مینسی : امریکہ میں ایک شخص نے تین سالہ بچے کو سیڑھیوں سے دھکا دے کر شدید زخمی کردیا، بچہ زندگی و موت کی کشمکش میں ہے، ملزم کی بچے کی ماں سے اس کے کھانے پر بحث ہوئی تھی۔
امریکی ریاست انڈیانا کے علاقے مینسی میں پولیس نے ایک شخص کو گرفتار کیا ہے،24سالہ ملزم انتونیو آسٹن رویرا مانپشپ پر الزام ہے کہ اس نے غصے میں آکر اپنی دوست کے تین سالہ بیٹے کو سیڑھیوں سے دھکا دے دیا جس کے باعث اسے سر شدید چوٹ لگی اور وہ بے ہوش ہوگیا۔
غیر ملکی خبر رساں ادارے کے مطابق پولیس نے بتایا ہے کہ ملزم کی اپنی دوست سے اس بات پر بحث ہورہی تھی کہ بچے کے کھانے کیلئے کوبن سی غذا بہتر ہے؟ جس پر تلخ کلامی کے بعد غصے میں آکر ملزم نے بچے کو مارا اور پھر سیڑھیوں سے دھکا دے کر نیچے پھینک دیا۔
پولیس کو دیئے گئے اپنے بیان میں ملزم نے اعتراف جرم کرتے ہوئے کہا کہ بچے کے زخمی ہونے کے بعد میں نے طبی مداد کیلئے ایئر ایمبولینس کو کال کی جس کے بعد بچے کو اسپتال منتقل کیا گیا۔ ڈاکٹری معائنہ میں انکشاف ہوا کہ بچے کے چہرے ، رانوں اور کولہوں پر بھی گہرے زخم آئے ہیں۔
پولیس کے مطابق ملزم نے ابتدائی تفتیش میں کہا تھا کہ یہ بچہ کھیلتے ہوئے سیڑھیوں سے گرا اس وقت میں اوپر والی منزل کے بیڈ روم میں تھا، ملزم پر الزام ثابت ہونے اور اعتراف جرم کے بعد اس کیخلاف مقدمہ درج کرلیا گیا ہے۔
