کراچی : سفاک باپ نے اپنے 3 سالہ بچے کو وحشیانہ تشدد کا نشانہ بنا ڈالا ، پولیس نے پڑوسیوں کی نشاندہی پر باپ کو گرفتار کرلیا ہے۔
تفصیلات کے مطابق کراچی کے علاقے ہجرت کالونی میں ایک افسوسناک واقعہ پیش آیا ، جہاں سفاک باپ نے معصوم بچے کو وحشیانہ تشدد کا نشانہ بنایا اور اپنے ہی تین سالہ بچے ارحم کے انگوٹھے کا ناخن کھینچ کر نکال دیا۔
بدترین تشدد پر پڑوسیوں نے 15 مددگار پولیس کو فون کیا اور مدد طلب کرنے والے کی نشاندہی پر باپ کو گرفتار کرلیا گیا، پولیس نے ملزم کو تھانے منتقل کردیا تاہم والدہ نے مقدمے سے انکار کردیا ہے۔
پولیس کی جانب سے واقعے کی مزید تفتیش جاری ہے، حکام نے بتایا کہ ون فائیو کی اطلاع پر گھر پہنچے تو اندر سے کنڈی لگی ہوئی تھی، ملزم اوراہلیہ نے دروازہ نہ کھولا تو دروازہ توڑنا پڑا۔
پولیس حکام کا کہنا ہے کہ ملزم کی اہلیہ کے مطابق ملزم کا دماغی توازن ٹھیک نہیں اور بیوی نےاپنے مدعیت میں مقدمہ درج کرانے سے انکار کردیا۔
حکام نے کہا کہ انسانی حقوق کی تنظیموں سے رابطہ کرنے کی کوشش کر رہے ہیں، مقدمہ درج نہ ہوا تو ملزم کو مقررہ وقت کے بعد رہا کرنا پڑے گا۔
تین سالہ بچے پر تشدد کرنے والے ملزم فیصل نے اے آروائی نیوز سے گفتگو کرتے ہوئے کہا مجھ سے غلطی ہوگئی میں نے بچے پر تشدد کیا، بچے کی پٹی میں نے خود کی اور اس کی دیکھ بھال خود کررہا ہوں، پہلے سے کافی بہتر ہے صرف سائیڈ سے گوشت پھٹا، میں بچوں کو مارتا نہیں صرف ڈراتا ہوں۔
