کراچی : پولیس نے شیر شاہ کباڑی مارکیٹ کے قریب مبینہ مقابلہ کے بعد 5 خطرناک ڈاکوؤں کو گرفتار کرنے کا دعویٰ کیا ہے۔
اس حوالے سے پاک کالونی پولیس حکام کا کہنا ہے کہ ڈیوٹی پر موجود اہلکاروں نے موٹر سائیکلوں پر سوار ڈکیت گینگ کو رکنے کااشارہ کیا۔
ڈاکوؤں نے پولیس کو دیکھ کر فرار ہونے کی کوشش کی تو اہلکاروں نے ان کا کافی دور تک تعاقب کیا اور انہیں حراست میں لے لیا۔
پولیس کے مطابق گرفتار ہونے والے ڈاکوؤں کے قبضے سے 3عدد پستول، چھینے ہوئے 8موبائل فونز اور دو موٹر سائیکلیں برآمد کرلی گئی ہیں۔
گرفتار شدگان ڈاکوؤں میں نوید، شوکت، ناصر، جاسم اور زاہد شامل ہیں۔ ملزمان کیخلاف مقدمہ درج کرکے مزید تفتیش کا آغاز کردیا گیا ہے۔
دوسری جانب کراچی کے علاقے کورنگی نمبر ڈیڑھ گول گراؤنڈ کےقریب ڈکیتی میں مزاحمت پر ڈاکوؤں نے فائرنگ کرکے ایک نوجوان کو زخمی کردیا۔
اس حوالے سے ریسکیو حکام کا کہنا ہے کہ زخمی ہونے والے نوجوان کی شناخت 20 سالہ کاشف کے نام سے ہوئی ہے جسے تشویشناک حالت میں جناح اسپتال منتقل کردیا گیا ہے۔
علاوہ ازیں گزشتہ روز ناظم آباد نمبر 3 سے چھینی گئی کار کورنگی سے برآمد کرلی گئی، پولیس کا کہنا ہے کہ ملزمان کار ڈرائیور کو ملیر ہالٹ میں چھوڑ کر فرار ہوگئے تھے، مسروقہ کار کورنگی دارالعلوم کے قریب سے برآمد کی گئی ہے، فی الحال کوئی گرفتاری عمل میں نہیں آئی ہے۔
مزید پڑھیں : مبینہ پولیس مقابلے میں ایک ڈاکو زخمی حالت میں گرفتار دوسرا فرار
یاد رہے کہ گزشتہ ماہ پاکپتن میں دیہاتیوں کے ساتھ واردات کر کے فرار ہونے والے ڈاکوؤں کو پولیس نے مبینہ مقابلے میں گرفتار کرلیا جبکہ دوسرا فرار ہوگیا۔
ون فائیو پر کال موصول ہونے پر قبولہ پولیس نے مسلح ڈاکوؤں کا تعاقب کیا، تو مسلح ڈاکوؤں نے پولیس پارٹی پر فائرنگ کردی جوابی فائرنگ سے ایک ڈاکو کو پولیس نے زخمی حالت میں گرفتار کرلیا۔
