کوئٹہ : بلوچستان کے دارالحکومت کوئٹہ میں مسلح افراد نے پولیس موبائل پر فائرنگ کردی جس کے نتیجے میں 3 اہلکار شہید اور ایک زخمی ہوگیا۔
اے آر وائی نیوز کوئٹہ کے بیورو چیف مصطفیٰ خان ترین کی رپورٹ کے مطابق فائرنگ کا واقعہ مستونگ روڈ پر نیو سریاب تھانے کی حدود میں پیش آیا، جس کے نتیجے میں 3 پولیس اہلکار شہید اور ایک زخمی ہوگیا۔
پولیس موبائل پر حملہ اُس وقت ہوا جب وہ علاقے میں گشت کررہی تھی، شہید اہلکاروں میں ایک سب انسپکٹر بھی شامل ہے واردات کے بعد نامعلوم ملزمان فرار ہونے میں کامیاب ہوگئے۔
شہید ہونے والے اہلکاروں کی میتیں قانونی کارروائی کیلیے اسپتال منتقل کردی گئیں جبکہ زخمی اہلکار کو طبی امداد فراہم کی جارہی ہے
واقعے کی اطلاع ملتے ہی سیکیورٹی فورسز نے علاقے کو گھیرے میں لے لیا اور شواہد اکٹھے کرکے تحقیقات کی جارہی ہیں۔
تازہ ترین اطلاعات کے مطابق کوئٹہ کی نیوسریاب پولیس موبائل پر حملے کی سی سی ٹی وی فوٹیج سامنے آگئی، 6ملزمان 2موٹر سائیکلوں پر آئے، 4 ملزمان نے بیک وقت فائرنگ کی، فوٹیج میں ملزمان کو کلاشنکوف اور پستول سے فائرنگ کرتے دیکھا جاسکتا ہے۔
وزیراعلیٰ بلوچستان سرفراز بگٹی نے کہا ہے کہ پولیس موبائل پر بزدلانہ حملہ قابلِ مذمت ہے، شہدا کے لہو کا حساب لیا جائے گا۔
اپنے جاری بیان میں انہوں نے کہا کہ دہشت گردوں کو کیفر کردار تک پہنچا کر دم لیں گے، کمزور نہیں ہیں، دشمنوں کو بھرپور جواب دیا جائے گا۔
سرفرازبگٹی کا کہنا ہے کہ شہر کا امن تباہ کرنے والوں پر زمین تنگ کردیں گے، پولیس اہلکاروں کی قربانی رائیگاں نہیں جائے گی، بلوچستان میں امن دشمنوں کیلئے کوئی رعایت نہیں۔
