کوئٹہ : بلوچستان سے پنجاب جانیوالی قومی شاہراہ پر دوگھنٹوں کے دوران مسافر بسیں الٹنے کے دو واقعات میں انتیس افراد زخمی ہوگئے۔
تفصیلات کے مطابق بلوچستان سے پنجاب جانیوالی قومی شاہراہ پر 2 گھنٹے کے دوران 2مسافربسیں حادثے کا شکار ہوگئیں۔
کوئٹہ سے ژوب جانیوالی کوچ قومی شاہراہ پر ضلع پشین کے علاقے خانوزئی میں مزداٹرک کو بچاتے ہوئے کھائی میں گرگئی ، جس کے نتیجے میں پندرہ مسافر زخمی ہوگئے تاہم زخمیوں کو ہسپتال منتقل کردیا گیا۔
مذکورہ حادثہ کے ڈیڑھ گھنٹے بعد اسی شاہراہ پر ضلع قلعہ سیف اللہ کے علاقے مسلم باغ میں ایک اور مسافر بس الٹ گئی۔
کوئٹہ سے مسافروں کو لیکر لاہور جانیوالی بس تیز رفتاری کے باعث حادثے کا شکار ہوئی، جس کے باعث چودہ مسافر زخمی ہوگئے۔
زخمیوں کو تحصیل ہیڈ کوارٹر ہسپتال مسلم باغ لے جایا گیا جہاں سے سات شدید زخمیوں کو کوئٹہ منتقل کردیا گیا، جن میں سے چار کی حالت تشویشناک بتائی گئی ہے۔
