Tag: 44 dead

پشاور: تیز آندھی اور موسلادھار بارش نے کئی گھروں میں صف ماتم بچھادی، دیواریں اور چھتیں گرنے سے پینتالیس افراد جاں بحق اور دو سو سے زائد زخمی ہوگئے، اسپتال زخمیوں سے بھر گئے، کل شام سے ہونے والی بارش کا سلسلہ وقفے وقفے جاری ہے۔

طوفانی بارشوں اور تیز آندھی نے پشاور میں تباہی مچادی، کئی مکانات کی دیواریں زمیں بوس اور چھتیں اڑگئیں، تیز آندھی سے درخت جڑوں سے اکھڑ گئے اور بجلی کا نظام درہم برہم ہوگیا۔

چھتیں گرنے کے واقعات چارسدہ روڈ، پخہ غلام، بدھو ثمر باغ، شب قدر اور بڈھنی میں پیش آئے، جس سے کئی افراد جاں بحق اور زخمی ہوئے۔

موسلادھار بارش کے باعث متاثرہ علاقوں میں امدادی کارروائیوں میں مشکلات پیش آئی، طوفانی بارش کے باعث پشاور موٹر وے کو بھی شدید نقصان پہنچا ہے، جس کی وجہ سے ٹریفک کی روانی متاثر ہوئی۔

محکمہ موسمیات کے مطابق پشاور میں تیزآندھی کی رفتار ایک سو دس کلومیٹرفی گھنٹہ ریکارڈ کی گئی۔

موسلا دھاربارش سے بڈھنی نالہ بھپر گیا، طغیانی کے باعث پانی اطراف کی آبادیوں میں داخل ہوگیا، چارسدہ، نوشہرہ اور گردونواح میں بھی طوفانی بارش اور آندھی نے کئی گھروں کو ملیامیٹ کردیا۔