تھرپارکر: تھری باشندوں نے غیر قانونی طور پر نایاب ہرن کا شکار کرنے والے شکاریوں کو مقام عبرت بنادیا۔
تفصیلات کے مطابق تھرپارکر میں مٹھی کے گاؤں (رنگیلو لوبر) کے شہریوں نے نایاب نسل کے ہرن کا غیر قانونی شکار کرنے والے تین افراد کو پکڑ لیا، علاقہ مکینوں نے ملزمان کے قبضے سے دس سے زائد شکار کئے مردہ ہرن اور شکار میں استعمال ہونے والی جیپ کو اپنی تحویل میں لے لیا۔
شکاریوں کےدو سہولت کار فرار ہوگئے۔
بڑی تعداد میں نایاب نسل کے ہرن کا شکار کرنے پر علاقہ مکینوں کی جانب سے شکاریوں کو بہیمانہ تشدد کا نشانہ بنایا گیا، سوشل میڈیا واقعے سے متعلق کئی ویڈیوز زیرگردش ہیں جس میں دیکھا جاسکتا ہے کہ مقامی افراد واقعے کے بعد سخت مشتعل ہیں اور شکاریوں سے سخت باز پرس کررہے ہیں۔
ویڈیو میں دیکھا جاسکتا ہے کہ مقامی افراد نے ان بااثر شکاریوں کو رسیوں سے باندھ کر تشدد کا نشانہ بھی بنایا اور بعد ازاں قانونی کارروائی کے لئے پولیس کے حوالے کردیا۔
مقامی افراد کا مطالبہ ہے کہ سندھ حکومت نایاب نسل کے ہرن کا غیر قانونی شکار کرنے والے ملزمان کے خلاف دہشت گردی ایکٹ کے تحت مقدمہ درج کرے اور انہیں سخت سے سخت سزا دی جائے۔
یہ بات ذہن میں رہے کہ تھر کے لوگ جنگلی حیات کو مارنے اور شکار کے مخالف ہیں،مگر پچھلے کچھ عرصے سے پکی سڑکوں کا نیٹ ورک دور دراز دیہاتوں تک پھیلنے کے باعث دیگر علاقوں سے شکاریوں کی آمد کا سلسلہ بڑھ چکا ہے۔
مقامی افراد کا کہنا ہے کہ سرکاری شخصیات کی خاطر تواضع کے لیے بھی ہرنوں کا شکار کروایا جاتا ہے۔
یاد رہے کہ محکمہ جنگلی حیات کے ترمیم شدہ وائلڈ لائف ایکٹ کے تحت ایک ہرن کے شکار پر ڈھائی لاکھ پر جرمانہ ہے۔
