کراچی : صفائی کے بہانے آنے والی 3 ماسیوں نے تاجر کے گھر کا صفایا کردیا اور لاکھوں مالیت کا سونا لوٹ کر فرار ہوگئیں۔
تفصیلات کے مطابق کراچی کے علاقے شارع فیصل تھانے کی حدود میں تاجر کے گھر میں چوری کی واردات ہوئی ، جس میں ماسیوں نے تاجر کے گھر سے 98 لاکھ روپے مالیت کا سونا اور نقدی چوری کی۔
گھر کی صفائی کے بہانے آنے والی 3 ماسیاں سونالوٹ کرفرار ہوئی، جس کے بعد مدعی نے شارع فیصل تھانے میں مقدمہ درج کرا دیا۔
مدعی مقدمے نے بتایا کہ ہماری پرانی ماسیاں شادی کے بعد کام چھوڑ چکی تھیں، نئی ماسیوں کی تلاش جاری تھی اسی دوران 3اجنبی خواتین گھر آئیں، خواتین نے پوچھا کیا گھریلو ملازماؤں کی ضرورت ہے، اہلیہ نے تینوں خواتین کو بغیر جانچ پڑتال کے کام پر رکھ لیا۔
متاثرہ تاجر نے کہا کہ تینوں ماسیوں سےنہ شناختی کارڈ مانگا، نہ کوئی تفصیل لی گئی، ماسیوں نے پہلے ہی دن گھر کے کمرے کو اندر سے بند کیا، دروازے کی چابی اور الماریوں کی چابیاں استعمال کرکے زیورات چرائے۔
مدعی کا کہنا تھا کہ ماسیاں ساڑھے تین گھنٹے گھر میں موجود رہیں، سی سی ٹی وی فوٹیج میں ماسیوں کو گھر سے نکلتے دیکھا گیا،چوری کا علم کئی گھنٹے بعد ہوا جب ماسیاں جا چکی تھیں۔