پورٹ او پرنس : بدلے کی آگ میں جلنے والی خاتون نے اپنے خاندان کے قاتلوں سے اتنا شدید انتقام لیا کہ ایک ساتھ 40 افراد کو موت کی وادی میں پہنچا دیا اور تھانے جاکر گرفتاری دے دی۔
ہیٹی کی ایک خاتون نے ایک کرمنل گینگ کے ہاتھوں اپنے خاندان والوں کی ہلاکت کا بدلہ لیتے ہوئے اس گروہ کے 40 ارکان کو موت کے گھاٹ اتار دیا۔
رپورٹ کے مطابق ہیٹی جسے اس وقت دنیا کا سب سے خطرناک ملک سمجھا جاتا ہے جہاں تشدد کے ایک اندوہناک واقعے نے پوری دنیا کی توجہ حاصل کرلی ہے۔
یہ واقعہ اس وقت پیش آیا جب ایک خاتون جو ہیٹی کے دارالحکومت پورٹ او پرنس کے جنوب مشرقی علاقے میں اسٹریٹ وینڈر (سڑک پر کھانے پینے کا سامان بیچنے والی) تھی، نے گینگ کے تقریباً 40 افراد کو زہریلا کھانا کھلا کر ہلاک کر دیا۔
اس خاتون نے گینگ کے افراد کو ایمپانادا نامی (سموسہ نما) ایک مقامی غذا دی جو کہ تلی ہوئی ہوتی ہے۔ اس کھانے میں اس نے کیڑے مار دوا یا دیگر زہریلا کیمیکل ملایا تھا۔ کھانا دیتے وقت اس نے گینگ کے افراد کا شکریہ بھی ادا کیا اور کہا کہ آپ لوگ گاؤں کی حفاظت کرتے ہیں اس لیے یہ چیز بطور تحفہ قبول کریں۔
جب گینگ کے ارکان نے اسے کھایا تو تقریباً 40 افراد کو شدید پیٹ درد اور دورے پڑنے لگے۔ انہوں نے علاج کرنے کی کوشش کی لیکن اسپتال پہنچنے سے پہلے ہی سب کی موت واقع ہوگئی۔
واقعے کے بعد گینگ کے بچے ہوئے جرائم پیشہ افراد نے ممبران نے اس خاتون کے گھر پر حملہ کر کے اسے جلا ڈالا، لیکن خوش قسمتی سے وہ خاتون پہلے ہی وہاں سے نکل کر جاچکی تھی۔
بعد ازاں اس خاتون نے پولیس اسٹیشن جا کر خود کو پولیس کے حوالے کر دیا اور تحفظ کی درخواست کی، اس نے پولیس کو بیان دیا کہ یہ جرم میں نے اکیلے کیا ہے، کسی اور کا اس میں کوئی دخل نہیں۔
مزید یہ کہ اس نے اعتراف کیا کہ گینگ کے افراد نے اس کے خاندان والوں کو قتل کر دیا تھا اور اسی وجہ سے اس نے بدلہ لینے کے لیے یہ قدم اٹھایا۔
اس حوالے سے اقوام متحدہ کی ایک رپورٹ کے مطابق گزشتہ سال ہیٹی میں گینگ تشدد کے باعث 5 ہزار 600 افراد قتل کیے گئے۔
دارالحکومت پورٹ او پرنس کو خاص طور پر گینگز کا گڑھ سمجھا جاتا ہے اس واقعے میں جس گینگ کا ذکر آیا، اسے "ویو انسن” کہا جاتا ہے۔ یہ گینگ کئی سالوں سے مقامی لوگوں پر ظلم کر رہا ہے جن میں ڈکیتی، اغوا، اور قتل جیسے سنگین جرائم شامل ہیں۔
