کراچی : انیس سو پینسٹھ اور اکہتر کی جنگ میں دشمنوں کوناکوں چنے چبوانے والے میجر شبیر شریف شہید کا 47 واں یوم شہادت آج منایاجارہا ہے، میجر شریف شہید وہ واحد شخصیت ہیں جنھیں نشان حیدر اور ستارہ جرات سے نواز گیا۔
میجر شبیر شریف 28 اپریل 1943ء کو گجرات میں پیدا ہوئے، انہوں نے 21 سال کی عمر میں 1964 میں پاک فوج میں شمولیت اختیار کی، میجر شبیر شریف شروع ہی سے وطن عزیز پر جان قربان کرنے کا جذبہ رکھتے تھے، وہ پاک بھارت1965 کی جنگ میں وہ بحیثیت سیکنڈ لیفٹیننٹ شریک ہوئے اور جنگ میں بہادری سے دشمن کا مقابلہ کرنے پر انہیں ستارۂ جرأت سے نوازا گیا۔
دشمن کے خلاف مردانہ وار لڑنے پر میجر شبیر شریف کو آرمی کا سپر مین بھی کہہ کر پکارا جاتا تھا۔
انیس سو اکتہر کی پاک بھارت جنگ میں وطن عزیز پر جان قربان کرنے کا عزم اور حوصلہ کام آیا ، میجر شبیر شریف اور ان کے ساتھیوں نے ہیڈ سلیمانکی کے مقام پر بھارتی فوج کا حملہ ناکام بنایا چار بھارتی ٹینکوں کو تباہ اور تنتالیس بھارتی فوجیوں کونشان عبرت بنا کر دشمن کی فوج کو تہس نہس کرڈالا۔
انیس سو اکہتر کی جنگ میں دشمنوں کا بہادری سے مقابلہ کرتے ہوئے انہوں نے 6 دسمبر 1971 کو ٹینک کا گولہ لگنے سے جام شہادت نوش کیا، پاکستان فوج کے لئے بے لوث خدمات کے اعتراف میں انھیں پاکستان کے اعلیٰ ترین فوجی اعزاز نشان حیدر سے نواز گیا۔
میجر شبیر شریف شہید کو یہ اعزاز حاصل ہے کہ وہ نشان حیدر اور ستارہ جرات حاصل کرنے والی واحد شخصیت ہیں۔
میجر شبیر شریف کے قریبی عزیز میجر عزیز بھٹی بھی نشان حیدر حاصل کرنے والے خوش نصیبوں میں شامل ہیں، میجر شبیر شریف کے سگے چھوٹے بھائی جنرل راحیل شریف پاکستان آرمی کے سپہ سالار کے طور پر فرائض سر انجام دے چکے ہیں۔
