راولپنڈی : سیکیورٹی فورسز نے بلوچستان میں بڑی کارروائی کرتے ہوئے سو سے زائد افراد کے قتل میں ملوث دہشت گرد اور دو خود کش بمباروں کو ہلاک کردیا، دہشت گردوں سے مقابلے میں ملٹری انٹیلی جنس کے کرنل سہیل عابد شہید ہوگئے۔
پاک فوج کے شعبہ تعلقات عامہ (آئی ایس پی آر) کے مطابق ملک بھر میں آپریشن ردالفساد کے تحت سیکیورٹی فورسز کی کارروائیاں کامیابی سے جاری ہیں۔
اس سلسلے میں سیکیورٹی فورسز نے بلوچستان کے علاقے کلی الماس میں خفیہ اطلاع پر خود کش بمباروں کی موجودگی پر چھاپہ مار کارروائی کی، اس دوران دہشت گردوں کی جانب سے سیکیورٹی فورسز پر فائرنگ کی گئی۔
جوابی فائرنگ میں سو سے زائد افراد کے قتل میں ملوث انتہائی مطلوب دہشت گرد ہلاک ہوگیا، مذکورہ دہشت گرد ہزارہ برداری کے کئی لوگوں اور متعدد پولیس اہلکاروں کے قتل میں ملوث تھا، ہلاک دہشت گرد سلمان بادینی کالعدم لشکرجھنگوی بلوچستان کا سربراہ ہے
آئی ایس پی آر کے مطابق کارروائی کے دوران دو خود کش بمبار بھی مارے گئے،ملزمان کے قبضے سے بھاری تعداد میں اسلحہ بھی برآمد ہوا ہے۔
دہشت گردوں کی فائرنگ سے ملٹری انٹیلی جنس کے کرنل سہیل عابد شہید جبکہ فائرنگ کے تبادلے میں 4جوان بھی زخمی ہوئےہیں جن میں سے دو جوانوں کی حالت تشویشناک ہے۔
وزیر اعظم شاہدخاقان عباسی کا کرنل سہیل عابد کی شہادت پر اظہار افسوس
وزیر اعظم شاہد خاقان عباسی نے بلوچستان میں دہشت گردوں سے لڑائی کے دوران شہید ہونے والے کرنل سہیل کی شہادت پر دکھ اور افسوس کا اظہار کیا اور شہید کی بلندی درجات اور زخمیوں کی جلد صحتیابی کی دعا کی۔
اپنے جاری کردہ بیان میں ان کا کہنا تھا کہ پاکستان سے دہشت گردی کے مکمل خاتمے تک آپریشن جاری رہے گا، ہمارے فوجیوں نے اپنے خون سے آزادی کی قیمت ادا کی، اس سے بڑی کوئی قربانی نہیں، ہم بطور قوم دشمن کےخلاف متحد ہیں۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
