخص سے منگنی کرلی۔
تفصیلات کے مطابق برطانیہ کی آنجہانی شہزادی لیڈی ڈیانا کی 29 سالہ نوجوان بھتیجی ماڈل و سماجی رہنما کٹی اسپینسر نے خود سے بڑی عمر کے شخص اور فیشن ڈیزائنر سے منگنی کرلی ہے۔
کٹی اسپینسر شہزادہ ہیری اور ولیم کی والدہ کی جانب سے کزن ہیں جب کہ وہ اپنے معاشقوں کی وجہ سے کافی شہرت رکھتی ہیں۔
فیشن سے متعلق جریدے ‘ہیلو’ کا اپنی رپورٹ میں کہنا تھا کہ 29 سالہ کٹی اسپینسر نے جنوبی افریقن نژاد فیشن ڈیزائنر 61 سالہ مائیکل لیوس سے منگنی کرلی۔
فیشن میگزین نے اپنی رپورٹ میں برطانوی اخبار کا حوالہ دیتے ہوئے کہا کہ عمر رسیدہ فیشن ڈیزائنر نے مئی 2019 میں نوجوان ماڈل کو شادی کی پیش کش کی تھی۔
غیر ملکی خبر رساں ادارے کا کہنا تھا کہ منگنی سے قبل کٹی اسپینسر گزشتہ ماہ دسمبر میں جنوبی افریقہ روانہ ہوئی تھیں اور کرسمس کے موقع پر انہوں نے کیپ ٹاوٓن سے مداحوں کے ساتھ تصاویر بھی شیئر کی تھیں۔
اگرچہ خود کٹی اسپینسر یا مائیکل لیوس نے منگنی کے حوالے سے کوئی وضاحت نہیں کی تاہم برطانوی اخبارات کے مطابق دونوں نے نئے سال کے آغاز پر اپنی دوستی کو رشتے میں بدلا۔
برطانوی خبر رساں ادارے نے نوجوان ماڈل کی عمر رسیدہ فیشن ڈیزائنر سے منگنی کی خبروں کو شہ سرخی کے انداز میں شائع کرتے ہوئے بتایا کہ نوجوان ماڈل فیشن ڈیزائنر سے جلد سے جلد شادی کرنے کے لیے بھی تیار ہیں۔
رپورٹس میں بتایا گیا کہ کٹی اسپینسر کے منگیتر کی دولت 10 کروڑ ڈالر سے زائد ہے اور ان کی پہلی شادی ناکام ہوچکی تھی۔
رپورٹس کے مطابق کٹی اسپینسر کے منگیتر کے تین نوجوان بچے ہیں اور ان کے ماضی میں بھی دیگر ماڈلز و خواتین کے ساتھ تعلقات رہے ہیں جبکہ شہزادی ڈیانا کی بھتیجی کا بھی اس سے قبل خود سے 18 برس بڑے شخص سے تعلق تھا۔
کٹی اسپینسر شہزادی لیڈی ڈیانا کے بڑے بھائی صحافی، لکھاری و سماجی رہنما 55 سالہ چارلز ایڈورڈ، جنہیں عام طور پر ارل اسپینسر بھی کہا جاتا ہے، کی صاحبزادی ہیں۔
