Tag: 300

  • چنگچی رکشوں کیخلاف کارروائیاں، 300 سے زائد ضبط، ڈرائیورز گرفتار

    چنگچی رکشوں کیخلاف کارروائیاں، 300 سے زائد ضبط، ڈرائیورز گرفتار

    سندھ حکومت کی چنگی رکشوں پر پابندی کی خلاف ورزی کرنے والوں کیخلاف کارروائیاں جاری 300 سے زائد رکشے ضبط ڈرائیور گرفتار کر لیے۔

    سندھ کے وزیر ٹرانسپورٹ شرجیل میمن نے کراچی میں میڈیا سے گفتگو کرتے ہوئے کہا ہےکہ کراچی کی 11 سڑکوں پر چنگچی رکشے چلانے کے خلاف پابندی ہے کیونکہ وہ ٹریفک میں رکاوٹ، عوام کیلیے خطرہ بنے ہوئے تھے۔

    شرجیل میمن نے بتایا کہ اس پابندی کی خلاف ورزی کرنے والوں کے خلاف 16 اپریل سے کریک ڈاؤن جاری ہے اور اب تک 300 سے زائد چنگچی رکشے ضبط اور ڈرائیوروں کو گرفتار کیا گیا ہے جب کہ فینسی نمبر پلیٹس اور کالے شیشے والی گاڑیوں کے خلاف بھی آپریشن کرتے ہوئے ایسی 515 گاڑیاں ضبط کی گئی ہیں۔

    صوبائی وزیر نے یہ بھی بتایا کہ کراچی میں غیر معیاری ٹرانسپورٹ کیخلاف 9 اپریل سے کریک ڈاؤن شروع کیا گیا تھا اور اب تک اس قانون کی خلاف ورزی پر 67 ہزار 731 موٹر سائیکلیں تحویل میں لی گئی جب کہ 2 لاکھ 71 ہزار 925 گاڑیوں کی رجسٹریشن منسوخی کی سفارش کی گئی اور 491 گاڑیوں کی رجسٹریشن عارضی طور پر معطل کر کے مخصوص شرائط پر چھوڑی گئیں۔

    ان کا کہنا تھا کہ احکامات کی خلاف ورزی پر 104 ایف آئی آرز درج کی گئیں۔ تیز رفتاری اور لاپروائی سے ڈرائیونگ پر ایک مقدمہ اور عوامی راستے میں رکاوٹ ڈالنے پر 33 مقدمات درج کیے گئے۔ 7 ہزار 69 گاڑیوں کو چالان جاری کیے گئے۔

  • ویڈیو: سعودی عرب میں 300 جوڑوں کی اجتماعی شادی، ہر جوڑے کو گھر اور گاڑی کا تحفہ!

    ویڈیو: سعودی عرب میں 300 جوڑوں کی اجتماعی شادی، ہر جوڑے کو گھر اور گاڑی کا تحفہ!

    سعودی عرب میں 300 جوڑوں کی اجتماعی شادی کی پروقار تقریب منعقد ہوئی جس میں ہر جوڑے کو گھر اور گاڑی کا تحفہ دیا گیا۔

    عرب میڈیا کے مطابق سعودی عرب میں اجتماعی شادی کی پروقار تقریب منعقد ہوئی جس میں 300 جوڑے رشتہ ازدواج میں منسلک ہوئے۔ ہر جوڑے کو نئی زندگی کے آغاز پر گاڑی اور گھر کا تحفہ دیا گیا۔

    اس تقریب کا اہتمام سعودی عرب کی جنرل انٹرٹینمنٹ اتھارٹی کے چیئرمین ترکی الشیخ نے کیا تھا۔

    ریاض سیزن کے تحت بولیوارڈ سٹی کے ابوبکر سالم تھیٹر میں ’’لیلہ العمر‘ کے عنوان سے تقریب میں دولہا ان کے اہل خانہ و دوستوں کے ہمراہ موجود تھے۔ تمام دولہے روایتی سعودی سفید لباس زیب تین کیے ہوئے تھے۔ ان کے چہروں پر خوشی رقصاں تھی اور وہ خود بھی رقص کرتے دکھائی دیے۔

    نوبیاہتا جوڑوں کے لیے صرف شاندار تقریب کا اہتمام ہی نہیں کیا گیا تھا بلکہ اس تقریب کے لیے بہت سے سرکاری اور نجی اداروں نے تحائف فراہم کیے تھے۔

     

    دولہا اور دلہن کو نئی زندگی کی شروعات پر گھر اور گاڑی کے تحائف بھی دیے گئے۔ اجتماعی شادی کی یہ تقریب متعدد ٹی وی چینلز اور ڈیجیٹل پلیٹ فارمز پر براہ راست نشر کی گئی۔

  • یونانی جزیرے تک پہنچنے کی کوشش، 300 سے زائد مہاجرین گرفتار

    یونانی جزیرے تک پہنچنے کی کوشش، 300 سے زائد مہاجرین گرفتار

    انقرہ : مغربی ترک صوبے چناق قلعے کے ساحلی علاقے میں سات مختلف چھاپوں کے دوران مہاجرین کو تحویل میں لیا گیا۔

    تفصیلات کے مطابق ترک حکام نے ایسے تین سو تیس غیرملکی تارکین وطن کو حراست میں لے لیا ہے، جو یونانی جزیرے لیسبوس پہنچنے کی کوشش میں تھے۔

    غیرملکی خبررساں ادارے کا کہنا تھا کہ مغربی ترک صوبے چناق قلعے کے ایک ساحلی علاقے میں مارے گئے سات مختلف چھاپوں کے دوران ان مہاجرین کو تحویل میں لیا گیا۔

    حراست میں لیے گئے مہاجرین کا تعلق افغانستان، شام، ایران اور عراق سے بتایا گیا ہے۔ رواں برس دس اگست کو لیسبوس پہنچنے کی کوشش میں تقریباً سات سو مہاجرین کو گرفتار کیا گیا تھا۔

    لیبیا: تارکین وطن کی کشتی ڈوب گئی، درجنوں مہاجرین ہلاک

    خیال رہے کہ گذشتہ سال جولائی میں یورپ جانے کی خواہش لیے مہاجرین اپنی جانوں سے ہاتھ دھو بیٹھے تھے، بحیرہ روم میں کشتی ڈوبنے سے 16 افراد ہلاک جبکہ متعدد لاپتہ ہوگئے تھے۔

    قبل ازیں 2015 میں غیر قانونی طور پر یورپ میں داخل ہونے کی کوشش میں سترہ سو سے زائد تارکین وطن بحیرہ روم میں ڈوب کر ہلاک ہوگئے تھے جبکہ اسی سال ہی اٹلی کے کوسٹ گارڈز نے ایک بڑا ریسکیو آپریشن کر کے ہزاروں مہاجرین کو ڈوبنے سے بچایا تھا۔

  • میڈیا مخالف بیانات، 300 اخبارات کی صدر ٹرمپ کے خلاف مہم

    میڈیا مخالف بیانات، 300 اخبارات کی صدر ٹرمپ کے خلاف مہم

    واشنگٹن : امریکی صدر ڈونلڈ ٹرمپ کی میڈیا مخالف بیانات پر امریکی اخبار دی بوسٹن گلوب کی صدر ٹرمپ کے خلاف اور میڈیا کے آزادی کے لیے شروع کی گئی مہم میں 300 سے زائد اخبارات شامل ہوگئے۔

    تفصیلات کے مطابق امریکی صدر ڈونلڈ ٹرمپ کی جانب سے میڈیا کے خلاف ’تضحیک آمیز جنگ‘ پر امریکی اخبار دی بوسٹن گلوب نے گذشتہ ہفتے ملک گیر مہم کا اعلان کیا تھا اس سلسلے میں ‘#EnemyOfNone’ بھی استعمال کیا جار ہا ہے۔

    برطانوی خبر رساں ادارے کا کہنا تھا کہ ڈونلڈ ٹرمپ کی جانب سے متعدد مرتبہ میڈیا کی رپورٹس کو جھوٹ پر مبنی قرار دیتے ہوئے میڈیا اور صحافیوں کو ’عوام کا دشمن‘ کہا گیا ہے۔

    ڈونلڈ ٹرمپ کی جانب سے جمعرات کے روز سماجی رابطے کی ویب سایٹ ٹویٹر پر ٹویٹ کیا گیا تھا کہ ’جھوٹی خبریں دینے والا میڈیا اپوزیشن جماعت ہے، جو ہمارے عظیم ملک کے لیے بہت برا ہے لیکن ہم جیت گئے‘۔

    برطانوی نشریاتی ادارے کے مطابق اقوام متحدہ کے ماہرین کا کہنا ہے کہ ٹرمپ کے اس بیان نے صحافیوں کے خلاف تشدد کو بڑھایا ہے۔

    غیر ملکی خبر رساں ادارے کا کہنا تھا کہ دی بوسٹن گلوب نے 16 اگست کو ’انتظامیہ کے پریس پر حملوں کے خطرات‘ پر اداریہ لکھنے کا اعلان کرتے ہوئے دیگر خبر رساں اداروں کو بھی مذکورہ موضوع پر اداریہ لکھنے کی درخواست کی تھی۔

    جس کے بعد ابتدائی طور پر بوسٹن گلوب کو 100 صحافتی اداروں کی جانب سے مثبت ردعمل ملا جو اب بڑھ کر 350 تک جا پہنچا ہے، اس مہم میں امریکا کے نامور قومی اخبارات اور چھوٹے مقامی اخبارات شامل ہیں، اس مہم میں بین الاقوامی اشاعتی ادارے بھی شامل ہیں جن میں برطانوی اخبار دی گارجین بھی اس مہم کا حصہ ہے۔

    ڈونلڈ ٹرمپ کے میڈیا مخالف بیانات کے رد عمل میں اخبارات نے کیا لکھا؟

    امریکی خبر رساں ادارے دی بوسٹن گلوب نے ’انتظامیہ کے پریس پر حملوں کے خطرات‘ کے موضوع پر لکھے گئے اداریے کی سرخی شائع کی کہ ’صحافی دشمن نہیں ہیں‘ اور آزاد میڈیا امریکا کے 200 برس سے قائم اصولوں کا اہم جز پے۔

    امریکی اخبار نیو یارک ٹائمز نے مہم میں حصّہ لیتے ہوئے اداریہ تحریر کیا جس کی سرخی یہ تھی کہ ’آزاد میڈیا کو آپ کی ضرورت ہے اور ڈونلڈ ٹرمپ کو طنز کے نشتر چلاتے ہیں وہ جمہوریت کے لیے شدید خطرے کا باعث ہے‘۔ امریکی اخبار نے اداریے میں مختلف اخبارات کے نمونے بھی شائع کیے۔

    خیال رہے کہ امریکی صدر ڈونلڈ ٹرمپ کے سماجی رابطے کی ویب سایٹ ٹویٹر پو موجود آفیشل اکاؤنٹ کے مطابق صدر ٹرمپ 281 مرتبہ میڈیا کے خلاف بیان دے چکے ہیں۔