30 مئی 2005ء کو پاکستان کے معروف کرکٹر فضل محمود لاہور میں وفات پاگئے تھے۔ آج فضل محمود کی برسی ہے۔ ٹیسٹ کرکٹ کے آغاز میں انھوں نے اپنی کارکردگی سے پاکستان کو جو کام یابیاں دلوائیں، وہ یادگار ثابت ہوئیں۔ بھارت کے خلاف لکھنؤ ٹیسٹ میں پاکستان کی پہلی کام یابی ہو یا اوول کی شان دار فتح، فضل محمود نے نمایاں کارکردگی کا مظاہرہ کیا اور آگے رہے۔
پاکستان میں ٹیسٹ کرکٹر کی حیثیت سے شہرت حاصل کرنے والے فضل محمود 18 فروری 1927ء کو لاہور میں پیدا ہوئے۔ اسلامیہ کالج لاہور سے گریجویشن اور پنجاب یونیورسٹی سے معاشیات میں ایم اے کیا۔ 1943ء سے انھوں نے کرکٹ کھیلنا شروع کیا اور 1952ء میں بھارت کا دورہ کرنے والی پاکستان کی پہلی کرکٹ ٹیم کے رکن منتخب ہوئے۔
فضل محمود نے اپنے کیریئر میں مجموعی طور پر 34 ٹیسٹ میچ کھیلے اور 139 وکٹیں حاصل کیں۔ انھوں نے 10 ٹیسٹ میچوں میں پاکستان کی قیادت کی بھی کی تھی۔ وہ پاکستان کے پہلے کپتان تھے جنھوں نے اپنے پہلے ٹیسٹ میچ میں کام یابی حاصل کی تھی۔
فضل محمود پاکستان کے پہلے کھلاڑی تھے جنہیں کرکٹ کے کھیل کے لیے مشہور کتاب وزڈن نے سال کے پانچ بہترین کھلاڑیوں میں شمار کیا۔ وہ ٹیسٹ کرکٹ میں 100 وکٹوں کا ہدف عبور کرنے والے بھی پہلے پاکستانی کھلاڑی تھے۔
حکومتِ پاکستان نے فضل محمود کو صدارتی تمغہ برائے حسنِ کارکردگی عطا کیا تھا۔
