کراچی : وزیراعلیٰ سندھ مراد علی شاہ نے تمام وزر ا سے 5 سالہ کارکردگی کی رپورٹ طلب کرلی اور کہا کون سی وزارت نے کیا کام کیا عوام کو بتایا جائے گا۔
تفصیلات کے مطابق وزیراعلیٰ سندھ مراد علی شاہ نے تمام وزرا سے کارکردگی رپورٹ طلب کرلی اور کہا 5سال کے دوران کیا کام کئے گئے رپورٹ دی جائے۔
مراد علی شاہ نے وزراکو ون پیج کارکردگی رپورٹ وزیراعلیٰ سیکریٹریٹ میں جمع کرانے کی ہدایت کرتے ہوئے کہا 5سال کی کارکردگی کونسی وزارت نے کیا کام کیا عوام کوبتایا جائے گا۔
وزراکی کارکردگی رپورٹ پر وزیراعلیٰ سندھ مراد علی شاہ ایوان میں اہم خطاب کریں گے۔
اس حوالے سے پی ٹی آئی رہنما خرم شیر زمان نے تنقید کرتے ہوئے کہا کہ وزیر اعلیٰ سندھ نےصوبائی وزرا کی 5 سالہ کارکردگی کی پر رپورٹ جمع کرنے کا فیصلہ کیا ہے، سندھ میں 5 سال کے دوران سب سے زیادہ کرپشن محکمہ خزانہ میں ہوئی۔
خرم شیر زمان کا کہنا تھا کہ محکمہ خزانہ پچھلے 14 برس سے مراد علی شاہ کے پاس ہے، سندھ میں پنشن فنڈز میں گھپلے، جعلی ٹھیکے، گندم کی چوری اور جعلی اشتہارات جیسے فراڈ مشہور ہیں۔
انھوں نے کہا کہ پی پی کی کرپشن، بیڈ گورننس نے سندھ کا ہر ادارہ تباہ کردیا، صوبائی وزراکی کارکردگی پر خطاب وہ کریں گے جن کا اپنا کوئی کردار نہیں، ناقص کارکردگی کی وجہ سے پیپلز پارٹی چند علاقوں تک محدود ہوگئی ہے۔
