ایران میں پاکستانی زائرین کی ایک اور بس حادثے کا شکار ہوگئی جس کے نتیجے میں 3 زائرین جاں بحق اور 48 زخمی ہوگئے۔
ایران کی خبر رساں ایجنسی ’ارنا‘ کے مطابق ایران میں پاکستانی زائرین کی ایک اور بس حادثے کا شکار ہوگئی جس کے نتیجے میں 3 زائرین جاں بحق اور 48 زخمی ہوگئے، پاکستانی زائرین بس میں اربعین میں شرکت کے لیے ایران کے راستے عراق جا رہے تھے۔
ایرانی میڈیا کے مطابق جنوبی ایران میں پاکستانی زائرین کو لے جانے والی بس ایک ٹرک سے ٹکرا گئی، بس صوبہ فارس کے شہر نیریز اور کرمان صوبے کے سرجان کے درمیان مرکزی سڑک پر ایک ٹرک سے ٹکرائی۔
تاہم یہ نہیں بتایا گیا کہ بس میں کتنے لوگ سوار تھے، فارس ٹریفک پولیس کے ایک اہلکار کرنل عبدل ہاشم دہغنی نے بتایا کہ حادثہ بریک میں ”تکنیکی خرابی“ اور ڈرائیور کی ”گاڑی کو کنٹرول کرنے میں ناکامی“ کی وجہ سے پیش آیا۔
واضح رہے کہ ایک ہفتے سے بھی کم وقت میں یہ دوسرا بڑا حادثہ ہے، اکیس اگست کو ایرانی شہر یزد میں پاکستانی زائرین کی بس خوفناک حادثے کا شکار ہو گئی تھی جس کے نتیجے میں 28 افراد جاں بحق ہو گئے تھے۔