Tag: 4 people killed

  • کچے کے ڈاکوؤں کی بستی پر فائرنگ سے 4 افراد جاں بحق

    کچے کے ڈاکوؤں کی بستی پر فائرنگ سے 4 افراد جاں بحق

    کچے کے ڈاکوؤں نے تھانہ ظاہر پیر کی حدود ججہ عباسیاں پر حملہ کردیا جس کے نتیجے میں چار افراد زندگی کی بازی ہار گئے۔ پولیس نے فوری کارروائی کرکے دو ڈاکوؤں کو ہلاک کر دیا۔

    پولیس حکام کے مطابق کچے کے ڈاکوؤں نے حملہ خانپور کے علاقے ججہ عباسیہ کی بستی لاشاری میں کیا، کچے کے اندھڑ گینگ نے پولیس کے مبینہ جانثار عثمان چانڈیو کے گھر پر حملہ کرکے 2بچوں سمیت 4 افراد کو قتل کیا، مزید ہلاکتوں کا خدشہ ہے۔

    پولیس کے مطابق اندھڑگینگ کے ڈاکوؤں کی فائرنگ سے 4 افراد جاں بحق ہوئے ہیں، جاں بحق افراد میں زمان ،3بھائی سجن، مدنی اور گڈو شامل ہیں۔

    ظاہر پیر پولیس کا کہنا ہے کہ ہماری اطلاعات کے مطابق کچے کے ڈاکوؤں  نے اپنے سرغنہ اور دیگر ساتھیوں کے قتل کا بدلہ لیا ہے۔

    پولیس کے مخبر عثمان چانڈیہ نے چند ماہ قبل انڈھڑ گینگ سے دوستی کی تھی، عثمان چانڈیہ نے فائرنگ کرکے انڈھڑ گینگ کے سرغنہ اور اس کے ساتھیوں کو قتل کیا تھا۔

    عثمان چانڈیہ نے اندھڑ گینگ سے دوستی کے بعد جانو اندھڑ سمیت کئی ڈاکوؤں کو قتل کیا اور ان کی سرگرمیوں کی اطلاعات پولیس تک پہنچائی تھیں۔

    جس کے بدلے میں انڈھڑ گینگ کے ڈاکوؤں نے عثمان چانڈیہ کے ایک عزیز کے گھر پر حملہ کیا، اطلاع ملنے پر پولیس کی بھاری نفری نے موقع پر پہنچ کر علاقے کا گھیراؤ کرلیا۔

    ڈی پی او کے مطابق پولیس نے تعاقب کرکے دو ڈاکوؤں کو ہلاک کر دیا، پولیس کیلئے کام کرنے والے عثمان چانڈیہ کا خاندان محفوظ ہے۔

    آئی جی پنجاب ڈاکٹرعثمان انور نے ڈاکوؤں کے حملے کا نوٹس لیتے ہوئے آر پی او بہاولپور سے واقعے کی رپورٹ طلب کرکے ڈاکوؤں کی فوری گرفتاری کا حکم دیا ہے۔

    ظاہرپیر پولیس کا کہنا ہے کہ ڈاکو قریبی کماد کی فصل میں چھپے ہوسکتے ہیں، تاہم ان کی تلاش میں پولیس کا سرچ آپریشن تاحال جاری ہے۔

    واضح رہے کہ گزشتہ ہفتے جلال پور پیروالہ میں تاوان نہ دینے پر کچے کے ڈاکوؤں نے مغوی کو بے دردی سے قتل کر دیا تھا، ڈاکوؤں کی جانب سے لاش واپس کرنے کیلئے 50 لاکھ ادائیگی کا مطالبہ بھی کیا جا رہا ہے۔

    متاثرہ خاندان کا کہنا ہے کہ مقتول محمد شعیب کو کچھ عرصہ قبل کچے کے ڈاکوؤں نے ملتان سے اغواء کیا تھا اور 5کروڑ روپے سے زائد رقم، قیمتی موبائل فونز اور گھڑیوں کا مطالبہ کیا تھا۔

  • سوڈان: مقابلوں کے دوران اسٹیڈیم میں زوردار دھماکہ، 4 افراد ہلاک، متعدد زخمی

    سوڈان: مقابلوں کے دوران اسٹیڈیم میں زوردار دھماکہ، 4 افراد ہلاک، متعدد زخمی

    خرطوم : سوڈان میں کھیلوں کے مقابلے کے دوران اسٹیڈیم زور دار دھماکے سے گونج اٹھا، دھماکے کے نتیجے میں متعدد افراد ہلاک جب کہ تین زخمی ہوگئے۔

    غیر ملکی خبر رساں ادارے کی رپورٹ کے مطابق افریقی ملک سوڈان کے العامر نامی کلب میں مختلف کھیلوں کے مقابلوں کا انعقاد کیا گیا، جس میں ملکی و غیر ملکی کھلاڑی بھی شریک تھے۔

    مقابلے جاری تھے جنہیں دیکھنے کےلیے شائقین کی بڑی تعداد اسٹیڈیم میں جمع تھی کہ اچانک میدان زور دار دھماکے سے گونج اٹھا اور لوگوں میں بھگڈر مچ گئی۔

    ذرائع ابلاغ سے پتہ چلا ہے کہ دھماکے کے باعث چار افراد موقع پر ہلاک جب کہ تین زخمی ہوگئے۔

    میڈیا رپورٹس کے مطابق ہلاک اور زخمیوں کو فوری طور پر قریبی اسپتال منتقل کردیا گیا تھا، ریسکیو اہلکاروں اور ڈاکٹرز کا کہنا ہے کہ ہلاکتوں میں اضافے کا خدشہ ہے۔

    غیرملکی میڈیا کا کہنا ہے کہ تاحال کسی بھی شدت پسند جماعت نے دھماکے کی ذمہ داری قبول نہیں کی ہے۔

  • پسند کی شادی : سنگدل باپ نے بیٹی داماد اور دو نواسوں کو قتل کردیا، ملزم گرفتار

    پسند کی شادی : سنگدل باپ نے بیٹی داماد اور دو نواسوں کو قتل کردیا، ملزم گرفتار

    حافظ آباد : پنجاب کے شہر حافظ آباد میں باپ نے پسند کی شادی کرنے پر بیٹی، داماد اور دو نواسوں کو کلہاڑی اور چھرے کے وار سے قتل کردیا، پولیس نے ملزم کو آلہ قتل سمیت گرفتارکرلیا۔

    تفصیلات کے مطابق پسند کی شادی کر نے جرم میں باپ نے بیٹی داماد اور ان کے دو بچوں کو موت کے گھاٹ اتار دیا، تھانہ جلال پور بھٹیاں کے نواحی گاؤں نسووال میں قتل کی لرزہ خیز واردات ہوئی۔

    بیس سالہ ثناء نے چار سال پہلے فردوس نامی لڑکے سے پسند کی شادی کی تھی۔ ثنا کے باپ کو اس بات کا بہت رنج تھا۔ ملزم گلزار عرصہ دراز سے موقع کی تلاش میں تھا کہ کسی طرح ان کی زندگی کاخاتمہ کردے۔

    گذشتہ رات ملزم گلزار نے موقع پا کر غیرت کے نام پر بیٹی داماد اور بچوں کو قتل کردیا، مقتولین کی شناخت فردوس، ثناء اور زین کے نام سے ہوئی۔ واقعے کی اطلاع ملتے ہی ڈی پی او حافظ آباد پولیس جائے واردات پر پہنچے، لاشوں کو تحصیل ہیڈ کوارٹرز ہسپتال پنڈی بھٹیاں منتقل کردیا۔

    پولیس نے کارروائی کرتے ہوئے ملزم گلزار کو آلہ قتل سمیت گرفتارکر لیا، پولیس نے قتل اور دہشت گردی کی دفعات کے تحت مقدمہ درج کر لیا ہے، مقتولین کا پوسٹ مارٹم کروایا جارہا ہے، پوسٹ مارٹم کے بعد انہیں تدفین کے لیے ورثاء کے حوالے کر دیا جائے گا۔