کراچی : ملک بھر کے تمام بینک 3مارچ بروز پیر عوامی خدمات کیلیے بند رہیں گے، اسٹیٹ بینک نے نوٹیفکیشن جاری کردیا۔
اسٹیٹ بینک آف پاکستان نے اعلان کیا ہے کہ زکوٰۃ کی کٹوتی کے مقصد کے لیے تمام بینک اور مالیاتی ادارے 3 مارچ بروز پیر بند رہیں گے۔
اسٹیٹ بینک کی جانب سے جاری نوٹیفکیشن کے مطابق 3مارچ کو اسٹیٹ بینک و دیگر کمرشل بینکوں میں زکوٰة کٹوتی کیلئے پبلک ڈیلنگ بند رہے گی۔
اسٹیٹ بینک آف پاکستان کے جاری کردہ نوٹیفکیشن کے مطابق تمام بینکوں کا عملہ زکوٰة کٹوتی کے سلسلے میں اپنی ڈیوٹیز پر حاضر ہوگا۔
یاد رہے کہ چیئرمین مرکزی رویت ہلال کمیٹی مولانا ابوالخبیر آزاد نے اعلان کیا ہے کہ ملک بھر میں رمضان المبارک کا چاند نظر نہیں آیا لہٰذا پہلا روزہ 2 مارچ بروز اتوار کو ہوگا۔
جمعہ کو مرکزی رویت ہلال کمیٹی کا اجلاس پشاور میں منعقد ہوا جب کہ کراچی، لاہور اور کوئٹہ سمیت ملک کے دیگر شہروں میں زونل کمیٹیوں کے اجلاس ہوئے جس میں چاند نظر آنے کی کوئی شہادت موصول نہیں ہوئی۔
واضح رہے کہ سعودی عرب اور متحدہ عرب امارات میں رمضان المبارک کا چاند نظر آگیا ہے اور ان ممالک میں پہلا روزہ یکم مارچ بروز ہفتہ کو ہوگا۔ اس حوالے سے سعودی سپریم کورٹ نے مملکت میں ماہِ صیام کا چاند نظر آنے کی تصدیق کر دی ہے۔
اس کے علاوہ یو اے ای میں رمضان المبارک کے چاند کی شہادت موصول ہوگئی جس کے بعد پہلا روزہ کل یکم مارچ کو ہوگا۔
متحدہ عرب امارات کی فتویٰ کونسل نے چاند دیکھنے کے لیے جدید ٹیکنالوجی کے استعمال کی اجازت دی تھی۔
