Tag: 4 ہلاک

نیویارک: امریکی ریاست نیویارک کے نجی سوشل کلب میں فائرنگ کے نتیجے میں 4 افراد ہلاک ہوگئے۔

غیرملکی خبررساں ادارے کے مطابق امریکی شہر بروکلین کے نجی سوشل کلب میں نامعلوم مسلح شخص کی فائرنگ سے 4 افراد ہلاک اور 3 زخمی ہوگئے، پولیس کے مطابق فائرنگ کا واقعہ صبح کے وقت پیش آیا۔

پولیس کا کہنا ہے کہ مسلح شخص کی شناخت نہیں ہوسکی ہے اور نہ ہی حملے کی وجوہات معلوم ہوسکی ہیں۔

پولیس کا کہنا ہے کہ واقعے کی اطلاع نیویارک پولیس ڈیپارٹمنٹ کو صبح 6 بجکر 55 منٹ پر ملی، پولیس جب جائے وقوعہ پر پہنچی تو وہاں 4 افراد کی لاشیں موجود تھیں۔

رپورٹ کے مطابق فائرنگ سے زخمی ہونے والوں میں ایک خاتون اور 2 مرد شامل ہیں جنہیں طبی امداد کے لیے اسپتال منتقل کردیا گیا ہے جہاں ان کی حالت خطرے سے باہر بتائی گئی ہے۔

پولیس حکام کا کہنا ہے کہ فائرنگ عمارت کے پہلی منزل پر کی گئی، نجی سوشل کلب میں 15 افراد موجود تھے اور مسلح شخص کی جانب سے 15 فائر کیے گئے ہیں، جائے وقوعہ سے دو پستولیں برآمد کرلی گئی ہیں۔

واضح رہے کہ 6 اکتوبر کو امریکی ریاست کنساس کے بار میں فائرنگ کے نتیجے میں 4 افراد ہلاک اور 5 زخمی ہوگئے تھے۔

یاد رہے کہ گزشتہ ماہ امریکی ریاست ٹیکساس میں فائرنگ کے واقعے میں 7 افراد ہلاک اور سترہ ماہ کی بچی سمیت 22 افراد زخمی ہوگئے تھے۔