کراچی : چینی کمپنی سے دھوکا دہی کے کیس میں 3 ملزمان کی ضمانت منظور کرلی گئی ، دسمبر 2024 میں ملزمان کی درخواست ضمانت مسترد کردی تھی۔
تفصیلات کے مطابق سندھ ہائیکورٹ میں چینی کمپنی سے دھوکا دہی کے کیس میں تین ملزمان کی درخواست ضمانت پر فیصلہ سنادیا۔
عدالت نے تین ملزمان جاوید محمود،سید ذیشان بلگرامی اور محمد خالد کی ضمانت منظور کرتے ہوئے تینوں ملزمان کو 3،3 لاکھ روپے کے مچلکے جمع کرانے کا حکم دے دیا۔
عاقب حسین ایڈووکیٹ نے عدالت کو بتایا کہ بینکنگ کورٹ نے دسمبر 2024 میں ملزمان کی درخواست ضمانت مسترد کردی تھی۔
درخواست گزار جاوید محمود و دیگر کا فراڈ سے لینا دینا نہیں ہے، ملزمان کے خلاف کوئی براہ راست شواہد نہیں ہیں ، ملزم کو ایف آئی اے کارپوریٹ کرائم سرکل نے گرفتار کیا تھا۔
ایف آئی اے کے مطابق ملزمان نے چینی کمپنی سے 11 کروڑ 39 لاکھ کا فراڈ کیا تھا، چینی کمپنی کی امپورٹرمس کورائن چن کی شکایت پر مقدمہ ہوا تھا، معاہدے کے تحت پاکستان کمپنی نے 1500 میٹرک ٹن کروم اورے ایکسپورٹ کرنا تھا۔
ایف آئی اے نے کہا کہ 11 فروری کو کراچی بندرگاہ سے چائنا بندرگارہ کنٹینر بھیجا گیا کنٹینر میں کروم اورے کی جگہ مٹی پتھر بجری بھری ہوئی تھی۔
بعد ازاں چینی کمپنی کی امپورٹر مس کورائن چن کی شکایت پر پاکستانی ایکسپورٹر پر مقدمہ کیا گیا، ایف آئی اے کا کہنا تھا کہ ملزم ذیشان بلگرامی نے بینک میں جعلی انسپکشن سرٹیفکیٹ جمع کروایا تھا، اور چینی کمپنی کی بھیجی گئی رقم ملزم نے اپنے اکاؤنٹ میں ٹرانسفرکر لی تھی۔
