ARYNews.tv | Urdu – Har Lamha Bakhabar

Tag: 3

  • انگلینڈ کو اگلے 3 ورلڈ ٹیسٹ چیمپئن شپ فائنل کی میزبانی مل گئی

    انگلینڈ کو اگلے 3 ورلڈ ٹیسٹ چیمپئن شپ فائنل کی میزبانی مل گئی

    سنگاپور (20 جولائی 2025): آئی سی سی نے انگلینڈ کو 2031 تک ہونے والے اگلے تین ورلـڈ ٹیسٹ چیمپئن شپ کی میزبانی سونپ دی ہے۔

    اے اسپورٹس میں شائع خبر کے مطابق انٹرنیسنل کرکٹ کونسل (آئی سی سی) کا سالانہ اجلاس سنگاپور میں ختم ہو گیا۔ اختتامی روز ورلڈ ٹیسٹ چیمپئن شپ سے متعلق بڑا فیصلہ کرتے ہوئے 2031 تک اگلے تینوں ورلڈ ٹیسٹ چیمپئن شپ کے فائنل کی میزبانی انگلینڈ کو سونپ دی گئی۔

    آئی سی سی کے اعلان کے مطابق انگلینڈ 2031 تک ورلڈ ٹیسٹ چیمپئن شپ (ڈبلیو ٹی سی) کے تینوں فائنل کی میزبانی کرے گا۔

    آئی سی سی کی سالانہ جنرل میٹنگ میں کرکٹ گورننگ باڈی نے یہ فیصلہ انگلینڈ کی جانب سے ڈبلیو ٹی سی فائنلز کے پچھلے ایڈیشنز کی کامیاب میزبانی کی روشنی میں کیا ہے۔

    انگلینڈ اس سے قبل 2021 کے افتتاحی ایڈیشن کے ساتھ ساتھ 2023 اور رواں برس 2025 ایڈیشن کی میزبانی کر چکا ہے۔

    سال 2021 میں ورلڈ ٹیسٹ چیمپئن شپ کے پہلے ایڈیشن کا فائنل دی روز باؤل ساؤتھمپٹن میں نیوزی لینڈ اور بھارت کے درمیان کھیلا گیا اور چیمپئن کا اعزاز کیویز نے حاصل کیا۔

    سال 2023 میں ورلڈ ٹیسٹ چیمپئن شپ کے دوسرے ایڈیشن کا فائنل اوول، لندن میں کھیلا گیا۔ بھارت نے مسلسل دوسری بار فائنل کھیلنے کا اعزاز حاصل کیا، لیکن چیمپئن بننے کا خواب پورا نہ ہوسکا۔ آسٹریلیا نیا ٹیسٹ چیمپئن بنا۔

    رواں برس 2025 میں لارڈز کے میدان میں ورلڈ ٹیسٹ چیمپئن شپ کے تیسرے ایڈیشن کے فائنل میں دفاعی چیمپئن آسٹریلیا کو ہرا کر جنوبی افریقہ نے پہلی بار ٹیسٹ چیمپئن بننے کا اعزاز حاصل کرنے کے ساتھ خود پر سے چوکر کا لیبل بھی ہٹا دیا۔

    ڈبلیو ٹی سی فائنل کے علاوہ، ویمنز ٹی ٹوئنٹی ورلڈ کپ 2026 انگلینڈ میں کھیلا جائے گا، جس کا فائنل 5 جولائی کو مشہور لارڈز کرکٹ گراؤنڈ میں کھیلا جائے گا۔

    اس کے علاوہ انٹرنیشنل کرکٹ کونسل کے اجلاس میں ٹمور اور زیمبیا کو آئی سی سی کی ایسوسی ایٹ رکنیت بھی دی گئی، جس کے بعد آئی سی سی کے ممبران کی تعداد 110 ہو گئی ہے۔

  • مسجد الحرام کی صفائی ستھرائی کے لئے ساڑے 3 ہزار خدام مقرر

    مسجد الحرام کی صفائی ستھرائی کے لئے ساڑے 3 ہزار خدام مقرر

    مسجد الحرام میں صفائی کا کام محض 35 منٹ میں مکمل کیا جاتا ہے اس دوران زائرین کے معمولات میں کوئی فرق نہیں پڑتا، عبادات کا سلسلہ جاری رہتا ہے۔

    سعودی خبر رساں ادارے کی رپورٹ کے مطابق مسجد الحرام اور مسجد نبوی صلی اللہ علیہ وآلہ وسلم کی دیکھ بھال کی جنرل اتھارٹی کا کہنا ہے ساڑھے تین ہزار کارکنوں پر مشتمل صفائی کارکنان کی ٹیمیں 12 خصوصی واشنگ اور 697 کلینگ مشینوں کی مدد سے امور انجام دیتی ہیں۔

    مسجدالحرام سے صفائی کے دوران یومیہ 70 ویسٹ جمع کیا جاتا ہے جو رش کے دنوں میں 100 ٹن تک بڑھ جاتا ہے۔ جسے تین ہزار سے زیادہ ویسٹ کنٹینرز میں منتقل کیا جاتا ہے۔

    اتھارٹی کے مطابق صفائی کا کام زائرین اور نمازیوں کی آمد ورفت کو متاثر کیے بغیر 24 گھنٹے جاری رہتا ہے، صفائی کے کاموں میں ماحول دوست مواد استعمال کیا جاتا ہے۔

    ان بہترین اقدامات کا اصل مقصد ضیوف الرحمن کی دیکھ بھال، ان کی صحت اور سیفٹی کو برقرار رکھنا تاکہ وہ آسانی اور آرام کے ساتھ اپنی عبادت ادا کرسکیں۔

    واضح رہے کہ مسجد الحرام میں جدید ترین فتویٰ روبوٹ متعارف کرا دیا گیا ہے جو متعدد زبانوں میں زائرین کو مذہبی سوالات کے جوابات دے گا۔

    رپورٹس کے مطابق مکہ مکرمہ میں اسلام کے سب سے مقدس مقام مسجد الحرام اس ماہ رمضان ایک جدید ترین روبوٹ متعارف کرا دیا گیا ہے جو اپنی خصوصیت کی بنا پر فتویٰ روبوٹ قرار دیا جا رہا ہے۔

    رپورٹ کے مطابق منارا بیکن نامی یہ روبوٹ بیک وقت متعدد زبانوں میں زائرین کو مذہبی سوالات کے جوابات دیتا اور نمازیوں کو مدد فراہم کرتا ہے۔

    یہ روبوٹ ایک حکومتی ڈیٹا بیس سے جوڑا گیا ہے اور اسی کی مدد سے شریعت سے متعلق رہنمائی فراہم کرتا ہے۔ سوال پوچھنے والوں کی مزید رہنمائی اور مدد کے لیے علما کے ساتھ ویڈیو کالز بھی کرواتا ہے۔

    مسجد الحرام میں کارڈیک الیکڑک شاک ڈیوائسز نصب

    روبوٹ کا ڈیزائن اسلامی طرز سجاوٹ سے ہم آہنگ ہے جو دو مقدس مساجد (مسجد الحرام اور مسجد نبوی ﷺ) کے فن تعمیر کی عکاسی کرتا ہے۔

    حرمین شریفین مذہبی امور ادارے کے سربراہ عبدالرحمن السدیس نے مصنوعی ذہانت سے چلنے والی مشین ”منارا (بیکن) روبوٹ“ کا افتتاح کیا۔

  • کراچی میں آن لائن ایپ پر چوری کی گاڑیاں فروخت کرنے والا 6 رکنی گروہ پکڑا گیا

    کراچی میں آن لائن ایپ پر چوری کی گاڑیاں فروخت کرنے والا 6 رکنی گروہ پکڑا گیا

    کراچی : آن لائن ایپ پرچوری کی گاڑیاں فروخت کرنے والا6 رکنی گروہ پکڑا گیا، ملزمان رینٹ آکار سےگاڑی لے کر ڈپلیکیٹ چابی بنالیتے تھے۔

    تفصیلات کے مطابق ایس ایس پی اے وی ایل سی نے سی پی ایل سی حکام کے ہمراہ پریس کانفرنس کی۔

    ایس ایس پی عارف اسلم راؤ نے بتایا کہ آن لائن ایپ پرچوری کی گاڑیاں فروخت کرنےوالا6 رکنی گروہ کو پکڑا ہے ، ملزمان رینٹ آکار سےگاڑی لے کر ڈپلیکیٹ چابی بنالیتے تھے۔

    عارف اسلم راؤ کا کہنا تھا کہ ملزمان کار واپس کرتے وقت ٹریکر بھی لگا دیتے تھے اور کار چوری کرکے چیسس اور انجن نمبر تبدیل کردیا جاتا تھا،۔

    انھوں نے بتایا کہ اپریل میں موٹرسائیکل اسنیچنگ لفٹنگ میں واضح کمی ہوئی، موٹرسائیکل اسنیچنگ 12ماہ کی کم ترین سطح پر پہنچ گئی۔

    ، عارف اسلم راؤ نے مزید کہا کہ نئی موٹرسائیکلیں چھیننے والےگروہ کے ملزمان کو گرفتار کیا ہے، ملزمان سے2لاکھ نقدی 2نئی موٹرسائیکلیں برآمدکی گئیں۔

    ایس ایس پی کا کہنا تھا کہ گرفتار ملزمان نےموبائل ایپ سے 5 لاکھ ٹرانسفر کیے تھے۔

    بن قاسم سےاسلحے کےزور پر ٹرالر چھیننے والا ملزم گرفتار کیا، تھانہ ملیر کینٹ کی حدود سے وین اور ٹرک چھینے والے 3 ملزمان گرفتارکئے، ملزمان کو حب ساکران سے پکڑا اور گاڑیاں برآمد کی گئیں

    پنجاب کابدنام زمانہ کارلفٹر اورکراچی پولیس کو انتہائی مطوب ملزم گرفتارہوا، ملزم سےٹریکر ناکارہ بنانے والا جیمرنمبرپلیٹس اور دیگر سامان برآمد کیا ہے۔

  • 9 مئی میں براہ راست کون ملوث تھا؟ تحقیقاتی رپورٹ میں اہم انکشاف

    9 مئی میں براہ راست کون ملوث تھا؟ تحقیقاتی رپورٹ میں اہم انکشاف

    اسلام آباد : سانحہ 9 مئی کی تحقیقاتی رپورٹ سامنے آگئی، جس میں اہم انکشاف کیا گیا ہے۔

    تفصیلات کے مطابق وزیراعظم شہبازشریف کی زیرصدارت وفاقی کابینہ کا خصوصی اجلاس ہوا ، جس میں اعظم نذیر تارڑ نےنگراں دور حکومت میں 9 مئی کی تحقیقات پر قائم کمیٹی کی رپورٹ پیش کی۔

    ذرائع نے بتایا کہ رپورٹ میں تحریک انصاف کے 9 مئی میں براہ راست ملوث ہونے کا انکشاف ہوا ،جس کے بعد
    رپورٹ کی روشنی میں وفاقی کابینہ کا قانون سازی کرنے کا فیصلہ کرلیا۔

    ذرائع کا کہنا تھا کہ کابینہ اراکین نے متفقہ طور پر 9مئی کےعناصر کیخلاف مقدمات منطقی انجام تک پہنچانے کا مطالبہ کیا۔

    اجلاس کے میں اراکین نے سوال کیا کہ کیپٹل ہل میں ملوث عناصر کو سزا ہوئی تو9 مئی کے مجرمان کو ابتک کیوں نہ ہوئی؟

    ذرائع کے مطابق رپورٹ پارلیمنٹ میں پیش کرنے کا فیصلہ،ایوان میں بھی 9مئی واقعات پربحث کرائی جائے گی۔

    بعد ازاں وزیر اطلاعات عطا تارڑ نے اے آر وائی نیوز سے گفتگو میں بتایا کہ سانحہ 9مئی کی تحقیقاتی رپورٹ کابینہ اجلاس میں پیش کردی گئی، تحقیقاتی رپورٹ میں پی ٹی آئی کو ذمہ دار ٹھہرایا گیا اور رپورٹ میں ذمہ داروں کے خلاف کارروائی کا مطالبہ کیا گیا ہے۔

    عطاتارڑ کا کہنا تھا کہ 9 مئی کےدلخراش واقعہ کی مذمت کیلئےخصوصی اجلاس بلایا گیاہے، سیاسی اورذاتی مفادات کی خاطر9مئی کووہ ہواجوکبھی دشمنوں نےبھی نہیں کیا۔

    وزیر اطلاعات نے بتایا کہ اجلاس میں پی پی، آئی پی پی،نیشنل پارٹی کوبھی خصوصی طورپر مدعو کیا گیا ہے، اجلاس میں 9 مئی کے حوالے سے قرارداد پیش کی جائے گی، وزارت قانون کی طرف سےوائٹ پیپربھی پیش کیا
    جائے گا۔

    ان کا مزید کہنا تھا کہ بانی پی ٹی آئی سےبہت رعایت برتی گئی،انکے بھانجے اور بہنیں بھی 9مئی میں ملوث ہیں، 9مئی کیسز کا فیصلہ کیوں نہیں کیا جارہا، کیوں کیس کو منطقی انجام تک نہیں پہنچایا جا رہا ہے۔

  • کراچی میں سیلز مین کو لوٹنے والے 2 ڈاکو چند گھنٹے میں گرفتار

    کراچی میں سیلز مین کو لوٹنے والے 2 ڈاکو چند گھنٹے میں گرفتار

    کراچی: سیلز مین کو لوٹنے والے 2 ڈاکو چند گھنٹے بعد ہی پولیس کے ہتھے چڑھ گئے، ملزمان سیلز مین سے نقدی اور موٹرسائیکل چھین کر فرار ہوئے تھے۔

    تفصیلات کے مطابق کراچی کے علاقے کورنگی میں سیلز مین کو لوٹنے والے 2 ڈاکوؤں کو چند گھنٹے میں گرفتار کرلیا گیا۔

    ایس ایس پی کورنگی حسن سردار نے بتایا کہ ملزمان نےآج صبح مہران ٹاؤن میں سیلزمین کولوٹ مارکانشانہ بنایا تھا اور سیلزمین سے نقدی اور موٹرسائیکل چھین کر فرار ہوگئے تھے۔

    حسن سردار کا کہنا تھا کہ کورنگی صنعتی ایریاپولیس نےسی سی ٹی وی کی مدد سے دونوں ملزمان کو گرفتار کرلیا، ملزمان سے 2 پستول، چھینی ہوئی موٹر سائیکل اور نقدی برآمد کی۔

    ایس ایس پی کورنگی نے کہا کہ گرفتارملزمان کی شناخت بلال وسیم اورفاطمہ وسیم کے نام سے ہوئی، لوٹ مارکی واردات کرنے والے دونوں ملزمان سگے بھائی ہیں۔

    ان کا کہنا تھا کہ ملزمان کورنگی میں مہران ٹاؤن اورکازوے ندی پر وارداتیں کرتے تھے تاہم دیگر مفرور ملزمان کی گرفتاری کے لیے چھاپے مارے جارہے ہیں۔

  • ملکی تاریخ کی بیرون ملک اسمگل کی جانے والی میتھ آئس کی بڑی کھیپ پکڑگئی

    ملکی تاریخ کی بیرون ملک اسمگل کی جانے والی میتھ آئس کی بڑی کھیپ پکڑگئی

    کراچی : ملکی تاریخ کی بیرون ملک اسمگل کی جانے والی میتھ آئس کی بڑی کھیپ پکڑگئی، میتھ ایمفیٹا مائن 5 کنٹینرز کی چھت اور دروازوں میں چھپائی گئی تھی۔

    تفصیلات کے مطابق اے این ایف نے ملکی تاریخ کی بیرون ملک اسمگل کی جانے والی میتھ آئس کی سب سے بڑی کھیپ پکڑلی۔

    ترجمان اے این ایف نے کہا 224 کلو آئس، افغانستان سے سوپ سٹونز کی ایکسپورٹ کی آڑ میں، بیلجیئم اسمگل کی جا رہی تھی، منشیات براستہ طورخم، افغانستان سے اپنی منتقی منزل بیلجئم سمگل کرنے کے لئے پہلے کراچی اسمگل کی گئی۔

    ترجمان نے کہا کہ میتھ ایمفیٹامائن 5 کنٹینیرز کی چھت اور دروازوں میں انتہائی محارت سے چھپائی گئی تھی۔

    اے این ایف نے کراچی پورٹ پر سمگلنگ میں استعمال ہونے والے تمام کنٹینرز کو تحویل میں لے لیا، کنٹینر بھجوانے والے 3 ملزمان جن میں سے 2 کا تعلق افغانستان سے ہے، کو گرفتار کرلیا گیا، گرفتار ملزمان طورخم بارڈر سے افغانستان فرار کی کوشش کررہے تھے۔

    ترجمان کا کہنا تھا کہ اے این ایف منشیات کی اسمگلنگ کے انسداد اور دنیا کو منشیات کے مضر اثرات سے محفوظ رکھنے کیلئے پرعزم ہے۔

  • لاہور : کم عمر گھریلو ملازمہ کی لاش ملنے کا مقدمہ درج

    لاہور : کم عمر گھریلو ملازمہ کی لاش ملنے کا مقدمہ درج

    لاہور : کم عمر گھریلو ملازمہ کی لاش ملنے کا مقدمہ درج کرلیا گیا ، مقدمے میں گھر کے مالک شیخ انیس کو نامزد کیا گیا ہے۔

    تفصیلات کے مطابق صوبائی دارلحکومت لاہور کے علاقے جوہرٹاؤن کی وفاقی کالونی میں گھریلو ملازمہ کی لاش ملنے کا مقدمہ درج کرلیا گیا۔

    پولیس نے بتایا کہ خاتون کے شوہر کی مدعیت میں مقدمہ درج کیاگیا اور قتل کی دفعات شامل کی گئیں ہیں اور پوسٹ مارٹم مکمل کر کے لاش ورثہ کے حوالے کر دی ہے۔

    مقدمے میں گھر کےمالک شیخ انیس کونامزدکیاگیا، جس کے بعد ملزم کوحراست میں لے کر تفتیش کا آغاز کر دیا ہے۔

    اس سے قبل مقتولہ کے اہلخانہ کا کہنا تھا کہ 24گھنٹے گزرنے کے بعد بھی پولیس نے مقدمہ درج نہیں کیا، پولیس ملزمان کاساتھ دےرہی ہے،مقدمہ درج نہ کرانےکادباؤڈالاجارہاہے۔

    گذشتہ روز لاہور کے علاقے ملت پارک میں 9 سالہ ملازمہ کے پر اسرار طور پر جھلس کر جاں بحق ہونے کا واقعہ سامنے آیا تھا۔

    9 سالہ زینب سلمان نامی شخص کے گھر چند ماہ سے ملازمت کررہی تھی، بچی کو زخمی حالت میں اسپتال منتقل کیا گیا جہاں وہ جانبر نہ ہوسکی تھی۔

    پولیس کا کہنا تھا کہ گھر کے مالک سلمان کو گرفتار کرلیا ہے، ملزم نے پولیس کو دیے گئے بیان میں بتایا تھا کہ گھریلو ملازمہ گزشتہ روز کچن میں سلنڈر پھٹنے سے جھلسی تھی جسے ابتدائی طبی امداد گھر میں ہی دی جاتی رہی، حالت زیادہ بگڑنے پر آج اسپتال منتقل کیا گیا تھا۔

  • شادیوں میں مرغن کھانے کھا کر سوجانا انتہائی خطرناک

    شادیوں میں مرغن غذائیں انسانی صحت کے لئے انتہائی نقصان دہ ہوتی ہے ، بلڈ پریشر، ذیابیطس اور کولیسٹرول بڑھنے سے دل کا دورہ یا فالج ہونے کا خدشہ بڑھ جاتا ہے۔

    تفصیلات کے مطابق آج کل شادیوں کا سیزن ہے اور شادیوں میں قورمہ ، بریانی، کڑھائی گوشت، باربی کیو، حلوہ پوری، پراٹھے اور اس پرمیٹھا یعنی کھیر،آئس کریم وغیرہ کھایا جاتا ہے۔

    شادیوں میں مرغن غذاؤں کے بعد ہاضمے کیلئے کولڈ ڈرنک پینا لازمی ہے ، لوگ شادیوں میں کھا پی کر سیدھے گھر جاکر سوجاتے ہیں۔

    مرغن غذائیں اوپرسے ٹھنڈے مشروب اور پھر سوجانا کیا آپ جانتے ہیں کہ یہ عمل دل سمیت انسانی اعضا کیلئے انتہائی خطرناک ہوتا ہے۔

    ہائی بلڈپریشراور ذیابیطس کے لیے نمک اور چکنائی والے کھانے انتہائی خطرناک ہوتے ہیں۔

    بلڈ پریشر، ذیابیطس اور کولیسٹرول بڑھنے سے دل کا دورہ یا فالج ہونے کا خدشہ بڑھ جاتا ہے، نروس بریک ڈاون ہوسکتا ہے، خاص طورپر مرغن کھانے دل کے مریض کیلئے انتہائی خطرناک ہوسکتے ہیں۔

    اس حوالے سے این آئی سی وی ڈی کے ماہر امراض قلب پروفیسر آف کارڈیالوجی ڈاکٹر فواد فاروق نے اے آر وائی نیوز کے پروگرام باخبر سویرا میں گفتگو کرتے ہوئے کہا کہ تیل کا زیادہ استعمال دل کی بیماریوں کی طرف لے جاتا ہے۔

    اگر آپ کی غذا میں چکنائی کی مقدار زیادہ ہے تو یہ دل کیلئے انتہائی نقصان دہ ہے کیونکہ یہ کولیسٹرول بڑھاتا ہے۔

    ماہر امراض قلب کا کہنا تھا کہ چکنائی کی ایک خاص مقدار صحت کے لئے ضروری بھی ہے ، کیونکہ یہ جسم کو توانائی دینے کے ساتھ ساتھ وٹامنز کو جذب کرنے میں مدد دیتا ہے جبکہ جسم ہارمونز کے بننے کا تعلق چکنائی سے ہے۔

    ڈاکٹر فواد فاروق نے کہا کہ آپ کو غذا میں توازن رکھنا چایئے ، چینی ، چکنائی اور نمک کی زیادہ مقدار آپ کو بیماریوں میں مبتلا کر سکتی ہے۔

    ماہر امراض قلب نے کون سا کوکِنگ آئل صحت کے لیے سب سے زیادہ بہتر ہونے حوالے سے بتایا کہ پلانٹ سورس آئل بہتر ہے۔

    سردیوں کے حوالے سے انھوں نے بتایا کہ سردیوں ہماری نالیاں سکڑ جاتی ہے، جس سے فالج اور ہارٹ اٹیک کے چانسز بڑھ جاتے ہیں، اس لئے کوشش کریں چکنائی والی چیزیں کم سے کم استعمال کریں۔

    خشک میوہ جات سے متعلق ڈاکٹر فواد فاروق کا کہنا تھا کہ خشک میوہ جات غذائیت سے بھرپور ہوتے ہیں ، جن میں پروٹین، کیلشیم، کاربوہائیڈریٹس. صحت بخش چکنائی اور آئرن زیادہ مقدار میں پائے جاتے ہیں۔

  • صحافی اطہر متین قتل کیس : عینی شاہدین نے ملزم کو شناخت کرلیا

    صحافی اطہر متین قتل کیس : عینی شاہدین نے ملزم کو شناخت کرلیا

    کراچی :سینئر صحافی اطہرمتین قتل کیس میں عینی شاہدین نےملزم کوشناخت کرلیا، عینی شاہدین نےملزم کوڈمی ملزمان کے درمیان شناخت کیا۔

    تفصیلات کے مطابق کراچی سٹی کورٹ میں سینئر صحافی اطہرمتین قتل کیس کی سماعت ہوئی ، جوڈیشل مجسٹریٹ وسطی کی عدالت میں گرفتارملزم اشرف کی شناخت پریڈ کرائی گئی۔

    شناخت پریڈ کے دوران مقدمے کے3 عینی شاہدین نےملزم کوشناخت کرلیا ، پولیس نے شناخت پریڈ میں ملزم کے ہمراہ 10 ڈمی ملزمان کوپیش کیا تھا اور تینوں عینی شاہدین نےملزم کوڈمی ملزمان کے درمیان شناخت کیا۔

    عدالت نے کہا کہ شناخت پریڈ کے بعد 164کےبیانات کی درخواست غیرموثرہوگئی ہے ، جس پر تفتیشی افسر نے بتایا کہ ملزم اشرف سینیئر صحافی اطہرمتین کے قتل میں ملوث ہے۔

    تفتیشی افسر کا کہنا تھا کہ ملزم کاساتھی انورقمبرشہدادکوٹ میں پولیس مقابلےمیں ماراجاچکا ہے جبکہ ملزم نےدوران تفتیش سیکڑوں وارداتوں کااعتراف کیا ہے۔

    گواہان کے مجسٹریٹ کے روبروبیان کی درخواست عدالت نے نمٹا دی۔

  • ‘اپنے اہل خانہ کو قتل کردو’ یوٹیوب ویڈیو پر کمسن بچے کو پیغام موصول، والدین خوفزدہ

    ‘اپنے اہل خانہ کو قتل کردو’ یوٹیوب ویڈیو پر کمسن بچے کو پیغام موصول، والدین خوفزدہ

    برطانوی خاتون نے تین سالہ بیٹے کو یوٹیوب ویڈیو پر اہل خانہ کو قتل کرنے کا پیغام موصول ہونے پر والدین کو متنبہ کردیا۔

    ویڈیو پلیٹ فارم یوٹیوب پر تقریباً تمام ہی موضوعات پر ویڈیوز موجود ہے اور ہر صارف یوٹیوب پر باآسانی اپنے مزاج اور ذوق کے مطابق ویڈیوز سرچ کرتا ہے۔

    ویڈیو پلیٹ فارم پر جہاں علمی، تربیتی موضوعات پر مبنی ویڈیوز موجود ہیں وہیں جرائم کی ترغیب دینے والی ویڈیوز بھی گردش کرتی نظر آتی ہے جو کم عمر ناظرین کو اپنی جانب راغب کرتی ہیں۔

    ایسی ہی ایک ویڈیو کی داستان برطانوی ریاست اسکاٹ لینڈ کے شہر گلاسگو سے سامنے آئی، جہاں تین سالہ بچے کی ماں نے تمام والدین سے درخواست کی ہے یوٹیوب پر ویڈیوز دکھاتے وقت اپنے بچوں پر نظر رکھیں۔

    خاتون کا کہنا ہے کہ ان کے شوہر نے اپنے تین سالہ بیٹے کو یوٹیوب پر ڈائناسور کی ایک ویڈیو لگاکر دی تاکہ بچے کو گنتی سیکھنے میں مدد مل سکے لیکن اس ویڈیو کے دوران جوکر کی اشتہاری ویڈیو آئی جو بچے کو سنگین جرم کی ترغیب دے رہا تھا۔

    خاتون کا کہنا تھا کہ اشتہاری ویڈیو میں نظر آنے والا جوکر میرے بیٹے کو پیغام دے رہا تھا کہ وہ اپنے اہل خانہ کو چھری سے قتل کردے اور اس پیغام کو تکمیل تک پہنچانے کےلیے جوکر نے ویڈیو کے دوران بچوں کی گردنیں کٹی اور ٹکڑے ہوئی لاشوں کی تصاویر بھی دکھائیں۔

    برطانوی خاتون نے کہا کہ ان کے شوہر اور وہ یہ ویڈیو دیکھ کر دنگ رہ گئے، جس کے بعد انہوں نے ویڈیو شیئرنگ پلیٹ فارم پر واقعے کی شکایت درج کرائی جس کے بعد یوٹیوب نے وہ ویڈیو ڈیلیٹ کردی۔

    خاتون کا کہنا ہے کہ وہ ایسی ویڈیو کی روک تھام کےلیے مزید قانونی کارروائی کریں گی کیوں کہ ان کا بیٹا بہت چھوٹا تھا جس نے ویڈیو کا اثر نہیں لیا ورنہ ویڈیو کے ذریعے پیغام بہت خطرناک دیا گیا تھا۔